The Ashes series: ایشیز میں ناقابل فراموش ریکارڈ، ’’ایشیز کا وہ واحد میچ جس کی ایک ہی اننگ میں 900 سے زیادہ رنز بنے‘‘

آسٹریلیا اور انگلینڈ کے درمیان ایشیز سیریز کا آغاز 83-1882 میں ہوا تھا۔ تب سے آج تک کئی ریکارڈ بنے اور ٹوٹے، مگر ایک میچ ایسا بھی کھیلا گیا جس نے ٹیسٹ کرکٹ کی تاریخ میں انوکھا مقام حاصل کیا۔ ایک ہی اننگ میں 900 سے زائد رنز بنے۔ اگست 1938 میں اوول کے میدان پر کھیلے گئے اس یادگار ٹیسٹ میں انگلینڈ نے پہلی اننگ میں 903/7 رنز بنا کر پاری ڈکلئیر کی۔

انگلینڈ کی تاریخی اننگ — ہٹن کی بے مثال ٹرپل سنچری

انگلینڈ نے ٹاس جیت کر پہلے بیٹنگ کا فیصلہ کیا۔ 29 کے مجموعی اسکور پر پہلا وکٹ گرنے کے بعد لیونارڈ ہٹن اور مورس لیلینڈ نے 382 رنز کی شراکت قائم کی۔ لیلینڈ 187 رنز (17 چوکے) بنا کر آؤٹ ہوئے۔ بعد ازاں ہٹن نے کیپٹن ویلی ہیمنڈ کے ساتھ سنچری پارٹنرشپ کر کے ٹیم کو 500 کے پار پہنچایا۔ ہیمنڈ نے 59 رنز بنائے۔ درمیان میں دو تیز وکٹیں گرنے کے بعد ہٹن اور جو ہارڈ اسٹاف نے 215 رنز کی مضبوط شراکت کی۔ لینارڈ ہٹن نے 847 گیندوں پر 35 چوکوں کے ساتھ 364 رنز کی تاریخی اننگ کھیلی۔ ہارڈ اسٹاف 169 رنز پر ناٹ آؤٹ رہے۔ آسٹریلیا کی طرف سے بل او’ریلی نے سب سے زیادہ 3 وکٹ لیے۔

آسٹریلیا کی دونوں اننگز فلاپ

پہلی اننگز میں آسٹریلیا کی ٹیم صرف 201 رنز پر آؤٹ ہو گئی۔ بل براؤن نے 69 رنز بنائے، جبکہ انگلینڈ کے بل بووَس نے 5 وکٹ لیے۔ انگلینڈ کو 702 رنز کی بڑی سبقت حاصل ہوئی۔ فالو آن کھیلتے ہوئے دوسری اننگز میں آسٹریلیا صرف 123 رنز بنا سکا۔ کین فارنیس نے 4 وکٹیں لیں جبکہ بل بووس اور ہیڈلی ویریٹی نے 2،2 وکٹیں حاصل کیں۔ انگلینڈ نے یہ میچ ایک اننگ اور 579 رنز سے جیت کر کرکٹ تاریخ کی سب سے یکطرفہ فتح اپنے نام کی۔

بھارت ایکسپریس اردو۔