Crime Radhika Yadav murder case: عزت کے نام پر قتل، ٹینس کھلاڑی رادھیکا قتل کیس میں والد دیپک یادو واحد ملزم، گروگرام پولیس نے 254 صفحات پر مشتمل جمع کرائی چارج شیٹ

’مجھ پر بیٹی کی کمائی کھانے کا طعنہ دیا جاتا تھا، لوگ بیٹی کے کردار پر سوال اٹھاتے تھے، اسی لیے میں نے گولی مار کر بیٹی کا قتل کر دیا‘۔ یہ اعتراف رادھیکا یادو کے والد دیپک یادو نے پولیس کے سامنے کیا ہے۔ دراصل گروگرام کی مشہور ٹینس کھلاڑی رادھیکا قتل کیس میں گروگرام پولیس نے ایک بڑا انکشاف کیا ہے۔ پولیس نے رادھیکا قتل کیس میں رادھیکا کے والد کے خلاف 254 صفحات پر مشتمل چارج شیٹ عدالت میں پیش کی ہے، جس میں قتل کی وجوہات کی تفصیل شامل ہے۔

کیا ہے معاملہ ؟

گروگرام کے سیکٹر 57 میں دیپک یادو اپنی بیٹی رادھیکا یادو کے ساتھ رہتے تھے۔ 10 جولائی کو دیپک یادو نے اپنی بیٹی کو گولی مار کر قتل کر دیا۔ واقعے کی اطلاع ملتے ہی پولیس موقع پر پہنچی اور دیپک یادو کو گھر سے گرفتار کر لیا۔ پولیس نے قتل میں استعمال ہونے والا ہتھیار بھی برآمد کر لیا تھا۔

254 صفحات پر مشتمل چارج شیٹ

پولیس کی تفتیش میں یہ بات سامنے آئی ہے کہ دیپک یادو نے ’خاندان کی عزت بچانے‘ کے نام پر رادھیکا کو قتل کیا۔ پولیس نے عدالت میں 254 صفحات کی چارج شیٹ فائل کی ہے جس میں دیپک یادو کو اس کیس کا واحد ملزم قرار دیا گیا ہے۔

طویل عرصے سے جاری تنازع

چارج شیٹ کے مطابق دیپک یادو اور ان کی بیٹی رادھیکا کے درمیان کافی عرصے سے جھگڑے چل رہے تھے۔ دیپک یادو اکثر رادھیکا کو باہر جانے یا کوچنگ میں شرکت کرنے سے روکتے تھے، جس کی وجہ سے دونوں کے درمیان تعلقات مزید خراب ہو گئے۔ یہی کشیدگی آخرکار قتل کی وجہ بنی۔ ملزم نے پولیس کو بتایا کہ اُس کے گاؤں کے لوگ اکثر اسے طعنے دیتے تھے کہ وہ اپنی بیٹی کی کمائی پر گزارہ کر رہا ہے۔ لوگ اس کی بیٹی کے کردار پر بھی انگلی اٹھاتے تھے، جس کی وجہ سے اس کی عزت مسلسل خراب ہو رہی تھی۔ معاشرے میں خاندان کی عزت بچانے کے لیے اُس نے یہ خوفناک قدم اٹھایا۔

بھارت ایکسپریس اردو۔