Who is Sheikh Shahjahan: شیخ شاہ جہاں نے زمین پر قبضہ کرکے 261 کروڑ روپے کمائے، ای ڈی نے 56 دنوں میں چارج شیٹ داخل کی

انفورسمنٹ ڈائریکٹوریٹ (ای ڈی) نے شیخ شاہ جہاں اور ان کے بھائی عالمگیر کے خلاف زمین گھوٹالے میں چارج شیٹ داخل کی ہے۔ شیخ شاہ جہاں اوران کے بھائی کے علاوہ ان کے ایک قریبی ساتھی شیو پرساد ہزارا اور دیدار بخش مولا کے نام بھی چارج شیٹ میں شامل کیے گئے ہیں۔ حال ہی میں ان کی تقریباً 14 کروڑ روپے کی جائیدادیں ضبط کی گئیں۔ اس معاملے میں 4 لوگوں کی گرفتاری کے ساتھ، ای ڈی نے جرم کی آمدنی کے طور پر 288 کروڑ روپے کی نشاندہی کی ہے۔

ای ڈی نے اپنی چارج شیٹ میں کہا ہے کہ ترنمول کانگریس (ٹی ایم سی) کے معطل لیڈر شیخ شاہ جہاں نے سندیش کھالی اور اس کے آس پاس کی 180 بیگھہ زمین پر قبضہ کرکے 261 کروڑ روپے کمائے۔ 113 صفحات پر مشتمل چارج شیٹ میں شاہجہاں کے بھائی شیخ عالمگیر اور ان کے ساتھیوں دیدار بخش مولا اور شیو پرساد ہزارہ کے نام بھی شامل ہیں۔ ان چاروں نے مل کر سندیش کھالی کے آس پاس کی زمینوں پر قبضہ کیا اور لوگوں کو دھمکیاں بھی دیں۔

ای ڈی نے 56 دنوں میں چارج شیٹ داخل کی

چارج شیٹ میں سی بی آئی کے چھاپے کے بعد سندیش کھالی سے برآمد کیے گئے ہتھیاروں کا بھی ذکر ہے۔ ای ڈی کے ایک سینئر افسر نے کہا، “ای ڈی کے معاملے کی تحقیقات سنبھالنے کے 56 دنوں کے اندر چارج شیٹ داخل کردی گئی ہے۔ زمینوں پر قبضے اور جبرا وصولی کے الزامات کی جانچ کا عمل ابھی جاری ہے۔ ہم نے رقم جمع کی ہے۔ جرم کی آمدنی تخمینہ 261 کروڑ روپے میں سے 27 کروڑ روپے ضبط کرنے میں کامیاب رہی ہے۔

شیخ شاہ جہاں عدالتی حراست میں ہیں

ای ڈی نے مارچ میں شیخ شاہ جہاں کو گرفتار کیا تھا ۔جس کے بعد وہ عدالتی حراست میں ہیں۔ ان کے بھائی عالمگیر پر الزام ہے کہ جب 5 جنوری کو ای ڈی کی ٹیم سندیش کھالی میں چھاپہ مارنے پہنچی تو ان کے کہنے  پر حملہ کیا گیا۔ وہ اس کیس کےمرکزی ملزم ہے۔ اس معاملے میں سی بی آئی نے انہیں گرفتار کیا تھا۔

ریاستی پولیس نے سندیش کھالی میں ایک خاتون کی مبینہ عصمت دری کی شکایت کے بعد فروری میں شیو پرساد کو ان کے ساتھی اتم سردار کے ساتھ گرفتار کیا تھا۔

بھارت ایکسپریس