Anant Singh News: کیا اننت سنگھ نے خود پر چلوائی گولی، ڈی سی پی راکیش کمار کے بیان سے مچا ہڑکمپ

پٹنہ: بہار کے مکامہ کے سابق ایم ایل اے اننت سنگھ پر بدھ کے روز فائرنگ کا واقعہ پیش آیا، جس کی وجہ سے پورے علاقے میں کشیدگی پھیل گئی۔ فائرنگ کے اس واقعہ میں سونو-مونو گروپ کے ملوث ہونے کی جانکاری ملی ہے۔ اس فائرنگ میں کسی جانی نقصان کی کوئی اطلاع نہیں ہے۔ پولیس نے موقع پر پہنچ کر تفتیش شروع کر دی اور جائے وقوعہ سے تین کھوکھے برآمد کیے ہیں۔ پٹنہ کے ایس ایس پی آکاش کمار نے آئی اے این ایس کو بتایا کہ پولیس معاملے کی جانچ کر رہی ہے اور جلد ہی پٹنہ رورل ایس پی اس پر پوری معلومات دیں گے۔

باڑھ کے ڈی ایس پی راکیش کمار نے کہا کہ کچھ دیر پہلے ہمیں اطلاع ملی کہ یہاں فائرنگ ہو رہی ہے۔ اطلاع ملتے ہی تھانہ صدر فوری موقع پر پہنچ گئے اور ہم بھی یہاں آگئے۔ اطلاع ملی ہے کہ یہاں فائرنگ کا واقعہ پیش آیا ہے جس میں تین کھوکھے برآمد ہوئے ہیں۔ جن کے گھروں پر گولیاں چلائی گئیں ان کی جانب سے بھی درخواست دی گئی ہے۔ ہم اس میں ملوث تمام لوگوں کی شناخت کر رہے ہیں اور درخواست کی بنیاد پر کارروائی کی جائے گی۔

انہوں نے مزید کہا کہ یہاں کے لوگوں کے مطابق سابق ایم ایل اے اپنے حامیوں کے ساتھ آئے تھے۔ بتایا جا رہا ہے کہ سابق ایم ایل اے اور ان کے حامیوں نے فائرنگ کی۔ ہم اس حوالے سے ثبوت اکٹھے کر رہے ہیں، جو بھی حقائق سامنے آئیں گے اس کی بنیاد پر کارروائی کی جائے گی۔ ہم ان لوگوں کی شناخت کر رہے ہیں جنہوں نے گولیاں چلائیں اور جو بھی ملوث پایا جائے گا اس کے خلاف سخت کارروائی کی جائے گی۔

بتایا جا رہا ہے کہ سونو-مونو گینگ نے گاؤں کے ایک خاندان کو بری طرح مارا پیٹا اور گھر سے باہر پھینک دیا اور گھر کو تالا بھی لگا دیا۔ اس واقعہ کی اطلاع ملتے ہی اننت سنگھ متاثرہ کے اہل خانہ سے ملنے پہنچے تو ان پر گولی چلائی گئی۔

فائرنگ کے بعد سونو-مونو گروپ کے ارکان موقع سے فرار ہوگئے۔ اس کے علاوہ ایک متاثر خاندان نے اس واقعے کے حوالے سے پولیس کو درخواست دی ہے اور پولیس اب ملزمان کی شناخت اور کارروائی میں مصروف ہے۔ واقعہ کے بعد نورنگا گاؤں میں پولیس کی بھاری پہرا ہے اور کئی تھانوں کی پولیس تعینات ہے۔

یہ بھی پڑھیں: اننت کمار سنگھ پر فائرنگ، جانئے کس گینگ نے واردات کو دیا انجام

اننت سنگھ جو پانچ ماہ قبل جیل سے رہا ہوئے تھے، انہیں 14 اگست 2024 کو پٹنہ ہائی کورٹ نے اے کے 47 اور بلٹ پروف جیکٹ کیس میں بری کر دیا تھا، جس کے بعد وہ 16 اگست 2024 کو جیل سے باہر آئے تھے۔

بھارت ایکسپریس۔