A heart-wrenching incident in Guna: مدھیہ پردیش کے گنا میں دل دہلا دینے والا واقعہ، بچھڑے کو بچانے کنویں میں اترے 6 نوجوان، 5 کی موت

گنا: مدھیہ پردیش کے گنا ضلع کے دھرناودا گاؤں میں منگل کے روز ایک دل دہلا دینے والا واقعہ سامنے آیا، جہاں کنویں میں گرنے والے گائے کے بچھڑے کو بچانے کے لیے اترے چھ نوجوانوں میں سے پانچ کی زہریلی گیس سے دم گھٹنے سے موت ہو گئی۔ ایک نوجوان کسی طرح رسی کو پکڑ کر باہر نکلنے میں کامیاب ہوگیا۔ واقعہ کے بعد گاؤں میں سوگ کی لہر دوڑ گئی ہے۔

منگل کی صبح تقریباً ساڑھے گیارہ بجے گاؤں کے کچھ لوگوں نے دیکھا کہ گاؤں کے پرانے کنویں میں ایک بچھڑا گرا ہوا ہے۔ بچھڑے کو بچانے کے لیے سب سے پہلے گاؤں کا نوجوان مانو کشواہا کنویں میں اترا، لیکن دم گھٹنے کی شکایت کرنے لگا۔ سونو کشواہا اور ایک اور نوجوان بھی اس کی مدد کے لیے کنویں میں اترے۔ جلد ہی تینوں کو سانس لینے میں تکلیف ہونے لگی۔

کنویں میں موجود زہریلی گیس سے 5 کی موت

اس کے بعد منوں کا بڑا بھائی پون کشواہا اور گاؤں کے دو دیگر لوگ گرو اوجھا اور شیوچرن ساہو (شیو دیال اوجھا) بھی بچاؤ کے لیے کنویں میں اترے۔ ایک ایک کرکے کل 6 نوجوان اندر گئے لیکن وہاں موجود زہریلی گیس سے 5 کی موت ہوگئی۔

پون کشواہا کسی طرح باہر نکلنے میں کامیاب

صرف پون کشواہا کسی طرح رسی کی مدد سے باہر نکلنے میں کامیاب رہا۔ اس کے مطابق کنویں میں اترتے ہی دم گھٹنے لگا اور سب کی حالت بگڑ گئی۔ کنویں میں ہی تین نوجوانوں کی موت ہو گئی، جب کہ دو دیگر نے ضلع اسپتال لے جاتے وقت دم توڑ دیا۔ واقعہ کی اطلاع ملتے ہی ضلع کلکٹر کشور کمار کنیال اور دیگر اعلیٰ انتظامی افسران موقع پر پہنچے اور بچاؤ آپریشن کی نگرانی کی۔ انتظامیہ نے پورے علاقے کو سیل کر کے تفتیش شروع کر دی ہے۔

وزیر اعلیٰ موہن یادو نے کیا افسوس کا اظہار

واقعے کے حوالے سے وزیر اعلیٰ موہن یادو کے دفتر نے افسوس کا اظہار کیا ہے۔ ریاستی حکومت کی طرف سے مرنے والوں کے قریبی رشتہ داروں کو 4-4 لاکھ روپے کی مالی امداد فراہم کرنے کی ہدایت دی گئی ہے۔ وہیں، سابق وزیر اعلیٰ دگ وجے سنگھ نے اس واقعہ کو افسوسناک قرار دیتے ہوئے انتظامیہ سے مرنے والوں کے اہل خانہ کو مناسب معاوضہ فراہم کرنے کی درخواست کی۔

بھارت ایکسپریس۔