PM Modi holds roadshow in Itanagar: پی ایم مودی کا اروناچل پردیش کے ایٹانگر میں روڈ شو، عوام نے کیا پرجوش استقبال

پیر کے روز اروناچل پردیش کے دارالحکومت ایٹانگر میں پی ایم نریندر مودی نے ایک شاندار روڈ شو کیا، جس میں عوام بڑی تعداد میں سڑکوں پر امڈ آئے تاکہ ان کا استقبال کر سکیں۔ عوام نے پُرجوش انداز میں پی ایم مودی کا استقبال کیا، ترنگا لہرایا اور “وندے ماترم” کے نعرے لگائے۔ خواتین اور نوجوان بڑی تعداد میں موجود تھے، اور کئی خواتین نے روایتی لباس زیب تن کیا ہوا تھا۔ ایٹانگر میں پی ایم مودی نے 5,100 کروڑ روپے سے زائد مالیت کے ترقیاتی منصوبوں کا سنگ بنیاد رکھا اورافتتاح کیا۔ اس موقع پرخطاب کرتے ہوئےپی ایم مودی نے “دونی پولو” دیوتا کو نذرانہ عقیدت پیش کیا اور سب کے لیے پراتھنا کیں۔ پی ایم مودی نے کہا کہ ہیلی پیڈ سے پروگرام کے مقام تک کے سفر کے دوران، راستے میں عوام سے ملنا، بچوں اور نوجوانوں کو ترنگا ہاتھ میں لیے دیکھنا، ان کے لیے فخر کا باعث تھا، اور یہ اروناچل پردیش کی مہمان نوازی کا عکاس ہے۔

انہوں نے کہا کہ اروناچل نہ صرف “طلوعِ آفتاب کی سرزمین” ہے بلکہ “حب الوطنی کی سرزمین” بھی ہے۔ جیسے قومی پرچم کا پہلا رنگ زعفرانی ہے، ویسے ہی اروناچل کی روح بھی زعفرانی جذبے سے شروع ہوتی ہے۔ پی ایم مودی نے کہا کہ اروناچل کا ہر فرد شجاعت اور سادگی کی علامت ہے۔ انہوں نے ریاست سے اپنی گہری محبت کا اظہار کرتے ہوئے کہا کہ یہاں کا ہر دورہ انہیں خوشی دیتا ہے اور یہاں کے لوگوں کے ساتھ گزارا ہر لمحہ یادگار ہوتا ہے۔پی ایم مودی نے عوام کی طرف سے ملنے والی محبت و خلوص کو اپنے لیے بڑا اعزاز قرار دیا۔ انہوں نے کہا:توانگ کی خانقاہ سے لے کر نامسائی کے سنہری پاگوڈا تک، اروناچل پردیش امن اور ثقافت کا سنگم ہے۔ انہوں نے اس مقدس سرزمین کو سلام پیش کرتے ہوئے کہا کہ یہ بھارت ماتا کا فخر ہے۔
پی ایم مودی نے اروناچل پردیش کے دورے کو تین وجوہات کی بنا پر خاص قرار دیا
1. نوراتری کے پہلے دن کا موقع:
پی ایم مودی نے کہا کہ آج نوراتری کا پہلا دن ہے، اور انہیں پہاڑوں کی خوبصورتی دیکھنے کا موقع ملا۔ اس دن ماں شیلپتری، جو کہ ہمالیہ کی بیٹی مانی جاتی ہیں، کی پوجا کی جاتی ہے۔
2. نئی جی ایس ٹی اصلاحات کا اعلان:
آج سے ملک بھر میں نئی نسل کی جی ایس ٹی اصلاحات نافذ کی جا رہی ہیں، اور “جی ایس ٹی سیونگز فیسٹیول” کا آغاز ہوا ہے۔ تہوار کے سیزن میں عوام کو “ڈبل فائدہ” ملا ہے۔
3. ترقیاتی منصوبوں کا افتتاح
اروناچل پردیش میں متعدد ترقیاتی منصوبوں کا افتتاح کیا گیا، جو توانائی، رابطہ، سیاحت اور صحت جیسے مختلف شعبوں کا احاطہ کرتے ہیں۔ پی ایم مودی نے کہا کہ یہ مرکز اور ریاستی حکومتوں کے “ڈبل انجن” والے فائدے کی عکاسی کرتے ہیں۔ انہوں نے اروناچل کے عوام کو ان منصوبوں پر دل کی گہرائیوں سے مبارکباد دی اور کہا کہ “جی ایس ٹی سیونگز فیسٹیول” عوام کے لیے خوشحالی، ترقی اور کامیابی لائے گا۔
اہم منصوبے:
 دو بڑے پن بجلی منصوبوں کا سنگ بنیاد
اروناچل پردیش کے سی یوم سب بیسن میں 3,700 کروڑ روپے سے زائد مالیت کے ہیؤ (Heo) (240 میگا واٹ) اور Tato-I (186 میگا واٹ) منصوبے، جو کہ پائیدار توانائی کے فروغ کے لیے اہم ہیں۔
توانگ میں جدید کنونشن سینٹر کا سنگ بنیاد:
توانگ کے سرحدی ضلع میں 9,820 فٹ کی بلندی پر واقع یہ جدید مرکز قومی و بین الاقوامی کانفرنسوں، ثقافتی میلوں اور نمائشوں کی میزبانی کرے گا۔ 1,500 سے زائد مندوبین کے بیٹھنے کی گنجائش کے ساتھ یہ سیاحت اور ثقافت کو فروغ دے گا۔
دیگر ترقیاتی منصوبے
پی ایم مودی نے 1,290 کروڑ روپے سے زائد مالیت کے دیگر اہم انفراسٹرکچر منصوبے بھی شروع کیے، جن میں سڑکوں کی بہتری، صحت، فائرسفٹیر، کام کرنے والی خواتین کے لیے ہاسٹلز وغیرہ شامل ہیں۔ ان منصوبوں سے علاقے میں معاشی سرگرمیوں کو فروغ ملے گا اور عوام کے معیارِ زندگی میں بہتری آئے گی۔
مقامی تاجروں اور صنعت کاروں سے ملاقات
پی ایم مودی نے جی ایس ٹی اصلاحات کے اثرات پر گفتگو کے لیے مقامی ٹیکس دہندگان، تاجروں اور صنعت کے نمائندوں سے بھی ملاقات کی، تاکہ کاروبار میں آسانی اور مقامی معیشت کو فروغ دینے کے اقدامات پر تبادلہ خیال کیا جا سکے۔

بھارت ایکسپریس اردو