Operation Sindoor: جودھ پور سے پھلودی تک سیکورٹی انتظامات کا جائزہ، ضلع انتظامیہ کو دی گئی ہدایات: گجیندر سنگھ شیخاوت

مرکزی وزیرثقافت و سیاحت  گجیندر سنگھ شیخاوت نے جودھپور ضلع انتظامیہ کے ساتھ میٹنگ کے بعد آج پھلودی پہنچے اور پھلودی ضلع انتظامیہ کے عہدیداروں سے چوکسی اور حفاظتی انتظامات کے بارے میں رپورٹ لی۔
جمعے کو کلکٹریٹ آڈیٹوریم میں مرکزی ثقافت اور سیاحت کے وزیر جناب گجیندر سنگھ شیخاوت کی صدارت میں ایک اعلیٰ سطحی میٹنگ منعقد ہوئی، جس میں ہنگامی حالات سے مؤثر طریقے سے نمٹنے کے لیے ضلعی سطح کی تیاریوں کا مکمل جائزہ لیا گیا۔ اجلاس میں مختلف محکموں کے افسران نے شرکت کی۔ مرکزی وزیر شیخاوت نے کہا کہ ہندوستان کی ناقابل تسخیر افواج انتہائی قابل ہیں، سرحد کی حفاظت ناقابل تسخیر ہے، ہمیں صرف اضافی احتیاطی تدابیر اختیار کرنی ہوں گی۔ انہوں نے کہا کہ یہ ضروری ہے کہ کسی قسم کی خوف و ہراس نہ پھیلے اور شہریوں میں باہمی ہم آہنگی ہو۔ ضلع اور پولیس انتظامیہ کو اس کا خیال رکھنا ہوگا۔ پھلودی کے ایم ایل اے پبرام وشنوئی بھی موجود تھے۔ مرکزی وزیر نے عہدیداروں کو ہدایت دی کہ وہ پھلودی ضلع میں کسی بھی آفت کی صورت میں فوری، منظم ردعمل کو یقینی بنائیں۔

فائر بریگیڈ، ایمبولینس اور اسپتال کے انتظامات کو مضبوط کیا جائے

ڈیزاسٹر مینجمنٹ کے لئے محکمہ وار ذمہ داریوں کو واضح کرتے ہوئے انہوں نے کہا کہ فائر بریگیڈ اور ایمبولینس خدمات کو ضلع میں بنائے رکھاجانا چاہئے۔ ایمبولینسز کو لازمی طور پر ہر علاقے میں تعینات کیا جانا چاہیے اور اس بات کو یقینی بنایا جانا چاہیے کہ ایمرجنسی کی صورت میں رسپانس ٹائم فوری ہو۔ انہوں نے طبی خدمات کی موثر نگرانی کے لیے سب ڈویژنل افسران کو نوڈل بنانے اور باقاعدہ سرپرائز معائنہ کرنے کی ہدایت دی۔

مرکزی وزیر نے تمام اسپتالوں میں مناسب بستروں، طبی عملے اور خون کے یونٹس کی دستیابی کو یقینی بنانے کی ہدایات دیں۔ خصوصی طور پر ہدایت کی کہ بلیک آؤٹ کی صورت میں بھی اسپتالوں میں کام آسانی سے جاری رہنا چاہیے اور زندگی بچانے والی خدمات کو کسی بھی صورت میں متاثر نہیں ہونا چاہیے۔

انہوں نے ہدایت کی کہ تمام کمیونٹی ہیلتھ سینٹرز کو 24 گھنٹے مکمل طور پر فعال رکھا جائے اور ان کی باقاعدگی سے نگرانی کی جائے۔ کسی آفت کی صورت میں لوگوں کو محفوظ مقامات پر منتقل کرنا اولین ترجیح ہونی چاہیے۔ اس کے لیے اسکولوں اور دیگر محفوظ عمارتوں کی شناخت شیلٹر ہوم کے طور پر کی جانی چاہیے۔ ہدایات دیتے ہوئے انہوں نے کہا کہ کوئی افسر یا اہلکار ہیڈ کوارٹر نہیں چھوڑے گا۔

غلط معلومات بند کریں، فوج کی سرگرمیوں سے متعلق معلومات شیئر نہ کریں

مرکزی وزیرثقافت و سیاحت  گجیندر سنگھ شیخاوت نے کہا کہ کسی بھی شخص کو فوج کی سرگرمیوں یا نقل و حرکت سے متعلق کوئی بھی معلومات سوشل میڈیا پر شیئر نہیں کرنی چاہئے۔ انہوں نے کہا کہ ورچوئل دنیا میں ہر کسی کو تمام معلومات تک رسائی حاصل ہے، اس لیے سوشل میڈیا پر صرف مستند معلومات شیئر کی جائیں۔ اس وقت ذمہ دار شہری کا کردار ادا کرتے ہوئے قوم کے تئیں اپنا فرض پورا کریں۔ ضلع کلکٹر ایچ ایل اتل نے موجودہ حالات کو مدنظر رکھتے ہوئے انتظامیہ کی طرف سے کی گئی تیاریوں کے بارے میں جانکاری دی۔

میٹنگ میں ضلع کلکٹر ایچ ایل اتل، پولیس سپرنٹنڈنٹ پوجا آوانہ، ایڈیشنل ڈسٹرکٹ کلکٹر اجے، سب ڈویژنل آفیسر سنیل پنوار اور تمام محکموں کے افسران موجود تھے۔

بھارت ایکسپریس اردو