UP Nikay Chunav: سلطان پور میں بچوں کے ساتھ انتخابی مہم چلانے پر عام آدمی پارٹی مشکل میں، ڈی ایم نے ایس ڈی ایم اور سی او سٹی کو سونپی تحقیقات

UP Nikay Chunav:  اتر پردیش کے سلطان پور میں عام آدمی پارٹی مشکل میں دکھائی دے رہی ہے۔ یہاں پارٹی پر نابالغ بچوں کو پارٹی کی مہم چلانے کا الزام لگایا گیا ہے۔ اس معاملے میں ویڈیو اور تصویر منظر عام پر آنے کے بعد ضلع مجسٹریٹ نے پورے معاملے کی جانچ شروع کر دی ہے۔

ڈی ایم نے انتخابی مہم میں بچوں کے شامل ہونے پر پابندی لگا دی تھی۔ AAP کے راجیہ سبھا ایم پی سنجے سنگھ کے روڈ شو میں بچوں نے حصہ لیا تھا۔ اس کا ویڈیو منظر عام پر آنے کے بعد ڈی ایم نے مقدمہ درج کرنے کا حکم دیا ہے۔

سنجے سنگھ بلدیاتی انتخابات کے دوسرے مرحلے کی مہم کے لیے سنیچر کو سلطان پور پہنچے۔ سنجے سنگھ نے ہفتہ کی شام میونسپلٹی ایریا میں AAP امیدوار ڈاکٹر سندیپ شکلا کی حمایت میں روڈ شو کیا۔ اس معاملے میں سوشل میڈیا پر ایک ویڈیو بھی وائرل ہو رہا ہے، جس میں دیکھا جا سکتا ہے کہ بڑی تعداد میں نابالغ بچے AAP کا جھنڈا اور ہاتھوں میں ٹوپیاں لے کر قافلے کے آگے چل رہے ہیں اور بچے نعرے بھی لگا رہے ہیں۔

ان بچوں کی عمریں 8 سے 12 سال کے درمیان بتائی جا رہی ہے۔ اس کا ویڈیو سوشل میڈیا پر وائرل ہونے کے بعد ڈی ایم جسجیت کور نے اس کا نوٹس لیا اور معاملے کی جانچ سونپ دی۔ دوسری طرف AAP امیدوار سندیپ شکلا نے کہا کہ عام آدمی بلدیاتی انتخابات میں بڑے جوش و خروش سے مقابلہ کر رہا ہے۔ انہوں نے بتایا کہ یہ روڈ شو تکونیا پارک سے نکل کر پنچ راستے سے راہل چوراہا، نارمل چوراہا تک پورے شہر میں کیا گیا۔

یہ بھی پڑھیں- Chhattisgarh Liquor scam: دہلی کے بعد چھتیس گڑھ میں شراب گھوٹالہ، ای ڈی نے کیا 2000 کروڑ کا گھپلہ بے نقاب

محکمہ اطلاعات نے جاری کی تھی ہدایات

انتخابی مہم کے تعلق سے ڈی ایم نے محکمہ اطلاعات کے ذریعہ ایک خط جاری کیا تھا، جس میں کہا گیا تھا کہ اگر کسی امیدوار کے ذریعہ ایسی حرکت پائی جاتی ہے تو اس کے خلاف فوجداری دفعات کے تحت مقدمہ درج کرنے کی کارروائی کی جائے گی۔ اس معاملے میں ضلع مجسٹریٹ جسجیت کور نے میڈیا کو بتایا کہ سلطان پور میونسپلٹی علاقہ کے تحت نابالغ بچوں کے ساتھ انتخابی مہم کا ایک ویڈیو سامنے آیا ہے۔ اس کا نوٹس لیتے ہوئے ایس ڈی ایم اور سی او کو جانچ کی ہدایت دی گئی ہے۔

-بھارت ایکسپریس