Bhuvneshwar Kumar IPL History: آئی پی ایل تاریخ میں چوتھی بار، بھونیشور کمار نے ایک ہی سیزن میں حاصل کیے 20 وکٹ، بڑا ریکارڈ کیا اپنے نام

رائے پور: ہندوستانی تیز گیند باز بھونیشور کمار نے انڈین پریمیئر لیگ میں ایک اور بڑا کارنامہ انجام دیتے ہوئے تاریخ رقم کر دی۔ رائل چیلنجرز بنگلورو کی نمائندگی کرتے ہوئے انہوں نے ممبئی انڈینس کے خلاف شاندار بولنگ کا مظاہرہ کیا اور ایک ہی آئی پی ایل سیزن میں چوتھی مرتبہ 20 وکٹیں حاصل کرنے والے دنیا کے چند منتخب گیند بازوں میں شامل ہوگئے۔ رائے پور کے شہید ویر نارائن سنگھ انٹرنیشنل اسٹیڈیم میں کھیلے گئے میچ میں بھونیشور کمار نے صرف 23 رنز دے کر 4 اہم وکٹیں حاصل کیں۔ اس شاندار کارکردگی کے ساتھ انہوں نے موجودہ سیزن کے 11 میچوں میں مجموعی طور پر 21 وکٹیں مکمل کرلیں۔ اس سے قبل وہ 2014، 2016 اور 2017 کے سیزن میں بھی 20 یا اس سے زیادہ وکٹیں حاصل کرچکے ہیں۔

بھونیشور کمار اب آئی پی ایل کی تاریخ میں سب سے زیادہ بار ایک سیزن میں 20 وکٹیں لینے والے گیند بازوں کی فہرست میں مشترکہ طور پر دوسرے مقام پر پہنچ گئے ہیں۔ انہوں نے اس معاملے میں سری لنکا کے سابق فاسٹ بولر لاستھ ملنگا اور ہندوستانی اسٹار پیسر جسپریت بمراہ کی برابری کرلی ہے۔ ملنگا نے 2011، 2012، 2013 اور 2015 میں یہ کارنامہ انجام دیا تھا، جبکہ بمراہ نے 2017، 2020، 2021 اور 2024 میں ایک سیزن میں 20 سے زائد وکٹیں حاصل کی تھیں۔ اس فہرست میں سرفہرست مقام ہندوستان کے لیگ اسپنر یوزویندر چہل کے پاس ہے، جنہوں نے پانچ مختلف سیزن میں 20 یا اس سے زیادہ وکٹیں حاصل کیں۔ چہل نے 2015، 2016، 2020، 2022 اور 2023 میں یہ ریکارڈ اپنے نام کیا تھا۔

36 سالہ بھونیشور کمار نے اب تک اپنے آئی پی ایل کیریئر میں 201 میچ کھیلے ہیں، جن میں انہوں نے 26.17 کی اوسط سے 219 وکٹیں حاصل کی ہیں۔ اس دوران وہ دو مرتبہ ایک اننگز میں پانچ وکٹیں لینے کا اعزاز بھی حاصل کرچکے ہیں۔ کرکٹ ماہرین کے مطابق بھونیشور کی مستقل مزاجی اور سوئنگ بولنگ کی مہارت انہیں ٹی20 فارمیٹ کے کامیاب ترین گیند بازوں میں شامل کرتی ہے۔ اگر میچ کی بات کی جائے تو ممبئی انڈینز نے پہلے بیٹنگ کرتے ہوئے سات وکٹوں کے نقصان پر 166 رنز بنائے۔ ٹیم کی شروعات اچھی نہیں رہی اور صرف 28 رنز پر تین اہم وکٹیں گرگئیں۔ اس مشکل صورتحال میں نمن دھیر اور تلک ورما نے ذمہ دارانہ بیٹنگ کرتے ہوئے چوتھی وکٹ کے لیے 82 رنز کی اہم شراکت قائم کی۔

نمن دھیر نے 32 گیندوں پر 47 رنز بنائے، جس میں سات چوکے شامل تھے، جبکہ تلک ورما نے 42 گیندوں پر 57 رنز کی عمدہ اننگز کھیلی، جس میں دو چھکے اور تین چوکے شامل تھے۔ ممبئی کی جانب سے راج باوا نے 16 اور ول جیکس نے 10 رنز کا اضافہ کیا۔ آر سی بی کی طرف سے بھونیشور کمار سب سے کامیاب بولر رہے، جبکہ جوش ہیزل ووڈ، راسخ سلام ڈار اور روماریو شیفرڈ نے ایک، ایک وکٹ حاصل کی۔ بھونیشور کی اس شاندار کارکردگی نے نہ صرف آر سی بی کو میچ میں مضبوط پوزیشن دلائی بلکہ انہیں ایک مرتبہ پھر آئی پی ایل کے عظیم بولرز کی صف میں لا کھڑا کیا۔

بھارت ایکسپریس اردو۔