IND vs BAN Test Series: بنگلہ دیش کو اب ’انڈر ڈاگ‘ ٹیم نہیں کہا جا سکتا: میچ سے پہلے آر اشون نے اپنے خیالات کا کیا اظہار

چنئی: راولپنڈی میں پاکستان کو 2-0 سے شکست دینے کے بعد بنگلہ دیش کی ٹیم بھارت کے خلاف دو میچوں کی ٹیسٹ سیریز میں میدان میں ہے۔ اس پر سینئر ہندوستانی آف اسپنر روی چندرن اشون نے کہا کہ اب انہیں کوئی انڈر ڈاگ نہیں کہہ سکتا۔

اشون نے میچ سے پہلے کی بات چیت میں کہا، ’’مجھے نہیں معلوم کہ ہمارے ڈریسنگ روم میں اس پر کتنی توجہ دی گئی۔ لیکن یقینی طور پر بنگلہ دیش نے اپنی طاقت دکھائی ہے۔ وہ ایک ابھرتی ہوئی ٹیم ہے۔ پاکستان کے خلاف ان کی جیت تاریخی تھی۔ میں نے ان میں سے کچھ کلپس دیکھی۔ بنگلہ دیشی کرکٹ ٹیم کے لیے ایک بڑی کامیابی تھی کیونکہ انہوں نے بہت کچھ جھیلا ہے۔

اشون نے کہا، ’’میں ان لوگوں میں سے ہوں جو انڈر ڈاگ کو کھیلتے ہوئے دیکھنا پسند کرتے ہیں۔ اب آپ انہیں انڈر ڈاگ نہیں کہہ سکتے کیونکہ وہ اب زبردست کرکٹ کھیل رہے ہیں۔ پچھلی بار جب ہم بنگلہ دیش میں تھے تو انہوں نے ہمیں چیلنج کیا تھا۔ میں ایک اچھی سیریز کا انتظار کر رہا ہوں۔‘‘

اشون کو یہ بھی لگتا ہے کہ چیپاک کی سرخ مٹی کی پچ کھیل کے تمام پہلوؤں پر ہندوستان اور بنگلہ دیش دونوں کا امتحان لے گی۔ انہوں نے کہا کہ ہم نے اب تک جتنے بھی ٹیسٹ میچ کھیلے ہیں ان میں انگلینڈ کے خلاف کم اسکور والے میچ کو چھوڑ کر بلے بازوں نے عام طور پر بہت زیادہ رنز بنائے ہیں، آسٹریلیا کے خلاف میچ 500 سے زائد اسکور والی وکٹ تھی۔

انہوں نے کہا، ’’یہ ٹیسٹ میچ کے لیے ہمیشہ اچھی پچ رہی ہے۔ ہم ایک بار پھر سرخ مٹی کی پچ پر کھیلنے جا رہے ہیں۔ اس میں کافی اچھال ہوگا، لیکن یہ گیند بازوں کے لیے بھی کارآمد ثابت ہوگا۔ کھیل کے تمام پہلواس میں شامل ہوں گے۔‘‘

چنئی کے رہنے والے اشون حال ہی میں 38 سال کے ہوئے ہیں اور ان کا ماننا ہے کہ سخت محنت انہیں ٹیسٹ میچوں میں اچھی کارکردگی کا مظاہرہ کرنے میں مدد دیتی ہے۔ اشون نے کہا، ’’جب میں میدان پر آتا ہوں تو جوش اور تمنا ہمیشہ ایک جیسی رہتی ہے۔ کرکٹ ایک ایسا کھیل ہے جس سے مجھے بے حد پیار ہے۔ میں نے میدان میں گزارے ہر لمحے کا لطف اٹھایا ہے۔ لیکن عمر ایک نمبر ہے اور آپ اسے کیسے دیکھتے ہیں یہ بھی اہمیت رکھتا ہے۔‘‘

بھارت ایکسپریس۔