Jitan Ram Manjhi Says ‘Not Satisfied’: نتیش کمار کی کرسی خطرے سے دوچار، مانجھی ساتھ چھوڑنے کیلئے ہورہے ہیں تیار، تیجسوی کررہے ہیں انتظار

بہار میں وزیر اعلیٰ نتیش کمار نے اپنے وزراء کے درمیان محکموں کی تقسیم کردی ہے، جس میں سابق وزیر اعلیٰ جیتن رام مانجھی کے بیٹے سنتوش سمن کو درج فہرست ذات اور درج فہرست قبائل کی بہبود کا محکمہ دیا گیا ہے۔ جس کو لے کر جیتن رام مانجھی نے سوال اٹھائے ہیں۔ہم پارٹی  کے صدر نے ایک بار پھر بی جے پی-جے ڈی یو پر دباؤ ڈالا اور کہا کہ ہمارا پیٹ ایک روٹی سے نہیں بھر تا، براہ کرم ہمیں کم از کم دو روٹیاں دیں۔ جیتن رام مانجھی نے کہا، “ہمارا پیٹ ایک روٹی سے نہیں بھرتا، ہم 2-3 روٹیاں مانگیں گے، براہ کرم ہمیں کم از کم 2 روٹیاں دیں، اگر ہم غریبوں کے لیے کام کرنا چاہتے ہیں تو ہمیں بھی ایک اچھا محکمہ چاہیے، ہم اس کا مطالبہ کررہے ہیں۔ نتیش کمار نے جیتن رام مانجھی کے بیٹے سنتوش کمار کو انفارمیشن ٹکنالوجی اور درج فہرست ذات اور درج فہرست قبائل کی بہبود کا قلمدان دیا ہے۔ اس سے پہلے جب سنتوش مہاگٹھ بندھن حکومت میں وزیر تھے تب بھی انہیں ایس سی-ایس ٹی ویلفیئر دیا گیا تھا۔ جیتن رام مانجھی جب بہار حکومت میں وزیر تھے تب بھی ان کے پاس اسی محکمے کی ذمہ داری تھی۔

پیر کو سابق وزیر اعلی جیتن رام مانجھی نے اس کو ایشو بنا کر اپنے عدم اطمینان کا اظہار کیا تھا۔ وزیر سنتوش سمن کو ایچ اے ایم کوٹہ سے ایس سی-ایس ٹی بہبود کا محکمہ ملنے پر مانجھی نے گیا میں ایک کھلے فورم سے کہا، ”مجھے بھی وہی محکمہ ملا جب میں وزیر تھا اور میرے بیٹے سنتوش کو بھی ایس سی-ایس ٹی بہبود کا ہی محکمہ ملا۔ انہوں نے پوچھا کہ  کیا ہم سڑک کی تعمیر اور عمارت کی تعمیر کے محکمے کا کام نہیں کر سکتے؟ میں اس سے دکھی ہوں۔

آپ کو بتادیں کہ 28 جنوری کو بہار میں بغاوت ہوئی تھی اور این ڈی اے کی حکومت بنی تھی۔ نتیش کمار 9ویں بار وزیر اعلیٰ بن گئے۔ دو ڈپٹی سی ایم سمراٹ چودھری اور وجے کمار سنہا بی جے پی کوٹے سے بنائے گئے ۔ اس کے علاوہ 5 دیگر وزراء نے حلف لیا۔ سنتوش سمن کو بھی ایچ اے ایم کوٹے سے وزیر بنایا گیا۔ جب وزارتیں تقسیم ہوئیں تو نتیش کمار نے محکمہ داخلہ اپنے پاس رکھا۔ اس کے علاوہ جنرل ایڈمنسٹریشن، کیبنٹ سیکرٹریٹ، مانیٹرنگ، الیکشن اور ایسے تمام محکمے جو کسی کو الاٹ نہیں کیے گئے ہیں۔سمراٹ کو فنانس، کمرشل ٹیکس، شہری ترقی اور ہاؤسنگ، صحت، کھیل، پنچایتی راج، صنعت، جانوروں اور ماہی پروری کے وسائل، قانون کے محکمے ملے ہیں۔ جب کہ وجے سنہا کو زراعت، سڑک کی تعمیر، محصولات اور زمینی اصلاحات، گنے کی صنعت، کان کنی اور ارضیات، محنت کے وسائل، آرٹ کلچر اور یوتھ، معمولی آبی وسائل، پبلک ہیلتھ انجینئرنگ کے محکمے دیے گئے ہیں۔

 دراصل بہار کی سیاست میں جوڑ توڑ کی وجہ سے ماحول گرم ہے۔ ہم پارٹی نئی حکومت میں ایک اہم محکمہ لینے یا ایک اور وزیر کا مطالبہ آگے بڑھانے کی کوشش کر رہی ہے۔ حالانکہ اس بیچ جیتن رام مانجھی کے بارے میں بحث  بھی چل پڑی ہے کہ  وہ گرینڈ الائنس کیمپ سے رابطے میں ہیں۔ اس طرح کی رپورٹیں بار بار آرہی ہیں  اور وزیر سنتوش سمن ان رپورٹوں کو مسترد کررہے ہیں۔ لیکن یہ طے ہے کہ مانجھی فی الحال بہار این ڈی اے سے ناراض ہیں اور اس ناراضگی کا فائدہ کون اٹھاتا ہے ، یہ بہت جلد نظرآجائے گا۔

بھارت ایکسپریس۔