T20 World Cup 2025: ٹیم انڈیا کا اعلان آج!  خراب فارم کے باوجود کیا سوریہ کمار یادو اور شبھمن گل پر برقرار رہے گا اعتماد؟

کرکٹ شائقین کے لیے آج کا دن کافی اہم ہے۔ آئی سی سی ٹی20 ورلڈ کپ 2025 کے لیے بھارتی ٹیم کا باقاعدہ اعلان آج یعنی 20 دسمبر کو کیا جائے گا۔ کھیل کے حلقوں میں اس بات پر زبردست بحث چھڑی ہوئی ہے کہ کیا سلیکٹرز بڑے ناموں پر قینچی چلائیں گے یا پھر پرانے بھروسےمند کھلاڑیوں کے ساتھ ہی میدان میں اتریں گے۔ تاہم، جو خبریں باہر آ رہی ہیں، ان کے مطابق ٹیم میں کسی بڑی تبدیلی کی گنجائش کم ہی نظر آ رہی ہے۔

کپتانی کا مسئلہ اور سوریہ کا ’آخری داؤ‘

سب کی نظریں کپتان سوریہ کمار یادو اور نائب کپتان شبھمن گل پر مرکوز ہیں۔ حقیقت یہ ہے کہ گزشتہ کچھ عرصے سے دونوں دھاکڑ بلے باز اپنی شناخت کے مطابق کارکردگی دکھانے میں ناکام رہے ہیں۔ سوریہ گزشتہ 14 ماہ اور تقریباً 24 میچوں سے خراب فارم کا شکار ہیں۔ 35 سال کی عمر میں ان پر کپتانی کا دباؤ بھی واضح طور پر دکھائی دے رہا ہے۔ ماہرین کے مطابق سوریہ کو ٹیم میں رکھنے کی سب سے بڑی وجہ ان کی کپتانی ہے۔ بورڈ اس عالمی مقابلے سے قبل قیادت بدل کر کسی قسم کی غیر یقینی صورتحال نہیں چاہتا۔ ممکن ہے کہ یہ سوریہ کے لیے کپتان کے طور پر آخری بڑا ٹورنامنٹ ہو۔ اگر نتائج مثبت نہ رہے تو ورلڈ کپ کے بعد ٹیم انڈیا کی قیادت کسی نئے کھلاڑی کو سونپی جا سکتی ہے۔

شبھمن گل کی جگہ خطرے میں؟

ٹیم کے سامنے دوسری بڑی فکر اوپننگ جوڑی سے متعلق ہے۔ جہاں یشسوی جیسوال ڈومیسٹک کرکٹ میں رنز کا طوفان برپا کر رہے ہیں، وہیں شبھمن گل کا حالیہ فارم کچھ خاص نہیں رہا۔ اس کے باوجود، بی سی سی آئی کی سلیکشن کمیٹی شاید گل سے نائب کپتانی نہیں چھینے گی۔ سنجو سیمسن کے فینز کے لیے خبریں ملی جولی ہیں؛ سنجو کو ممکنہ طور پر ریزرو اوپنر اور جیتیش شرما کے بیک اپ وکٹ کیپر کے طور پر ٹیم میں جگہ مل سکتی ہے، یعنی انہیں پلےئنگ الیون میں جگہ بنانے کے لیے سخت محنت کرنی ہوگی۔

آل راؤنڈر اور بولنگ یونٹ کی فکر

واشنگٹن سندر کو ٹیم میں بولنگ آل راؤنڈر کے طور پر دیکھا جا رہا ہے، لیکن پچھلے کچھ میچوں میں ان کا فارم بھی اتار چڑھاؤ کا شکار رہا۔ بھارت اور سری لنکا میں ہونے والے ورلڈ کپ کے لیے سلیکٹرز ممکنہ طور پر وہی اسکواڈ نیوزی لینڈ کے دورے پر بھیج سکتے ہیں تاکہ کھلاڑی اپنی فارم واپس حاصل کر سکیں۔

کاغذوں پر مضبوط، فارم کی فکر

بھارتی ٹیم بظاہر بہت مضبوط نظر آ رہی ہے، لیکن حقیقت یہ ہے کہ ٹاپ-3 میں سے دو بلے بازوں کا آؤٹ آف فارم ہونا سلیکٹرز کی راتوں کی نیند اڑا رہا ہے۔ ورلڈ کپ کا پہلا میچ ممبئی میں امریکہ (USA) کے خلاف شیڈول ہے۔ بی سی سی آئی کے پاس ٹیم میں تبدیلی کے لیے 7 فروری 2025 تک وقت ہے، لیکن کوچ اور سلیکٹرز یہ چاہیں گے کہ آج جو ٹیم چنی جائے، وہی کھلاڑی ورلڈ کپ کی ٹرافی گھر لے آئیں۔

بھارت ایکسپریس اردو۔