Supreme Court On UP Govt for demolition of house: مکان خالی کرنے کا موقع نہیں دیتے،من مانی کرتے ہیں…یوپی حکومت کی بلڈوزر کاروائی پر سپریم کوٹ کا سخت تبصرہ

سپریم کورٹ نے اتر پردیش حکومت کی طرف سے بلڈوزر کارروائی پر برہمی کا اظہار کیا ہے۔ سی جے آئی کی سربراہی والی بنچ نے افسران کو جابرانہ قرار دیا ہے۔ عدالت نے اتر پردیش حکومت کی طرف سے پیش ہونے والے وکیل سے کہا کہ آپ راتوں رات مکان نہیں گرا سکتے۔

25 لاکھ کا معاوضہ دیں۔

دوران سماعت عدالت نے کہا کہ آپ لوگوں کے گھر ایسے کیسے گرا سکتے ہیں؟ یہ انارکی ہے۔ عدالت نے اتر پردیش کے چیف سکریٹری کو غیر قانونی انہدام کی کارروائی کے معاملے کی جانچ کرنے اور درخواست گزار کو 25 لاکھ روپے کا معاوضہ دینے کی ہدایت دی ہے۔ چیف جسٹس ڈی وائی چندر چوڑ، جسٹس جے بی پارڈی والا اور جسٹس منوج مشرا کی بنچ نے کہا کہ یہ مکمل طور پر من مانی ہے، مناسب طریقہ کار کی پیروی نہیں کی گئی ہے۔ عدالت نے کہا کہ ہمارے پاس بیان حلفی ہے، جس میں کہا گیا ہے کہ کوئی نوٹس جاری نہیں کیا گیا، آپ نے صرف موقع پر جا کر لاؤڈ اسپیکر کے ذریعے لوگوں کو آگاہ کیا۔

عدالت نے 2020 میں ازخود نوٹس لیا

عدالت کو بتایا گیا کہ درخواست گزار کے ساتھ ساتھ 123 دیگر افراد کے گھروں پر بلڈوزر کارروائی کی گئی۔ منوج تبریوال آکاش کی طرف سے بھیجی گئی شکایت کی بنیاد پر، عدالت نے 2020 میں از خود سماعت شروع کی تھی۔ آکاش کا گھر 2019 میں سڑک کو چوڑا کرنے کے نام پر گرا دیا گیا تھا۔ آکاش مہاراج گنج کا رہنے والا ہے۔ عدالت نے بلڈوزر کی کارروائی سے متعلق رہنما اصول طے کرنے کے معاملے پر فیصلہ محفوظ کر لیا ہے۔

بھارت ایکسپریس۔