Ahmedabad Plane Crash: ایئر انڈیا طیارہ صرف 32 سیکنڈ میں آگ کےگولے میں ہوا تھا تبدیل

12 جون کو احمد آباد میں ہونے والے خوفناک ایئر انڈیا طیارہ حادثے کی گتھی اب سلجھتی دکھائی دے رہی ہے۔ بھارتی ایوی ایشن حادثہ تحقیقاتی بیورو (AAIB) نے اس حادثے کی ابتدائی تحقیقاتی رپورٹ جاری کر دی ہے، جس میں کئی چونکا دینے والے انکشافات کیے گئے ہیں۔ رپورٹ کے مطابق، ٹیک آف کے صرف 32 سیکنڈ بعد ہی طیارہ آگ کا گولا بن گیا تھا۔ اس حادثے میں 270 افراد جان کی بازی ہار گئے، جن میں 241 مسافر اور 29 کریو ممبر شامل تھے۔ اس رپورٹ میں پائلٹ کی آواز بھی ریکارڈ ہوئی ہے جس میں واضح طور پر سنا جا سکتا ہے:

حادثہ کیسے ہوا؟

ایئر انڈیا کی فلائٹ AI 171 نے 12 جون کی رات 1:38:42 پر ٹیک آف کیا تھا، لیکن ٹیک آف کے فوراً بعد دونوں انجن بند ہو گئے۔ بلیک باکس کی ریکارڈنگ سے یہ واضح ہوا کہ پہلے انجن-1 کا فیول سوئچ ‘RUN’ سے ‘CUTOFF’ پر چلا گیا، اور صرف ایک سیکنڈ بعد انجن-2 کے ساتھ بھی یہی ہوا۔ اس سے طیارے کو ایندھن کی فراہمی بند ہو گئی اور دونوں انجنز رک گئے۔

کاک پٹ سے آخری آوازیں

کاک پٹ وائس ریکارڈر میں درج گفتگو کے مطابق، ایک پائلٹ نے دوسرے سے پوچھا:

“تم نے کٹ آف کیوں کیا؟“
اس پر جواب ملا: “میں نے نہیں کیا۔“
اس کے بعد طیارہ تیزی سے بلندی کھونے لگا اور ہوائی اڈے کی باڑ عبور کرنے سے پہلے ہی زمین پر گرنے لگا۔

طیارہ آگ کا گولا کیوں بنا؟

حادثے کے وقت طیارے کے دونوں انجن بند ہو چکے تھے۔ بلیک باکس اور EAFR (Engine and Flight Recorder) ڈیٹا کے مطابق، RAT (Ram Air Turbine) فعال ہو چکی تھی، جو یہ ظاہر کرتی ہے کہ طیارے کی مرکزی بجلی کی فراہمی مکمل طور پر ناکام ہو چکی تھی۔ طیارہ رن وے سے 0.9 ناٹیکل میل دور ایک ہاسٹل سے ٹکرا گیا، جس کے بعد وہاں آگ بھڑک اٹھی۔

حادثے میں طیارے کے تمام مسافر اور عملے کے ارکان میں سے صرف ایک شخص زندہ بچ پایا، جبکہ ہاسٹل میں موجود کئی دیگر افراد بھی جان سے ہاتھ دھو بیٹھے۔

تحقیقاتی رپورٹ کے 5 بڑے نکات:

1. ٹیک آف کے 32 سیکنڈ بعد دونوں انجن بند ہو گئے، ایندھن کی سپلائی رک گئی تھی۔
2. پائلٹوں کے درمیان گفتگو میں فیول سوئچ آف ہونے پر الجھن نظر آئی۔
3. RAT ٹربائن کے ایکٹیویٹ ہونے سے ظاہر ہوا کہ بجلی اور ہائیڈرولک پاور مکمل طور پر ختم ہو چکی تھی۔
4. انجن کو دوبارہ اسٹارٹ کرنے کی کوشش ہوئی، انجن-1 نے کچھ ردعمل دیا، مگر انجن-2 مکمل طور پر ناکام رہا۔
5. طیارہ صرف 32 سیکنڈ تک فضا میں رہا اور آخرکار ایک ہاسٹل سے ٹکرا کر تباہ ہو گیا۔

بھارت ایکسپریس اردو