Train Accident: بالاسور کے بعد اب اڈیشہ کے جاج پور میں حادثہ، ٹرین کی زد میں آکر 6 مزدور ہلاک

Train Accident:  اڈیشہ کے بالاسور ضلع میں ہولناک ٹرین حادثے کے بعد اب جاج پور میں بھی بڑا حادثہ ہوا ہے۔ اس حادثے میں 6 لوگوں کی موت ہو گئی ہے۔ اس کے ساتھ ہی آسام میں بھی ایک مال ٹرین پٹری سے اتر گئی ہے۔ ریلوے اہلکار نے بدھ (7 جون) کو بتایا کہ آسام کے کامروپ ضلع میں مال ٹرین پٹری سے اتر گئی۔ کسی کے زخمی ہونے کی کوئی اطلاع نہیں ہے۔ اس حادثے میں بوکو کے قریب سنگرا میں کوئلے سے لدی ٹرین کی 20 بوگیاں پٹری سے اتر گئیں۔

اس کے علاوہ بدھ کو اڈیشہ کے جاج پور روڈ ریلوے اسٹیشن پر مال ٹرین کی زد میں آکر چھ مزدوروں کی موت ہوگئی۔ اس حادثے میں دو دیگر افراد شدید زخمی ہوئے ہیں۔ خبر رساں ادارے پی ٹی آئی کے مطابق شدید بارش سے بچنے کے لیے مزدوروں نے کھڑی مال ٹرین کے نیچے پناہ لی تھی کہ اچانک مال ٹرین بغیر انجن کے چلنے لگی اور مزدوروں کو اس کے نیچے سے نکلنے کا موقع نہیں ملا۔

اڈیشہ میں ایک بار پھر ٹرین حادثہ

ریلوے کے ترجمان نے بتایا کہ اچانک طوفان آیا۔ مزدور ملحقہ ریلوے لائن پر کام کر رہے تھے جہاں ایک مال گاڑی کھڑی تھی۔ انہوں نے اس کے نیچے پناہ لی لیکن بدقسمتی سے مال ٹرین جس کا انجن نہیں تھا وہ چلنے لگی جس کی وجہ سے حادثہ پیش آیا۔ اڈیشہ کے وزیر اعلی نوین پٹنائک نے اس حادثے پر افسوس کا اظہار کیا ہے۔ انہوں نے کہا کہ جاج پور روڈ اسٹیشن ٹرین حادثہ کی خبر افسوسناک ہے۔ جاں بحق ہونے والوں کے اہل خانہ سے تعزیت اور تمام زخمیوں کی جلد صحت یابی کی دعا۔

جھارکھنڈ میں ٹلا بڑا حادثہ

دوسری طرف، جھارکھنڈ کے بوکارو میں منگل کو سنتھلڈیہ ریلوے کراسنگ کے قریب ایک بڑا ریل حادثہ ٹل گیا۔ پی ٹی آئی کے مطابق ایک ٹریکٹر کراسنگ کے قریب ریلوے پھاٹک سے ٹکرا گیا جب نئی دہلی بھونیشور راجدھانی ایکسپریس وہاں سے گزر رہی تھی تاہم ٹرین کے ڈرائیور کے بروقت بریک لگانے سے بڑا حادثہ ٹل گیا۔ یہ حادثہ سنتھلڈیہ ریلوے کراسنگ پر بھجوڈیہ ریلوے اسٹیشن کے قریب پیش آیا۔

-بھارت ایکسپریس