Pakistan vs Bangladesh Test Series: ٹسٹ کرکٹ میں بڑا الٹ پھیر، بنگلہ دیش نے تاریخی کارکردگی سے پاکستان کا کیا کلین سوئپ

بنگلہ دیش نے بڑا الٹ پھیر کرتے ہوئے پاکستانی ٹیم کے خلاف پہلی بار کلین سوئپ کیا۔

پاکستان اوربنگلہ دیش کے درمیان ٹسٹ سیریزکی جب شروعات ہوئی توکسی نے نہیں سوچا تھا کہ اس کا انجام ایسا ہوگا، جیسے دیکھنے کو ملا ہے۔ شاید ہی کسی نے سوچا ہوگا کہ بنگلہ دیش، جس نے پہلے کبھی پاکستان کے خلاف ایک ٹسٹ نہیں جیتا، وہ پوری کی پوری سیریز جیت کرقبضہ کرلے گا۔ وہ بھی پاکستان کی سرزمین پرجاکر۔ تاہم ہوا بالکل ایسا ہی ہے۔ 21 اگست سے جو 2 ٹسٹ کی سیریز شروع ہوئی تھی، وہ 3 ستمبرکواپنے آخری مقام پرپہنچنے کے بعد پوری طرح سے بنگلہ دیش کی جھولی میں تھی۔ بنگلہ دیش نے تاریخ رقم کرتے ہوئے پاکستان کواسی کے گھرمیں کھیلی گئی ٹسٹ سیریز میں 0-2 سے ہرایا ہے۔

بنگلہ دیش نے ٹسٹ سیریز میں کیا کلین سوئپ

پاکستان اور بنگلہ دیش کے درمیان ٹسٹ سیریزکے دونوں مقابلے راولپنڈی میں کھیلے گئے۔ پہلے ٹسٹ میں پاکستان کو 10 وکٹ سے ہرانے کے بعد بنگلہ دیش نے دوسرا ٹسٹ میچ 6 وکٹ سے جیتا۔ پہلے ٹسٹ میں ایک بھی اسپنرنہ کھلانے کی غلطی کرنے والا پاکستان دوسرے ٹسٹ میں پوری تیاری سے ٹیم میں تھوڑی تبدیلی کے ساتھ اترا۔ تاہم اس سے کچھ خاص فائدہ نہیں ہوا۔ تینوں ہی ڈپارٹمنٹ میں بنگلہ دیش نے پاکستان سے بہترکھیل دکھایا اور ٹسٹ سیریز میں کلین سوئپ کرلیا۔

185 رنوں کے ہدف کا تعاقب کرکے جیتا دوسرا ٹسٹ

راولپنڈی میں کھیلے گئے دوسرے ٹسٹ میچ میں پاکستان نے بنگلہ دیش کے سامنے جیت کے لئے 185 رنوں کا ہدف دیا تھا۔ سیریز میں بنگلہ دیش کے بلے بازوں کے پرفارمنس کو دیکھتے ہوئے یہ ہدف زیادہ مشکل نہیں تھا۔ خاص طور پر تب جب میچ میں اسے حاصل کرنے کے لئے ہاتھ میں 10 وکٹ اور پورا کا پورا ایک دن کا کھیل بچا ہو۔ بنگلہ دیش نے ان ساری باتوں کا پورا فائدہ اٹھاتے ہوئے دوسرے ٹسٹ کے آخری دن کے کھیل میں اپنی جیت کی کہانی لکھی۔

ایسے چلا پاکستان-بنگلہ دیش دوسرا ٹسٹ

اس سے پہلے دوسرے ٹسٹ میں پاکستان نے پہلے بلے بازی کرتے ہوئے پہلی اننگ میں 274 رن بنائے تھے۔ بنگلہ دیش کی طرف سے پہلی اننگ میں مہدی حسن نے 5 وکٹ حاصل کئے تھے۔ وہیں تسکین احمد 3 وکٹ کے ساتھ دوسرے سب سے کامیاب گیند باز رہے تھے۔ جواب میں بنگلہ دیش نے اپنی پہلی اننگ میں 262 رن بنائے۔ پاکستان کی طرف سے پہلی اننگ میں خرم شہزاد سب سے کامیاب گیند باز رہے اور 6 وکٹ حاصل کئے۔ پہلی اننگ میں 14 رنوں کی لیڈ کے ساتھ دوسری اننگ کھیلنے اتری پاکستان کی ٹیم بس 172 رن ہی بناسکی۔ اس بار بنگلہ دیش کے تیزگیند بازوں نے انہیں 200 رنوں سے اوپرنہیں جانے دیا۔ ایسا پہلی باردیکھنے کوملاجب ٹسٹ کرکٹ کی ایک اننگ میں سبھی 10 وکٹ بنگلہ دیش کے تیزگیند بازوں نے مل کرلئے۔ دوسری اننگ میں بنگلہ دیش کی طرف سے حسن محمود نے 5 وکٹ، نوید رانا نے 4 وکٹ اورتسکین احمد نے ایک وکٹ حاصل کیا تھا۔

پاکستان سیریز ہارا اورشان مسعود کے ساتھ یہ ہوا

گیندبازوں کے بعد بنگلہ دیش کے لئے میچ کو انجام تک پہنچانے کی ذمہ داری بلے بازوں کی تھی، جس میں وہ کھرے اترے۔ اسی کا نتیجہ ہے کہ پاکستان کے خلاف پہلی باربنگلہ دیش نے صرف ٹسٹ میچ نہیں بلکہ پوری ٹسٹ سیریز جیتنے کا کارنامہ انجام دیا۔ اس کے اسی کارناموں کی وجہ سے پاکستان کے کپتان کی کنڈلی میں پہلی ٹسٹ جیت کا انتظار بڑھ گیا ہے۔ دراصل، راولپنڈی میں کھیلے گئے دوسرے ٹسٹ کو ملاکر شان مسعود نے پاکستان کے لئے اب تک جن پانچ ٹسٹ میچوں میں کپتانی کی ہے، ان سب میں ٹیم کو ہارملی ہے۔