Kairav ​​Gandhi recovered safely: جمشیدپور سے 14 دن قبل اغوا ہونے والے نوجوان صنعت کار کیروو گاندھی بحفاظت برآمد، بہار-جھارکھنڈ سرحد پر ہوئی رہائی

جمشیدپور: جمشیدپور کے معروف صنعت کار دیوانگ گاندھی کے 24 سالہ بیٹے کَیرو گاندھی کو اغوا کے 14 دن بعد اغواکاروں کے چنگل سے بحفاظت آزاد کرا لیا گیا ہے۔ وہ منگل کی صبح تقریباً 4:30 بجے جمشیدپور میں واقع اپنے گھر پہنچ گئے۔ پولیس کے مطابق، انہیں جھارکھنڈ کے ہزاری باغ اور بہار کے گیا کی سرحد کے درمیان سے برآمد کیا گیا۔

جمشیدپور کے ایس ایس پی پیوش پانڈے نے تاجر کے بیٹے کی بحفاظت بازیابی کی تصدیق کرتے ہوئے کہا کہ پولیس کی اولین ترجیح متاثرہ شخص کی سلامتی تھی، جس میں کامیابی حاصل ہوئی ہے۔ انہوں نے بتایا کہ مجرموں کی شناخت اور گرفتاری کے لیے چھاپہ ماری اور تکنیکی جانچ مسلسل جاری ہے۔ پولیس اس معاملے کو مکمل طور پر سلجھانے کے لیے ہر پہلو سے تفتیش کر رہی ہے۔

جمشیدپور کے سی ایچ علاقے میں رہنے والے کیرو گاندھی کو 13 جنوری کو دن کے 11:30 بجے سے 1 بجے کے درمیان اس وقت اغوا کیا گیا تھا، جب وہ اپنی کریٹا کار سے گھر سے نکلے تھے۔ انہوں نے اہل خانہ کو بتایا تھا کہ وہ پہلے شہر کے بستی پور واقع اسٹیٹ بینک آف انڈیا جائیں گے، اس کے بعد آدتیہ پور میں اپنی کمپنی پہنچیں گے اور دوپہر کے کھانے کے لیے گھر واپس آ جائیں گے۔

دوپہر 1:45 بجے تک ان کے گھر نہ لوٹنے اور موبائل فون بند ملنے پر ان کی تلاش شروع کی گئی۔ کچھ ہی دیر بعد اہل خانہ کو ایک غیر ملکی نمبر سے فون آیا، جس میں کیرو گاندھی کے اغوا کی اطلاع دیتے ہوئے پانچ کروڑ روپے تاوان کا مطالبہ کیا گیا۔ بعد میں یہ مطالبہ بڑھ کر دس کروڑ روپے تک پہنچنے کی اطلاعات بھی سامنے آئیں۔

تشکیل دی گئی سات ایس آئی ٹی ٹیم

معاملے کی سنگینی کو دیکھتے ہوئے پولیس نے سات خصوصی تفتیشی ٹیمیں (ایس آئی ٹی) تشکیل دی تھیں۔ یہ ٹیمیں جھارکھنڈ کے علاوہ بہار، مغربی بنگال اور اوڈیشہ میں مسلسل چھاپہ مار کارروائیاں کر رہی تھیں۔ اس دوران جھارکھنڈ کی پولیس ڈائریکٹر جنرل (ڈی جی پی) تداشا مشرا دو دن قبل خود جمشیدپور پہنچیں اور کیرو گاندھی کے اغوا کے معاملے میں کارروائی اور تفتیش کی پیش رفت کا جائزہ لیا تھا۔

کیسے ہوئی کیرو گاندھی کی رہائی؟

بہر حال، کیرو گاندھی کی بحفاظت واپسی سے پورے شہر نے راحت کی سانس لی ہے۔ فی الحال یہ واضح نہیں ہو سکا ہے کہ کیرو گاندھی کی رہائی مکمل طور پر پولیس کارروائی کا نتیجہ ہے یا اہل خانہ کی کوششوں سے یہ ممکن ہو سکا۔ پولیس جلد ہی پریس کانفرنس کے ذریعے پورے معاملے کا انکشاف کر سکتی ہے۔

بھارت ایکسپریس