Gyaneshwari Yadav Silver Medal: گیانیشوری یادو کو چاندی کا تمغہ جیتنے پر نائب صدر، وزیراعظم، وزیر دفاع اور وزیر کھیل نے دی مبارکباد

نئی دہلی: گلاسگو میں جاری کامن ویلتھ گیمز 2026 میں ہندوستانی ویٹ لفٹرز کی شاندار کارکردگی جاری ہے۔ پیر کو خواتین کے 53 کلوگرام وزن کے زمرے میں گیانیشوری یادو نے چاندی کا تمغہ جیتا۔ گیانیشوری صرف 7 کلوگرام کے فرق سے طلائی تمغہ حاصل کرنے سے محروم رہ گئیں۔ اپنی کامیابی کے بعد میڈیا سے بات کرتے ہوئے گیانیشوری یادو نے کہا ’’میں بہت خوش ہوں۔ یہ میرے پہلے کامن ویلتھ گیمز ہیں۔ میرا مقصد اپنی ذاتی بہترین کارکردگی کا مظاہرہ کرتے ہوئے تمغہ جیتنا تھا۔ میں نے ایسا ہی کیا۔ دیگر حریف بھی بہت مضبوط تھیں، اسی لیے میں طلائی تمغہ نہیں جیت سکی۔ میں چاندی کے تمغے سے خوش ہوں۔‘‘

پورا ملک آپ کی کامیابی پر فخر کر رہا ہے: نائب صدر

گیانیشوری یادو کو ان کی کامیابی پر ملک کے نائب صدر، وزیر اعظم، وزیر دفاع اور وزیر کھیل نے مبارک باد دی ہے۔ نائب صدر سی  پی رادھاکرشنن نے اپنے آفیشل ایکس اکاؤنٹ پر لکھا ’’کامن ویلتھ گیمز 2026 کے خواتین کے 53 کلوگرام ویٹ لفٹنگ مقابلے میں چاندی کا تمغہ جیتنے پر گیانیشوری یادو کو بہت بہت مبارک باد۔ پورا ملک اس شاندار کامیابی کا جشن منا رہا ہے اور آپ کی کامیابی پر فخر کر رہا ہے۔ آپ کے آئندہ سفر میں ہر کامیابی کے لیے میری نیک خواہشات۔‘‘

وزیر اعظم مودی نے ذاتی بہترین کارکردگی کی تعریف کی

وزیراعظم نریندر مودی نے ایکس پر لکھا، ’’کامن ویلتھ گیمز گلاسگو 2026 میں ویٹ لفٹنگ میں چاندی کا تمغہ جیتنے پر گیانیشوری یادو کو مبارک باد۔ یہ کامیابی اس لیے اور بھی خاص ہے کہ انہوں نے اس مقابلے میں اپنی ذاتی بہترین کارکردگی کا مظاہرہ کیا ہے۔ ان کی کامیابی ہندوستان کے نوجوانوں کے لیے تحریک کا باعث بنے۔ میں ان کے آئندہ سفر میں مسلسل کامیابی کی خواہش کرتا ہوں۔‘‘

راج ناتھ سنگھ اور منسکھ مانڈویہ نے بھی سراہا

وزیر دفاع راج ناتھ سنگھ نے ایکس پر لکھا، ’’گلاسگو کامن ویلتھ گیمز 2026 کے ویٹ لفٹنگ مقابلے میں چاندی کا تمغہ جیتنے پر گیانیشوری یادو کو مبارک باد۔ تمام چھ لفٹ کامیابی کے ساتھ مکمل کرکے نیا ذاتی بہترین ریکارڈ قائم کرنا ان کی شاندار تیاری، صبر اور حوصلے کا ثبوت ہے۔ آنے والے برسوں میں ان کے لیے مزید کامیابیوں اور مسلسل ترقی کی نیک خواہشات۔‘‘ وزیر کھیل منسکھ مانڈویہ نے کہا، ’’ہندوستان کا فخر مزید بلند کرتے ہوئے، کھیلو انڈیا ایتھلیٹ گیانیشوری یادو کو گلاسگو کامن ویلتھ گیمز 2026 کے خواتین کے 53 کلوگرام ویٹ لفٹنگ مقابلے میں سخت مقابلے کے بعد چاندی کا تمغہ جیتنے پر بہت بہت مبارک باد۔‘‘

 تمغہ جیتنے والی کھلاڑیوں نے بھی خوشی کا اظہار کیا

خواتین کے 53 کلوگرام زمرے میں طلائی تمغہ جیتنے والی نائجیریا کی ڈیڈیہ اونومے اومولولا نے آئی اے این ایس سے کہا ’’میں اپنے ملک اور اپنے آس پاس موجود تمام لوگوں کو مبارک باد دیتی ہوں، کیونکہ گلاسگو میں ہونا میرے لیے ایک بہت بڑا اعزاز ہے۔ یہ میرے پہلے گیمز ہیں اور میرے لیے بہت اہم ہیں۔ میں نے خود سے وعدہ کیا تھا کہ طلائی تمغہ جیتنے کے لیے میں ہر ممکن کوشش کروں گی، اور میں نے یہ کر دکھایا ہے۔‘‘ وہیں، کانسے کا تمغہ جیتنے والی کینیڈا کی ربیکا گرولکس نے آئی اے این ایس سے کہا ’’مجھے لگتا ہے کہ میں نے اپنی کارکردگی پر توجہ مرکوز کرنے، ماحول کی توانائی کو محسوس کرنے اور اپنی تکنیک پر توجہ دینے کی پوری کوشش کی، اور میں نے وہی کیا۔ اس کا نتیجہ کانسی کے تمغے کی صورت میں سامنے آیا۔ میں واقعی خوش ہوں کہ میں اتنی مضبوط حریفوں کے ساتھ مقابلہ کر سکی اور ان کے ساتھ تمغہ جیت سکی۔‘‘

بھارت ایکسپریس اردو۔