Rohit Sharma 500th International Match Milestone Against Australia : روہت شرما کا 500 واں انٹرنیشنل میچ، آسٹریلیا کے خلاف پرتھ میں تاریخ رقم کریں گے ہٹ مین

ہندوستانی کرکٹ ٹیم اپنے دورے کے لیے آسٹریلیا پہنچ گئی ہے اور تین میچوں کی ون ڈے سیریز کا آغاز 19 اکتوبر سے ہوگا۔ پرتھ کے اوپٹس اسٹیڈیم میں کھیلا جانے والا پہلا میچ روہت شرما کے لیے بہت خاص ہوگا۔ یہ میچ ان کا 500 واں انٹرنیشنل میچ ہوگا۔

انٹرنیشنل کیریئر کا 500 واں میچ

اگر روہت شرما اس میچ میں پلیئنگ الیون کا حصہ بنتے ہیں تو وہ ہندوستان کے پانچویں اور دنیا کے گیارہویں کھلاڑی بن جائیں گے جنہوں نے 500 یا اس سے زیادہ بین الاقوامی میچ کھیلے ہیں۔ ان سے پہلے ہندوستان کے لیے یہ کارنامہ سچن تندولکر (664 میچ)، ویراٹ کوہلی (550)، ایم ایس دھونی (535) اور راہل دراوڑ (504) نے انجام دیا ہے۔

روہت شرما کا کیریئر

روہت نے 2007 میں انٹرنیشنل کرکٹ میں ڈیبیو کیا اور 67 ٹیسٹ، 273 ون ڈے اور 159 ٹی 20 کھیلے ہیں۔ انہوں نے کل 499 بین الاقوامی میچ کھیلے ہیں جن میں 50 سنچریوں کی مدد سے 19,700 رنز بنائے ہیں۔ اس میں ٹیسٹ میں 12 سنچریاں اور 4،301 رنز، ون ڈے میں 32 سنچریاں اور 11،168 رنز اور ٹی 20 میں 4،231 رنز اور 5 سنچریاں شامل ہیں۔

500 سے زیادہ بین الاقوامی میچ کھیلنے والے کھلاڑی

دنیا کے جن کھلاڑیوں نے 500 سے زائد بین الاقوامی میچز کھیلے ہیں، ان میں چار ہندوستانی لیجنڈز کے علاوہ سری لنکا کے مہیلا جے وردھنے (652)، کمار سنگاکارا (594)، سنتھ جے سوریا (586)، آسٹریلیا کے رکی پونٹنگ (560)، پاکستان کے شاہد آفریدی (524) اور جنوبی افریقہ کے جیک کیلس (594 ) شامل ہیں۔

روہت شرما کے لیے یہ سنگ میل نہ صرف ان کے کیریئر کی ایک بڑی کامیابی ہے بلکہ ہندوستانی کرکٹ کے لیے ایک قابل فخر لمحہ ہے۔ پرتھ میں ہونے والا یہ میچ ان کے لیے یادگار ثابت ہو گا اور شائقین امید کر رہے ہیں کہ وہ شاندار پرفارمنس سے اس خاص دن کو مزید خاص بنائیں گے۔

–بھارت ایکسپریس اردو