Madhya Pradesh: مدھیہ پردیش کے نیمچ ضلع میں ہنومان مندر میں آرام کر رہے تین جین بھکشوؤں پر کیا گیا حملہ، پولیس نے چھ نوجوانوں کو کیا گرفتار

مغربی مدھیہ پردیش کے نیمچ ضلع میں مدھیہ پردیش-راجستھان سرحد کے ایک گاؤں کے ہنومان مندر میں آرام کر رہے تین جین بھکشوؤں پر 13 اپریل کو مبینہ طور پر سماج دشمن عناصر نے حملہ کر دیا۔ اس واقعے نے راجستھان کے چتور گڑھ ضلع کے ساتھ ریاست کی سرحد کے قریب نیمچ ضلع کے سنگولی قصبے کے رہائشیوں کے احتجاج کو جنم دیا ہے۔ پولیس نے فوراً کارروائی کرتے ہوئے اس حملے میں ملوث چھ نوجوانوں کو گرفتار کر لیا ہے۔

یہ واقعہ 13 اپریل کی رات تقریباً 11 بجے نیمچ ضلع کے سنگولی علاقے کے کچلا گاؤں میں پیش آیا، جہاں تین ادھیڑ عمر کے جین بھکشو راجستھان کے لیے اپنا سفر جاری رکھنے سے پہلے گاؤں کے مندر کے اندر آرام کر رہے تھے۔ اسی وقت چھڑیوں اور لاٹھیوں سے مسلح نوجوانوں کے ایک گروپ نے، جن کی عمر 16 سے 20 کے درمیان بتائی جا رہی ہے، تینوں بھکشوؤں پر حملہ کیا اور ان کے کپڑے تک پھاڑ ڈالے۔

حملہ آوروں کا تعلق راجستھان کے چتور گڑھ سے ہے

مدد کے لیے بھکشوؤں کی پکار سن کر گاؤں والے موقع پر پہنچے، لیکن تب تک حملہ آور وہاں سے جا چکے تھے۔ مخصوص اطلاعات کی بنیاد پر کارروائی کرتے ہوئے پولیس کی ایک ٹیم نے چند گھنٹوں بعد ملزمین کا سراغ لگایا۔ دی نیو انڈین ایکسپریس کی خبر کے مطابق نیمچ کے ضلع پولیس سپرنٹنڈنٹ انکت جیسوال نے بتایا ’’تمام چھ ملزمان، جن میں ایک 16 سالہ نوجوان بھی شامل ہے، کو گرفتار کر لیا گیا ہے۔ ان سبھی کا تعلق راجستھان کے چتور گڑھ ضلع سے ہے۔ ان پر بی این ایس کی اہم دفعات کے تحت مقدمہ درج کیا گیا ہے اور انھیں عدالت میں پیش کیا جائے گا۔ ہم یہ جاننے کے لیے بھی کام کر رہے ہیں کہ آیا وہ ماضی میں بھی مجرمانہ واقعات میں ملوث رہے ہیں یا نہیں۔‘‘

اطلاعات کے مطابق گرفتار کیے گئے ملزمان میں سے ایک کی عمر 16 سال ہے اور باقی پانچ (20 کی دہائی کے اوائل میں) ہیں اور ان کی گنپت نائک، گوپال بھوئی، کنہیا لال بھوئی، راجو بھوئی اور بابو شرما کے طور پر کی گئی ہے، جو سبھی راجستھان کے چتور گڑھ ضلع کے رہنے والے ہیں۔حملے میں زخمی ہونے والے تینوں جین بھکشوؤں کو دھرم شالہ منتقل کر دیا گیا ہے۔ دریں اثنا اس واقعے سے ناراض مقامی باشندوں نے 14 اپریل کو سنگولی شہر میں بند کا اعلان کر دیا تھا، تاہم پولیس کی کارروائی اور ضلع کلکٹر اور ایس پی کے ساتھ میٹنگ کے بعد بند واپس لے لیا گیا۔

بھارت ایکسپریس اردو