IND vs BAN: بنگلہ دیش کے وہ گیند باز جنہوں نے انڈیا کے خلاف لئےسب سے زیادہ ٹیسٹ وکٹ ، ٹیم انڈیا میں ظہیر خان ہیں نمبر ون

ہندوستان  اور بنگلہ دیش کے درمیان دو ٹیسٹ میچوں کی سیریز کا آغاز 19 ستمبر سے چنئی کے ایم اے چدمبرم سٹیڈیم میں ہونے جا رہا ہے۔ اس سیریز میں جہاں انڈین کرکٹ ٹیم طویل وقفے کے بعد ٹیسٹ میچوں میں واپسی کرے گی وہیں بنگلہ دیش کی ٹیم پاکستان کو اس کی ہی سرزمین پر دو میچوں کی ٹیسٹ سیریز میں کلین سویپ کرنے کے بعد واپس آرہی ہے۔ بنگلہ دیش کو فارم کی بنیاد پر ہلکا نہیں لیا جا سکتا۔ مجموعی طور پر سیریز کے دلچسپ ہونے کی امید ہے۔

چنئی کی پچ اسپن کے لیے بہت مددگار رہی ہے۔ توقع ہے کہ اس سیریز میں اسپنرز حاوی رہیں گے۔ اگر ہم ہندوستان کے خلاف بنگلہ دیش کی جانب سے سب سے زیادہ وکٹیں لینے والے بولر کی بات کریں تو اسپنرز کا غلبہ ہے۔ اس معاملے میں اسٹار آل راؤنڈر اور بنگلہ دیش کرکٹ ٹیم کے سابق کپتان شکیب الحسن پہلے نمبر پر ہیں جنہوں نے  ہندوستان کے خلاف 8 ٹیسٹ میچوں میں 37.95 کی اوسط سے سب سے زیادہ 21 وکٹیں حاصل کی ہیں۔

دوسرے نمبر پر بائیں ہاتھ کے سابق اسپنر محمد رفیق کا نام آتا ہے جنہوں نے ہندوستان کے خلاف 5 ٹیسٹ میچوں میں 46.40 کی اوسط سے 15 وکٹیں حاصل کیں۔ تیسرے نمبر پر آل راؤنڈر مہدی حسن معراج ہیں جنہوں نے ہندوستان  کے خلاف 5 ٹیسٹ میچوں میں 45.71 کی اوسط سے 14 وکٹیں حاصل کیں۔ فاسٹ بولر شہادت حسین بھی اس فہرست میں شامل ہیں جنہوں نے 3 میچوں میں 26.75 کی اوسط سے 12 وکٹیں حاصل کیں۔ دلچسپ بات یہ ہے کہ سابق فاسٹ بولر شہادت کی اوسط اسپنرز سے بہتر ہے۔

بنگلہ دیش کے سابق کپتان اور تیز گیند باز مشرفی مرتضیٰ نے ہندوستان  کے خلاف 4 میچوں میں 38 کی اوسط سے 11 وکٹیں حاصل کیں۔ یہ اعداد و شمار بتاتے ہیں کہ بنگلہ دیش کی بولنگ ہندوستان کے خلاف زیادہ کارکردگی نہیں دکھا سکی۔ نہ تو ان کے اسپنر اور نہ ہی ان کے تیز گیند باز زیادہ اثر ڈال سکے۔ ہندوستان کی بات کریں تو بنگلہ دیش کے خلاف سب سے زیادہ ٹیسٹ وکٹیں لینے کا ریکارڈ سابق فاسٹ بولر ظہیر خان کے نام ہے جنہوں نے 7 میچوں میں 24.25 کی اوسط سے 31 وکٹیں حاصل کیں۔

بنگلہ دیش کرکٹ ٹیم کی جانب سے سب سے زیادہ وکٹیں لینے والے بولر کی بات کریں تو یہ شکیب الحسن ہیں جنہوں نے 69 ٹیسٹ میچوں میں 31.31 کی اوسط سے 242 وکٹیں حاصل کیں۔ تاہم شکیب اس وقت اپنے ٹیسٹ کیریئر کے بہترین مرحلے میں نہیں ہیں۔ انہوں نے حال ہی میں ٹیسٹ میچ کھیلنے کے حوالے سے اپنے عزم کا اظہار کیا ہے۔ ہندوستان کے خلاف دورے پر ان کی کارکردگی مہمان ٹیم کے لیے بہت معنی رکھتی ہے۔ اعداد و شمار پر نظر ڈالی جائے تو واضح ہوتا ہے کہ بنگلہ دیش کو بھارت کے خلاف سخت چیلنج کا سامنا ہے۔ تاہم پاکستان کے خلاف فتح ان کے لیے بڑا حوصلہ ثابت ہوئی ہے۔