Virat Kohli Injury: وراٹ کوہلی کے مداحوں کے لئے بڑی خبر، انگلینڈ کے خلاف دوسرے ون ڈے میں کھیلنے کا حتمی فیصلہ

Virat Kohli Injury: ہندوستانی کرکٹ ٹیم نے انگلینڈ کے خلاف ون ڈے سیریز میں زبردست شروعات کی ہے۔ ٹیم انڈیا نے ناگپور میں کھیلے گئے پہلے ون ڈے میچ میں انگلینڈ کو 4 وکٹوں سے شکست دے دی۔ اس جیت کے باوجود ہر کوئی تھوڑا پریشان تھا کیونکہ اسٹار بلے باز وراٹ کوہلی چوٹ کی وجہ سے یہ میچ نہیں کھیل سکے تھے۔ اب سیریز کا دوسرا میچ اتوار 9 فروری کو کھیلا جانا ہے اور ہر کوئی یہ جاننے کے لیے بے تاب ہے کہ کیا کوہلی اب فٹ ہیں؟ یا وہ اس میچ سے بھی باہر رہیں گے؟ تو اس پر اب سسپنس ختم ہو گیا ہے۔ ٹیم انڈیا اور وراٹ کوہلی کے مداحوں کے لیے راحت کی خبر ہے کیونکہ وراٹ دوسرے میچ کے لیے پوری طرح سے فٹ ہیں اور میدان میں اترنے کے لیے تیار ہیں۔

بھارت اور انگلینڈ کے درمیان تین ون ڈے میچوں کی سیریز کا دوسرا میچ اتوار کو کٹک، اڈیشہ میں کھیلا جائے گا۔ اس میچ کے حوالے سے سب کی نظریں وراٹ کوہلی کی فٹنس پر تھیں۔ کوہلی کا پہلے میچ سے باہر ہونا سب کے لیے حیرانی کا باعث تھا کیونکہ 15 سال سے زائد عرصے سے بین الاقوامی کرکٹ کھیلنے والے اس اسٹار بلے باز نے اپنی بہترین فٹنس برقرار رکھی تھی اور وہ صرف چند ہی میچز سے باہر ہوئے تھے۔ لیکن ان کی خراب فارم اور اچانک انجری کی وجہ سے پہلے میچ سے باہر ہونے نے شائقین کو پریشان کر دیا۔

چیمپئنس ٹرافی سے عین قبل ان کی انجری نے خدشات کو جنم دیا تھا لیکن اب یہ خدشات ختم ہوگئے ہیں کیونکہ سابق بھارتی کپتان اب مکمل طور پر فٹ ہیں۔ دوسرے ون ڈے میچ سے ایک دن پہلے، ہفتہ 8 فروری کو، ٹیم کے بیٹنگ کوچ ستانشو کوٹک نے پریس کانفرنس میں وراٹ کی فٹنس کے بارے میں یہ اہم اپ ڈیٹ دیا۔ کوچ نے کہا کہ وراٹ اب مکمل طور پر فٹ ہیں اور دوسرے میچ کے لیے دستیاب ہیں۔ اس کا مطلب ہے کہ دوسرے ون ڈے میں وراٹ کی پلیئنگ الیون میں واپسی اب یقینی ہے۔ اس میچ کے ساتھ، وراٹ اگست 2024 کے بعد پہلی بار اپنے سب سے مضبوط ون ڈے فارمیٹ میں کھیلتے نظر آئیں گے۔ یہ ان کے لیے چیمپئنس ٹرافی سے قبل تیاری کا اچھا موقع ہے۔

یہ بھی پڑھیں- ICC Champions Trophy, 2025: شعیب اختر نے کی پیشن گوئی ، چیمپئنز ٹرافی 2025 کے سیمی فائنل میں پہنچیں گی یہ 4 ٹیمیں 

کوہلی کی واپسی کے بعد ایک بڑا سوال کھڑا ہو گیا ہے کہ پلیئنگ الیون میں وہ کس کی جگہ لیں گے۔ کوٹک نے اس بارے میں کچھ ظاہر نہیں کیا اور واضح طور پر کہا کہ یہ فیصلہ کوچ اور کپتان کریں گے۔ آخری میچ میں یشسوی جیسوال نے ڈیبیو کیا اور اوپننگ کرنے آئے۔ اس وقت یہ خیال کیا جا رہا تھا کہ کوہلی کی انجری نے ان کے لیے جگہ پیدا کر دی ہے لیکن میچ کے بعد شریئس ایئر نے انکشاف کیا تھا کہ دراصل وہ ناگپور ون ڈے میں نہیں کھیلنے جا رہے تھے لیکن کوہلی کی انجری کی وجہ سے ان کے لیے دروازے کھلے تھے۔ ائیر نے اس میچ میں صرف 30 گیندوں میں دھماکہ خیز نصف سنچری اسکور کی تھی۔ ایسے میں انہیں ہٹانے کا کوئی امکان نہیں ہے جس کی وجہ سے نوجوان اوپنر جیسوال کو جگہ خالی کرنی پڑے گی۔

-بھارت ایکسپریس