پی ایم مودی نے سابق وزیر اعظم دیوے گوڑا کی اہلیہ چنّما کے انتقال پر کیا اظہار تعزیت، سرکاری اعزاز کے ساتھ آخری ادا کی گئیں رسومات

نئی دہلی: سابق وزیرِ اعظم ایچ ڈی دیوے گوڑا کی اہلیہ چنّما کی آخری رسومات پیر کے روز ضلع حسن کے گاؤں ماویناکیرے میں واقع رنگناتھ سوامی پہاڑی کے دامن میں مکمل سرکاری اعزاز کے ساتھ ادا کی گئیں۔ اس موقع پر مرکزی اور کرناٹک حکومت کے متعدد سینئر لیڈران نے انہیں خراجِ عقیدت پیش کیا۔ اس دوران کرناٹک کے وزیرِ اعلیٰ ڈی کے شیوکمار نے بھی چنّما کو خراجِ عقیدت پیش کیا۔

دیوے گوڑا سے ٹیلی فون پر اظہارِ تعزیت

وزیرِ اعظم نریندر مودی نے سابق وزیرِ اعظم ایچ ڈی دیوے گوڑا سے ٹیلی فون پر بات کر کے ان کی اہلیہ چنّما کے انتقال پر گہرے رنج و غم کا اظہار کیا۔ وزیرِ اعظم نے اس غم کی گھڑی میں دیوے گوڑا اور ان کے اہلِ خانہ سے دلی ہمدردی اور تعزیت کا اظہار کیا۔

مرکزی وزراء کی شرکت اور خراجِ عقیدت

مرکزی حکومت کی نمائندگی کرتے ہوئے مرکزی وزیر برائے امورِ صارفین، خوراک و عوامی تقسیم پرہلاد جوشی آخری رسومات میں شریک ہوئے، جبکہ مرکزی وزیرِ زراعت شیوراج سنگھ چوہان نے بھی اہلِ خانہ کے ساتھ موجود رہ کر چنّما کو خراجِ عقیدت پیش کیا۔

تقریب میں خاندان کے افراد، مختلف سیاسی لیڈران اور بڑی تعداد میں حامی شریک ہوئے۔ پرہلاد جوشی اور شیوراج سنگھ چوہان نے میت پر پھول چڑھائے اور مرکزی حکومت و وزیرِ اعظم نریندر مودی کی جانب سے تعزیتی پیغام بھی پیش کیا۔

دیوے گوڑا آبدیدہ، شیوکمار نے قدم بوسی کی

آخری رسومات کے دوران سابق وزیرِ اعظم ایچ ڈی دیوے گوڑا کئی مرتبہ جذبات پر قابو نہ رکھ سکے اور ان کی آنکھیں نم ہو گئیں۔ وہاں موجود تمام لیڈران نے انہیں دلاسہ دیا۔ وزیرِ اعلیٰ ڈی کے شیوکمار نے قومی پرچم حوالے کرنے کے بعد دیوے گوڑا کے قدم چھو کر ان کا احترام بھی کیا۔

پرہلاد جوشی کا اظہارِ افسوس

مرکزی وزیر پرہلاد جوشی نے کہا کہ چنّما کا انتقال صرف دیوے گوڑا خاندان کا ذاتی نقصان نہیں بلکہ پورے کرناٹک کے لیے ایک افسوسناک لمحہ ہے۔ ان کے مطابق چنّما سادگی، وقار اور خاندانی اقدار کی علامت تھیں اور انہوں نے دیوے گوڑا کی طویل عوامی زندگی میں ہمیشہ مضبوط سہارا بن کر ان کا ساتھ دیا۔

18 جولائی کو چنّما کا ہوا تھا انتقال

واضح رہے کہ چنّما کا انتقال ہفتہ 18 جولائی 2026 کو بنگلورو کے ایک نجی اسپتال میں دل کا دورہ پڑنے کے باعث ہوا تھا۔ انہیں 16 جولائی کی رات سانس لینے میں دشواری، سینے میں جکڑن اور عمر سے متعلق دیگر طبی مسائل کے باعث اسپتال میں داخل کرایا گیا تھا۔ چنّما کے انتقال پر وزیرِ اعظم نریندر مودی سمیت متعدد قومی لیڈران نے گہرے رنج و غم کا اظہار کیا۔

بھارت ایکسپریس۔