FIFA World Cup 2026: فرانس کے سابق اسٹالر فٹبالر تھیری ہنری کی سخت تنقید، کہا-’’کرسٹیانو رونالڈو کی ذاتی گول کی خواہش نے پرتگال کو نقصان پہنچایا‘‘

ٹیکساس (امریکہ):  فرانس کے سابق اسٹار فٹبالر تھیری ہنری نے فیفا ورلڈ کپ 2026 میں پرتگال کے کپتان کرسٹیانو رونالڈو کی کارکردگی پر سخت تنقید کرتے ہوئے کہا کہ ذاتی گول کرنے کی خواہش نے ٹیم کو ایک اہم موقع سے محروم کر دیا۔ ورلڈ کپ کے اپنے پہلے میچ میں پرتگال کو ڈی آر کانگو کے خلاف 1-1 سے برابری پر اکتفا کرنا پڑا، جبکہ رونالڈو پورے میچ میں خاطر خواہ اثر چھوڑنے میں ناکام رہے۔ گول ڈاٹ کام کے مطابق، فاکس نیوز سے گفتگو کرتے ہوئے تھیری ہنری نے کہا کہ کسی بھی کھلاڑی کی ترجیح اپنی ذات نہیں بلکہ ٹیم کی کامیابی ہونی چاہیے۔ انہوں نے کہا: ’’سب سے اہم بات یہ ہے کہ ٹیم کو گول کرنا چاہیے، نہ کہ صرف آپ کو گول کرنا چاہیے۔‘‘

رونالڈو کی پوزیشننگ پر سوال

ہنری نے میچ کے ایک مخصوص موقع کا حوالہ دیتے ہوئے کہا کہ جب ژاؤ کانسیلو کے پاس گیند تھی تو رونالڈو کو ایسا رن لگانا چاہیے تھا جس سے مدافعین پر دباؤ بنتا اور چھ گز کے باکس میں جگہ خالی ہوتی، جس کا فائدہ برونو فرنانڈیز اٹھا سکتے تھے۔ انہوں نے کہا: ’’اگر رونالڈو چھ گز کے باکس کی طرف دوڑتے تو مدافعین کو ان کا تعاقب کرنا پڑتا اور برونو فرنانڈیز کے لیے آسان گول کا موقع پیدا ہو جاتا۔ لیکن چونکہ وہ خود گول کرنا چاہتے تھے، اس لیے وہ برونو کے راستے میں آ گئے، جس سے دفاع کے لیے صورتحال آسان ہو گئی۔‘‘

رونالڈو کے اعداد و شمار بھی مایوس کن

ای ایس پی این ایف سی کے مطابق، رونالڈو نے میچ میں صرف 25 مرتبہ گیند کو چھوا، تین شاٹس لیے لیکن کوئی بھی ہدف پر نہ جا سکا، جبکہ صرف ایک مقابلہ جیت سکے۔ یہ ان کے ورلڈ کپ کیریئر کے ان میچوں میں سے ایک تھا جن میں ان کی شمولیت سب سے کم رہی۔ یہ ورلڈ کپ میں بطور اسٹارٹر ان کا دوسرا ایسا میچ تھا جس میں انہوں نے سب سے کم مرتبہ گیند کو چھوا۔ مزید یہ کہ رونالڈو اب بڑے بین الاقوامی مقابلوں میں مسلسل 10 میچوں سے گول کرنے میں ناکام رہے ہیں، جس نے ان کی فارم پر سوالات مزید بڑھا دیے ہیں۔

برتری برقرار نہ رکھ سکا پرتگال

پرتگال نے میچ کا شاندار آغاز کیا اور چھٹے منٹ میں ژاؤ نیویس نے پیڈرو نیٹو کے کراس پر ہیڈر کے ذریعے گول کر کے ٹیم کو برتری دلائی۔ تاہم ابتدائی گول کے بعد پرتگال کی رفتار سست پڑ گئی اور ٹیم زیادہ مؤثر حملے نہ کر سکی، جبکہ ڈی آر کانگو جوابی حملوں میں خطرناک نظر آیا۔ پہلے ہاف کے اضافی وقت میں آرتھر ماسواکو کے کراس پر یوان ویسا نے ہیڈر کے ذریعے گول کر کے مقابلہ برابر کر دیا۔

دوسرے ہاف میں بھی نہیں مل سکی کامیابی

دوسرے ہاف کے آغاز میں ژاؤ کانسیلو نے ایک خوبصورت گول کیا، لیکن آف سائیڈ قرار دیے جانے کے باعث اسے مسترد کر دیا گیا۔ بعد ازاں سیڈرک باکامبو نے برونو فرنانڈیز کو پیچھے چھوڑتے ہوئے گیند پوسٹ پر مار دی، جس سے پرتگال کو ایک اور خطرے کا سامنا کرنا پڑا۔ آخر میں متبادل کھلاڑی فرانسسکو کونسیساؤ نے پرتگال کے حملوں میں جان ڈالنے کی کوشش کی اور رونالڈو کے لیے کئی مواقع بھی بنائے، لیکن تجربہ کار اسٹرائیکر انہیں گول میں تبدیل نہ کر سکے۔ یوں ڈی آر کانگو نے دفاعی نظم و ضبط کا شاندار مظاہرہ کرتے ہوئے 1974 کے بعد اپنے پہلے ورلڈ کپ میچ میں ایک یادگار ایک پوائنٹ حاصل کر لیا۔

بھارت ایکسپریس اردو۔