Parliament Winter Session: وندے ماترم گانے سے کب اور کن لیڈروں نے کیا انکار؟ وزیر داخلہ امت شاہ نے راجیہ سبھا کے چیئرمین کو تفصیل فراہم کی

لوک سبھا اور راجیہ سبھا میں ’وندے ماترم‘ کے موضوع پر بحث کے بعد پورے ملک میں یہ معاملہ موضوع گفتگو بنا ہوا ہے۔ ایسے میں مرکزی وزیر داخلہ امت شاہ نے راجیہ سبھا کے چیئرمین کو ایک تفصیلی فہرست فراہم کی ہے، جس میں اُن سیاسی شخصیات کے نام شامل ہیں جنہوں نے قومی ترانے وندے ماترم کو گانے سے انکار کیا یا اس کے دوران مناسب رویہ اختیار نہیں کیا۔

وزیر داخلہ کا خط اور پس منظر

یہ معاملہ اس وقت اٹھا جب پارلیمنٹ کے دونوں ایوانوں میں ’وندے ماترم‘ پر طویل بحث ہوئی۔ لوک سبھا میں یہ بحث 10 گھنٹے تک جاری رہی اور اس کا آغاز خود وزیراعظم نریندر مودی نے کیا۔ وزیراعظم نے الزام عائد کیا کہ کانگریس نے مسلم لیگ اور محمد علی جناح کے دباؤ میں آکر ’وندے ماترم‘ کو نظرانداز کیا، حالانکہ 1875 میں بنکم چندر چٹرجی کی تخلیق کردہ یہ نظم آزادی کی تحریک کا نعرہ بن چکی تھی۔

کس کس نے وندے ماترم سے انکار کیا؟ امت شاہ کی فراہم کردہ فہرست

عمران مسعود – کانگریس

(8 دسمبر 2025 کو مذہبی بنیاد پر وندے ماترم گانے سے انکار)

آغا سید مہدی – نیشنل کانفرنس

(8 دسمبر 2025 کو پارلیمنٹ کی بحث کے دوران گانے سے انکار)

شفیق الرحمن برق – سماج وادی پارٹی

(2019 میں لوک سبھا حلف کے وقت وندے ماترم نہ گانے کا اعلان)

ضیاء الرحمن برق – سماج وادی پارٹی

(2025 میں اپنے دادا کے موقف کی حمایت کرتے ہوئے ترانہ نہ گانے کا اعلان)

کانگریس کی 2018 ریلی

(صرف ایک بند پڑھا گیا، وجہ: راہل گاندھی کا انتظار بتایا گیا)

عارف مسعود – کانگریس ایم ایل اے، مدھیہ پردیش

(2019 میں مذہبی وجوہات کے سبب ترانہ گانے سے انکار)

سدارمیا – کانگریس لیڈر، کرناٹک

(2022 میں آئین کے دن کارکنوں کو وندے ماترم نہ گانے کی ہدایت)

سماج وادی پارٹی – مہاراشٹر یونٹ

(2025 میں اسکولوں میں وندے ماترم لازمی قرار دینے کے حکم کو منسوخ کرنے کا مطالبہ)

سعید عالم – آر جے ڈی ایم ایل اے

(2025 میں اسمبلی میں قومی ترانے کے دوران کھڑے ہونے سے انکار)

سیاسی رخ اختیار کرتا ہوا معاملہ

ایک جانب حکومت پارلیمنٹ میں ’وندے ماترم‘ پر باضابطہ بحث کروا رہی ہے، دوسری جانب اس موضوع کو لے کر ملک میں مختلف قسم کی سیاسی و سماجی آرا سامنے آرہی ہیں۔ اپوزیشن کا کہنا ہے کہ حکومت اس مسئلے کو انتخابی فائدے کے لیے کسی مخصوص طبقے کو نشانہ بنانے کے طور پر استعمال کر رہی ہے۔ ادھر حکومت کی جانب سے ان ناموں کا انکشاف کیے جانے کے بعد یہ معاملہ مزید سیاسی رنگ اختیار کر چکا ہے۔

بھارت ایکسپریس اردو۔