Ahmedabad Plane Crash: فائنل رپورٹ آنے تک انتظار کریں، ایئر انڈیا حادثے کی رپورٹ پر مرکزی وزیر رام موہن نائیڈو کا بڑا بیان

احمد آباد میں پیش آئے ایئر انڈیا طیارہ حادثے کی ابتدائی رپورٹ سامنے آ گئی ہے۔ اس رپورٹ میں کئی انکشافات کیے گئے ہیں۔ رپورٹ میں کہا گیا ہے کہ یہ حادثہ دونوں انجنوں کے بیک وقت فیل ہونے کی وجہ سے پیش آیا۔ رپورٹ میں مزید کئی دعوے بھی کیے گئے ہیں۔ ابتدائی رپورٹ کے سامنے آنے کے بعد اب مرکزی شہری ہوا بازی کے وزیر رام موہن نائیڈو نے ایک اہم بیان دیا ہے۔ انہوں نے کہا ہے کہ ہمیں کسی بھی نتیجے پر پہنچنے سے پہلے فائنل رپورٹ کا انتظار کرنا چاہیے۔ انہوں نے کہا کہ جو رپورٹ ابھی آئی ہے، وہ تحقیقاتی بیورو (AAIB) کی ابتدائی نتائج پر مبنی رپورٹ ہے۔

مرکزی وزیر نائیڈو نے وشاکھا پٹنم میں صحافیوں سے بات کرتے ہوئے کہا: ’’مجھے نہیں لگتا کہ ہمیں اس پر ابھی کوئی نتیجہ اخذ کرنا چاہیے۔ میرا ماننا ہے کہ ہمارے پاس دنیا کے بہترین پائلٹ اور کریو ممبرز موجود ہیں۔ میں ملک کے تمام پائلٹس اور عملے کی کوششوں کو سراہتا ہوں۔ وہ شہری ہوا بازی کے بنیادی وسائل ہیں۔ ہم پائلٹس کی فلاح و بہبود کا بھی خاص خیال رکھتے ہیں۔ اس لیے ہمیں ابھی کوئی نتیجہ اخذ نہیں کرنا چاہیے اور حتمی رپورٹ کا انتظار کرنا چاہیے۔‘‘

آپ کو بتاتے چلیں کہ 12 جون 2025 کو احمد آباد سے لندن جا رہی ایئر انڈیا کی فلائٹ AI171، ٹیک آف کے صرف 32 سیکنڈ بعد ہی کریش ہو گئی تھی۔ اس المناک حادثے میں 270 افراد جان سے ہاتھ دھو بیٹھے تھے، جن میں طیارے میں سوار 241 افراد اور زمین پر موجود 29 افراد شامل تھے۔ اب اس خوفناک حادثے کی ابتدائی تفتیشی رپورٹ سامنے آئی ہے، جو نہ صرف چونکا دینے والی ہے بلکہ بھارت کے ہوابازی نظام پر کئی سوالات بھی کھڑے کرتی ہے۔ یہ رپورٹ طیارہ حادثہ تحقیقاتی بیورو نے تیار کی ہے۔

رپورٹ سے واضح ہوا ہے کہ طیارے کے دونوں انجن فضا میں ہی بند ہو گئے تھے۔ اس کی وجہ فیول کٹ آف سوئچ کا اچانک “RUN” سے “CUTOFF” موڈ میں چلے جانا تھی، جو ایندھن کی فراہمی کو کنٹرول کرتا ہے۔

“انجن کس نے بند کیا؟” پائلٹس الجھن کا شکار تھے

رپورٹ کے مطابق، جب دونوں انجن بند ہوئے، تو کاک پٹ وائس ریکارڈر میں ایک پائلٹ کو یہ کہتے سنا گیا: ’’تم نے انجن کیوں بند کیا؟‘‘ جس پر دوسرا پائلٹ جواب دیتا ہے: ’’میں نے نہیں کیا۔‘‘ یعنی انجن بند کرنے کا فیصلہ جان بوجھ کر نہیں لیا گیا بلکہ یہ اچانک اور غیر ارادی طور پر ہوا۔ اب تفتیش کا سب سے اہم پہلو یہی ہوگا کہ آخر فیول کٹ آف سوئچ خودبخود “CUTOFF” موڈ میں کیسے چلا گیا، جس کی وجہ سے انجن کو ایندھن کی فراہمی بند ہو گئی۔

بھارت ایکسپیریس اردو