Jammu Kashmir Encounter: کپواڑہ میں دراندازی کی کوشش کرنے والے دو دہشت گرد ہلاک، علاقے میں سرچ آپریشن جاری

جموں و کشمیر کے کپواڑہ میں سیکورٹی فورسز نے دہشت گردوں کی دراندازی کی کوشش کو ناکام بنا دیا۔ سیکیورٹی فورسز نے دو دہشت گردوں کو ہلاک کردیا۔ فی الحال سیکورٹی فورسز نے علاقے کو گھیرے میں لے لیا ہے اور سرچ آپریشن جاری ہے۔ سیکورٹی فورسز کو خدشہ ہے کہ یہاں مزید دہشت گرد چھپے ہو سکتے ہیں۔

دہشت گردوں اور سیکورٹی فورسز کے درمیان مقابلہ

کپواڑہ میں دہشت گردوں کی دراندازی کی خفیہ اطلاع ملنے کے بعد جموں و کشمیر پولیس اور ہندوستانی فوج نے 4 اکتوبر 2024کو مشترکہ طور پر ضلع میں تلاشی مہم شروع کی۔ مشتبہ سرگرمی کا پتہ چلنے پر دہشت گردوں اور سیکورٹی فورسز کے درمیان تصادم ہوا۔

جموں و کشمیر کے کشتواڑ ضلع میں جمعہ کو ہی سیکورٹی فورسز اور دہشت گردوں کے درمیان فائرنگ ہوئی تھی۔ حکام نے بتایا کہ دہشت گردوں کے بارے میں خفیہ اطلاع ملنے کے بعد سیکورٹی فورسز نے ضلع کشتواڑ کے چترو گاؤں میں مشترکہ تلاشی آپریشن شروع کیا تھا۔

بارودی سرنگ دھماکے میں فوج کے دو جوان زخمی

جموں و کشمیر کے کپواڑہ ضلع میں لائن آف کنٹرول (ایل او سی) کے قریب جمعہ کو بارودی سرنگ کے دھماکے میں دو فوجی زخمی ہو گئے۔ دونوں فوجیوں کو ڈرگمولہ کے آرمی اسپتال میں داخل کرایا گیا ہے۔ آرمی کی سکھ رجمنٹ کے سپاہیوں کا ایک گروپ ایل او سی پر گشت کر رہا تھا۔

جموں و کشمیر کے اسمبلی انتخابات بغیر کسی تشدد اور خونریزی کے پرامن طریقے سے ہوئے۔ انتخابات کے دوران سرحد پار سے کسی بھی سازش کو ناکام بنانے کے لیے سیکورٹی فورسز کی اضافی تعیناتی کی گئی تھی۔ اس سے قبل 28 ستمبر کو کٹھوعہ ضلع میں سیکورٹی فورسز اور دہشت گردوں کے درمیان تصادم ہوا تھا ،جس میں جموں و کشمیر پولیس کے ہیڈ کانسٹیبل بشیر احمد مارے گئے تھے۔ اس تصادم کے اگلے دن سیکورٹی فورسز نے ایک دہشت گرد کو مار گرایا۔

گزشتہ ہفتے ہفتہ (28 ستمبر 2024) کو کولگام کے اڈیگام دیوسر علاقے میں ایک انکاؤنٹر ہوا۔ اس میں سیکورٹی فورسز نے دو دہشت گردوں کو مار گرایا، جب کہ فائرنگ میں چار فوجی اہلکار اور کولگام اے ایس پی زخمی ہوئے۔

بھارت ایکسپریس