Khelo India Scheme: کھیلو انڈیا اسکیم کو نئی شکل، قومی کھیل فیڈریشنوں کو مزید مالی امداد ملے گی، کابینہ کی منظوری

مرکزی حکومت نے ملک میں کھیلوں کے فروغ کے لیے ایک بڑا فیصلہ کرتے ہوئے وزیر اعظم نریندر مودی کی صدارت میں منعقدہ مرکزی کابینہ کی میٹنگ میں 27-2026 سے 31-2030 تک کے لیے نئی کھیلو انڈیا اسکیم کی منظوری دے دی ہے۔ اس منصوبے پر مجموعی طور پر 36,441 کروڑ روپے خرچ کیے جائیں گے۔ حکومت کے مطابق یہ آزادی کے بعد ملک کا سب سے بڑا اسپورٹس ڈیولپمنٹ پروگرام ہوگا، جس کا مقصد نوجوانوں کو کھیلوں کے میدان میں آگے بڑھنے کے زیادہ سے زیادہ مواقع فراہم کرنا ہے۔

گاؤں سے عالمی سطح تک کھلاڑیوں کو موقع دینے پر زور

حکومت کا کہنا ہے کہ نئی اسکیم صرف کھلاڑی تیار کرنے تک محدود نہیں رہے گی بلکہ اسکولوں، دیہات اور چھوٹے شہروں سے ابھرنے والی کھیلوں کی صلاحیتوں کو قومی اور بین الاقوامی سطح تک پہنچانے کے لیے ایک جامع نظام تیار کیا جائے گا۔ اس کا مقصد یہ یقینی بنانا ہے کہ کسی بھی باصلاحیت نوجوان کی ترقی معاشی حالات، مقام یا وسائل کی کمی کی وجہ سے متاثر نہ ہو۔حکومت کے مطابق نئی کھیلو انڈیا اسکیم پر ہونے والا خرچ سابقہ منصوبے کے مقابلے میں تقریباً آٹھ گنا زیادہ ہے۔ اس منصوبے کو کھیلو بھارت پالیسی 2025 اور قومی تعلیمی پالیسی 2020 کے وژن سے جوڑا گیا ہے تاکہ تعلیم، فٹنس، جدید ٹیکنالوجی اور کھیلوں کی تربیت کو ایک ساتھ فروغ دیا جا سکے۔

اولمپکس تک پہنچنے کے لیے جامع نظام تیار ہوگا

اس اسکیم کا مقصد بھارت کو مستقبل کے بڑے بین الاقوامی کھیلوں کے مقابلوں کے لیے تیار کرنا بھی ہے۔ اس میں 2030 کامن ویلتھ گیمز اور آئندہ اولمپکس و پیرا اولمپکس کی میزبانی کی تیاریوں کو بھی مدنظر رکھا گیا ہے۔کھلاڑیوں کی ترقی کے لیے ٹیلنٹ کی شناخت، سائنسی تربیت، معیاری کوچنگ، بین الاقوامی مقابلوں کا تجربہ اور اولمپک سطح کی تیاری تک ہر مرحلے کو اس نظام کا حصہ بنایا جائے گا۔اس مقصد کے لیے ملک بھر میں نیشنل سینٹر آف ایکسی لینس، کھیلو انڈیا سینٹر آف ایکسی لینس، سائی ٹریننگ سینٹر، کھیلو انڈیا سینٹر اور منظور شدہ اسپورٹس اکیڈمیوں کو مزید مضبوط کیا جائے گا، جہاں جدید سہولیات، اسپورٹس سائنس اور ماہرین کی رہنمائی فراہم کی جائے گی۔

اسکولوں اور نوجوان کھلاڑیوں پر خصوصی توجہ

اسکولی سطح پر کھیلوں کے فروغ کے لیے کھیلو انڈیا فیڈر اسکولز اور کھیلو انڈیا ایکسی لینس اسکولز کے ذریعے کم عمری میں ہی باصلاحیت بچوں کی شناخت اور ان کی رہنمائی پر زور دیا جائے گا۔اس کے علاوہ موجودہ کھیلو انڈیا ایتھلیٹ پروگرام کے ساتھ ایک نئی کیٹیگری “ایمرجنگ کھیلو انڈیا ایتھلیٹس” بھی متعارف کرائی جائے گی، جس کے ذریعے مزید نوجوان کھلاڑیوں کو تربیت، رہنمائی اور طویل مدتی تعاون فراہم کیا جائے گا۔

خواتین، پیرا ایتھلیٹس اور روایتی کھیلوں کو فروغ

حکومت نے نئی اسکیم میں خواتین کھلاڑیوں، پیرا ایتھلیٹس اور بھارت کے روایتی کھیلوں کو خصوصی اہمیت دی ہے۔ اس کے ساتھ ہی فٹ انڈیا مہم کو مزید وسعت دی جائے گی تاکہ نوجوانوں میں صحت مند طرزِ زندگی، جسمانی سرگرمیوں اور کھیلوں میں شرکت کو فروغ دیا جا سکے، خصوصاً دور دراز اور سرحدی علاقوں میں کھیلوں کی سہولیات پہنچانے پر توجہ دی جائے گی۔

کوچنگ اور ٹیکنالوجی میں بڑی اصلاحات

کابینہ نے کوچنگ کے معیار کو بہتر بنانے کے لیے نیشنل کوچ ایکریڈیٹیشن بورڈ کے قیام کی منظوری بھی دی ہے، جس کا مقصد کوچز کی اہلیت اور تربیت کو بین الاقوامی معیار کے مطابق بنانا ہے۔اسی طرح ایک یونیفائیڈ ڈیجیٹل اسپورٹس پلیٹ فارم بھی تیار کیا جائے گا، جہاں کھلاڑیوں کا ڈیٹا، تربیت، مقابلے، فنڈنگ اور ٹیلنٹ ڈیولپمنٹ سے متعلق تمام معلومات ایک ہی پلیٹ فارم پر دستیاب ہوں گی۔

قومی کھیل فیڈریشنوں کو مزید مالی تعاون

مرکزی کابینہ نے نیشنل اسپورٹس فیڈریشن اسکیم کو مزید مضبوط بنانے کی بھی منظوری دی ہے۔ اس کے تحت بھارتی کھلاڑیوں اور ٹیموں کو کوچنگ کیمپ، اسپورٹس سائنس ماہرین کی خدمات، جدید آلات، بیرونِ ملک تربیت اور بین الاقوامی مقابلوں میں شرکت کے لیے زیادہ مالی معاونت فراہم کی جائے گی۔حکومت نجی اسپورٹس اکیڈمیوں، کمپنیوں اور دیگر اداروں کے ساتھ شراکت داری کو بھی فروغ دے گی تاکہ ملک میں ایک مضبوط، جدید اور پائیدار کھیلوں کا نظام قائم کیا جا سکے۔

بھارت ایکسپریس اردو۔