T20 World Cup 2026: پاکستان کو سیمی فائنل میں پہنچنے کی امیدوں کو زندہ رکھنے کے لیے انگلینڈ کو شکست دینا ضروری

نئی دہلی ئٹی20 ورلڈ کپ 2026 کے سپر8 مرحلے میں منگل کو پاکستان اور انگلینڈ کے درمیان اہم مقابلہ کھیلا جائے گا۔ یہ میچ پالے کیلے انٹرنیشنل کرکٹ اسٹیڈیم میں شام 7 بجے شروع ہوگا، جہاں دونوں ٹیمیں سیمی فائنل میں رسائی کی امیدوں کو برقرار رکھنے کے لیے میدان میں اتریں گی۔ پاکستان کا پہلا میچ نیوزی لینڈ کے خلاف بارش کی نذر ہو گیا تھا، جس کے باعث دونوں ٹیموں کو ایک، ایک پوائنٹ پر اکتفا کرنا پڑا۔ دوسری جانب انگلینڈ نے اپنے ابتدائی مقابلے میں میزبان سری لنکا کو شکست دے کر مضبوط آغاز کیا۔ ایسے میں پاکستان کے لیے یہ میچ جیتنا نہایت ضروری ہو گیا ہے، جب کہ انگلینڈ فتح کے ذریعے سیمی فائنل میں اپنی جگہ تقریباً یقینی بنانا چاہے گا۔

پالے کیلے کی پچ کو اسپن گیند بازوں کے لیے سازگار سمجھا جاتا ہے۔ انگلینڈ کو اس میدان کی صورتحال کا بخوبی اندازہ ہے کیونکہ حال ہی میں اس نے اسی گراؤنڈ پر سری لنکا کے خلاف ٹی20 سیریز میں کامیابی حاصل کی تھی۔پاکستانی ٹیم سست پچ کا فائدہ اٹھانے کے لیے مضبوط اسپن اٹیک کے ساتھ میدان میں اتر سکتی ہے۔ ٹیم میں عثمان طارق، صائم ایوب، ابرار احمد، شاداب خان اور محمد نواز جیسے اسپنرز موجود ہیں، جو انگلینڈ کی بیٹنگ لائن اپ کے لیے بڑا چیلنج ثابت ہو سکتے ہیں، خاص طور پر میچ کے آخری اوورز میں جب پچ مزید سست ہونے کا امکان ہوتا ہے۔

دوسری جانب انگلینڈ کے پاس ول جیکس اور عادل رشید جیسے مؤثر اسپنرز موجود ہیں، جو پاکستانی بلے بازوں کے لیے مشکلات پیدا کر سکتے ہیں۔ سری لنکا کے خلاف گزشتہ میچ میں ول جیکس نے اپنی گیند بازی سے ٹیم کی جیت میں اہم کردار ادا کیا تھا۔اعداد و شمار کے مطابق ٹی20 فارمیٹ میں انگلینڈ کا پلڑا پاکستان پر بھاری رہا ہے۔ دونوں ٹیموں کے درمیان اب تک 31 ٹی20 میچ کھیلے جا چکے ہیں جن میں انگلینڈ نے 21 جبکہ پاکستان نے 9 مقابلوں میں کامیابی حاصل کی، جب کہ ایک میچ بے نتیجہ رہا۔ ایسے میں ماہرین کا ماننا ہے کہ جس ٹیم کی اسپن بولنگ بہتر کارکردگی دکھائے گی، فتح اسی کے حصے میں آنے کے امکانات زیادہ ہوں گے۔

بھارت ایکسپریس اردو