Chhattisgarh Anti Naxal Operation: چھتیس گڑھ میں 10 سال کی سب سے بڑی کارروائی، 29 نکسلائیٹ مارے گئے

  چھتیس گڑھ میں نکسلیوں کے خلاف شروع کی گئی مہم کے ایک حصے کے طور پر سیکورٹی فورسز نے 16 اپریل کو سب سے بڑی کارروائی کی اور کانکیر کے علاقے میں ایک انکاؤنٹر میں 29 نکسلیوں کو ہلاک کر دیا۔ ان تمام ماؤنوازوں کی لاشیں بھی برآمد کی گئیں۔ پولیس کا کہنا ہے کہ سرچ آپریشن جاری ہونے کے باعث یہ تعداد بڑھ سکتی ہے۔

اس تصادم میں بارڈر سیکورٹی فورس (بی ایس ایف) کے دو سپاہیوں اور ریاستی پولیس کے ایک ڈسٹرکٹ ریزرو گارڈ (ڈی آر جی) کے اہلکاروں سمیت تین سیکورٹی اہلکار بھی زخمی ہوئے۔ سیکورٹی فورسز کے مطابق اگر مارے جانے والے نکسلیوں کی تعداد 30 سے ​​تجاوز کر جاتی ہے۔تو یہ گزشتہ 10 سالوں میں فورس کی طرف سے کی جانے والی سب سے بڑی کارروائی ہوگی۔ اس سے قبل گرے ہاؤنڈ کمانڈوز نے 2016 میں ایک آپریشن میں 30 نکسلیوں کو ہلاک کیا تھا۔ 2021 میں ایک اور آپریشن میں نکسلائیٹ لیڈر ملند تلٹمبڈے 25 دیگر افراد کے ساتھ مارے گئے تھے۔

اپنی نوعیت کا منفرد آپریشن

یہ پہلا آپریشن ہوگا جس میں بڑی تعداد میں نکسلائیٹس کو ختم کیا گیا اور سیکورٹی فورسز کی جانب سے کوئی جانی نقصان نہیں ہوا۔ چھتیس گڑھ پولیس نے کہا، “16 اپریل کو کانکیر ضلع کے چھوٹابیٹیا تھانے کے سرحدی علاقے میں کانکیر ڈی آر جی اور بی ایس ایف کی مشترکہ ٹیم نے تلاشی مہم شروع کی تھی۔ “دوپہر کے قریب 2 بجےچھوٹے بیٹیہ تھانہ علاقہ کے بیناگونڈا -کوراگٹہ جنگلات کے قریب ماؤنوازوں اور سیکورٹی فورسز کے درمیان فائرنگ ہوئی۔”

انہوں نے مزید کہا، “انکاؤنٹر کے بعد علاقے کی تلاشی لی گئی اور موقع سے 29 نکسلیوں کی لاشیں، بھاری مقدار میں اے کے 47 رائفلیں، INSAS، SLR/Carbine، 303 رائفلیں اور بھاری مقدار میں اسلحہ اور گولہ بارود برآمد کیا گیا۔ آپریشن میں تین فوجی زخمی بھی ہوئے ہیں لیکن وہ خطرے سے باہر ہیں۔

25 لاکھ کا انعام رکھنے والا نکسلی بھی مارا گیا

حکام نے بتایا کہ اب تک 3 SLRs، 1 AK-47، 2 پستول اور 2 INSAS برآمد کیے گئے ہیں۔ پولیس کے مطابق سرکردہ نکسلائٹ شنکر راؤ، جس کے سر پر 25 لاکھ روپے کا انعام تھا، اور للیتا (دونوں ڈی وی سی ایم، شمالی بستر ڈویژن) بھی آپریشن میں مارے گئے۔ بستر کے آئی جی پی سندرراج کے مطابق یہ علاقے میں نکسل مخالف سب سے بڑی کارروائیوں میں سے ایک ہے۔ اس انکاؤنٹر کے بعداس سال اب تک کانکیر سمیت سات اضلاع پر مشتمل بستر خطہ میں سیکورٹی فورسز کے ساتھ الگ الگ انکاؤنٹر میں 79 نکسلائیٹس مارے جاچکے ہیں۔

بھارت ایکسپریس