FIFA Knockout Qualification: چار مرتبہ کی عالمی چیمپئن جرمنی کو شکست دے کر ناک آؤٹ مرحلے میں پہنچنے پر ایکواڈور میں چھٹی کا اعلان

نیویارک/نیو جرسی اسٹیڈیم میں کھیلے گئے گروپ ای کے آخری میچ میں ایکواڈور نے شاندار کارکردگی کا مظاہرہ کرتے ہوئے ٹورنامنٹ کا ایک بڑا اپ سیٹ کیا۔ اس تاریخی کامیابی کے بعد صدر نوبوا نے سوشل میڈیا پر ٹیم اور کوچ سبستین بیکاسیسے کو مبارکباد دیتے ہوئے کہا کہ تنقید، مشکلات اور سخت حالات کے باوجود کھلاڑیوں نے ملک کو فخر اور خوشی کا موقع فراہم کیا ہے۔ انہوں نے اپنے پیغام میں کہا ’’تمام کھلاڑیوں اور کوچ کا شکریہ، جنہوں نے ہر مشکل کا سامنا کرتے ہوئے پورے ملک کو یہ عظیم خوشی دی۔ کل عام تعطیل ہوگی۔ زندہ باد ایکواڈور!‘‘

Gracias a los jugadores y al técnico que, a pesar de las críticas, los insultos y los malos ratos que pasaron, lograron recuperarse y darle esta inmensa alegría al país entero.

¡Mañana, feriado!

Viva el Ecuador.

— Daniel Noboa Azin (@DanielNoboaOk) June 25, 2026

جرمنی کی برتری کے باوجود ایکواڈور کی شاندار واپسی

میچ کے آغاز میں پہلے ہی حملے پر جرمنی نے برتری حاصل کر لی۔ فلورین ورٹز کے عمدہ پاس پر لیروئے سانے نے گیند کو جال میں پہنچا کر اپنی ٹیم کو ابتدائی سبقت دلائی۔ اس گول سے قبل ایکواڈور نے دعویٰ کیا کہ جرمن کھلاڑی الیگزانڈر پاولووچ نے پیڈرو ویٹے کے سر پر خطرناک انداز میں پاؤں بلند کیا تھا، تاہم ریفری نے کھیل جاری رکھا۔ ابتدائی جھٹکے کے باوجود ایکواڈور نے ہمت نہیں ہاری اور صرف نویں منٹ میں نیلسن انگولو نے دور سے شاندار شاٹ لگا کر اسکور 1-1 سے برابر کر دیا۔ پہلے ہاف کے اختتام تک دونوں ٹیمیں ایک، ایک گول سے برابر رہیں، جبکہ ایکواڈور نے جارحانہ کھیل اور تیز جوابی حملوں سے جرمنی کو مسلسل دباؤ میں رکھا۔

گونزالو پلاٹا کے فیصلہ کن گول نے تاریخ رقم کر دی

میچ کا فیصلہ کن لمحہ 77ویں منٹ میں آیا، جب دائیں جانب سے ملنے والے کارنر پر کیون روڈریگیز نے ہیڈر کے ذریعے گیند گول کے سامنے پہنچائی، جہاں گونزالو پلاٹا نے دفاعی کھلاڑیوں سے پہلے گیند کو جال میں پہنچا کر ایکواڈور کو 2-1 کی برتری دلا دی۔ گول کے بعد ایکواڈور کے کھلاڑیوں، کوچنگ اسٹاف اور شائقین خوشی سے جھوم اٹھے۔ آخری لمحات میں جرمنی نے برابر کرنے کی بھرپور کوشش کی، لیکن ایکواڈور کے دفاع نے ثابت قدمی کا مظاہرہ کرتے ہوئے ہر حملہ ناکام بنا دیا۔ سات منٹ کے اضافی وقت کے بعد اختتامی سیٹی بجتے ہی ایکواڈور نے 2-1 سے تاریخی فتح اپنے نام کر لی اور ورلڈ کپ کی تاریخ میں صرف دوسری مرتبہ گروپ مرحلے سے ناک آؤٹ مرحلے کے لیے کوالیفائی کیا۔ اس سے قبل ایکواڈور نے 2006 کے ورلڈ کپ میں بھی یہ کارنامہ انجام دیا تھا۔

بھارت ایکسپریس اردو۔