YouTuber Manish Kashyap News: یوٹیوبر منیش کشیپ پر لگا این ایس اے، بہار کے بعد اب تمل ناڈو پولیس نے کی کارروائی

Manish Kashyap: یو ٹیوبر منیش کشیپ کے خلاف بہار کے بعد اب تمل ناڈو پولیس نے قومی سلامتی ایکٹ (این ایس اے) کی کارروائی کی ہے۔ تمل ناڈو میں بہار کے مائیگرنٹ مزدوروں پرحملے کا فرضی ویڈیو نشرکرنے کے الزام میں منیش کشیپ کو گرفتار کیا گیا تھا۔ مدورئی کے پولیس سپرنٹنڈنٹ (ایس پی) شیو پرساد نے بتایا، ’’تمل ناڈو میں بہاری مائیگرینٹ مزدوروں پرحملے کا فرضی ویڈیو نشرکرنے والے منیش کشیپ کو این ایس اے ایکٹ کے تحت حراست میں لیا گیا ہے۔‘‘

منیش کشیپ کو مدورئی ضلع عدالت میں بدھ کے روز پیش کیا گیا، جس نے انہیں 15 دنوں کی عدالتی حراست میں بھیجنے کا حکم دیا۔ اس کے بعد منیش کشیپ کو مدورئی سینٹرل جیل بھیج دیا گیا ہے۔ کشیپ اور دیگر کے خلاف تمل ناڈو میں مائیگرینٹ مزدوروں پرحملے کے فرضی ویڈیو پھیلانے کے الزامات میں معاملے درج کئے گئے ہیں۔

پٹنہ سے مدورئی لے گئی تھی تمل ناڈو پولیس

گزشتہ ہفتے تمل ناڈو پولیس کورٹ سے پروڈکشن وارنٹ لے کر منیش کشیپ کو بہار کے پٹنہ سے مدورئی لے گئی تھی، جہاں عدالت میں منیش کشیپ کو پیش کرنے کے بعد پولیس کو تین دنوں کی ریمانڈ ملی تھی۔ ریمانڈ کے دوران پولیس نے پوچھ گچھ بھی کی تھی۔ تمل ناڈو سے پہلے بہار پولیس اور اقتصادی جرائم ونگ نے بھی منیش کشیپ سے پوچھ گچھ کی تھی۔

یہ بھی پڑھیں: Delhi High Court seeks the response of CBI on Manish Sisodia Case: دہلی ہائی کورٹ نے منیش سسودیا معاملے میں سی بی آئی کو بھیجا نوٹس

منیش کشیپ اپنے آپ کو ’سن آف بہار‘ اوراصلی نام تری پراری بتاتا ہے۔ بہارکے مغربی چمپارن ضلع میں منیش کشیپ کی پیدائش 9 مارچ 1991 کو ڈمری مہنوا نامی گاؤں میں ہوئی تھی۔ منیش کشیپ نے سال 2020 کے بہار اسمبلی انتخابات میں بھی اپنی قسمت آزمائی تھی۔ اس نے بہارکی چنپٹیا اسمبلی سیٹ سے الیکشن میں حصہ لیا تھا، جس میں پرچہ نامزدگی میں اس نے اپنا نام تری پراری کمار تیواری بتایا تھا۔