Prime Minister Narendra Modi: مشکل حالات میں بھی  حاصل ہوگی کامیابی ،وزیر اعظم مودی کے شیئر کیے گئے سنسکرت شلوک کا مفہوم

نئی دہلی :وزیر اعظم نریندر مودی نے سوشل میڈیا پلیٹ فارم “ایکس” پر ایک نہایت متاثر کن سنسکرت شلوک شیئر کرتے ہوئے ملک کے نوجوانوں اور “وکست بھارت” کے عزم سے متعلق اہم پیغام دیا ہے۔ انہوں نے کہا کہ آج بھارت کے نوجوان صبر، مضبوط خود اعتمادی اور مسلسل محنت کی بدولت تاریخ ساز کامیابیاں حاصل کر رہے ہیں۔ وزیر اعظم کے مطابق نوجوانوں کی یہی غیر متزلزل قوتِ ارادی اور لگن تیزی سے ترقی کرتے ہوئے بھارت کی سب سے بڑی طاقت بن چکی ہے۔

اپنے پیغام کے ساتھ وزیر اعظم مودی نے معروف سنسکرت شلوک “प्राप्यापदं न व्यथते कदाचिदुद्योगमन्विच्छति चाप्रमत्तः…” بھی شیئر کیا۔ اس شلوک کا مفہوم یہ ہے کہ جو شخص زندگی میں اچانک پیش آنے والی مشکلات یا بحرانوں سے گھبراہٹ کا شکار نہیں ہوتا، بلکہ صبر، ہوشیاری اور مسلسل کوشش کے ساتھ ان کا مقابلہ کرتا ہے، وہ آخرکار شکست نہیں کھاتا۔ ایسا بہادر انسان مشکل ترین حالات کو بھی برداشت کرتے ہوئے ان پر کامیابی حاصل کر لیتا ہے۔

وزیر اعظم مودی نے اپنے پیغام میں اس بات پر زور دیا کہ نوجوانوں کا یہی جذبہ اور ثابت قدمی ترقی یافتہ بھارت کے خواب کو حقیقت میں بدلنے میں اہم کردار ادا کر رہی ہے۔ انہوں نے کہا کہ ملک کے نوجوان ہر شعبے میں نئی مثالیں قائم کر رہے ہیں اور ان کی محنت بھارت کے روشن مستقبل کی بنیاد ہے۔یہ پہلا موقع نہیں ہے جب وزیر اعظم مودی نے سنسکرت کے اخلاقی اور حوصلہ افزا شلوکوں کے ذریعے عوام کو ترغیب دی ہو۔ اس سے قبل 17 جولائی کو بھارت کی پہلی ہائیڈروجن ٹرین کے خواب کی تعبیر کے موقع پر بھی انہوں نے

“प्रभूतं कार्यमल्पं वा…” شلوک شیئر کیا تھا۔ اس موقع پر انہوں نے شیر سے ملنے والی اس تعلیم کا ذکر کیا تھا کہ کام خواہ چھوٹا ہو یا بڑا، اسے پورے جوش، اعتماد اور عزم کے ساتھ شروع کرنا چاہیے۔اسی طرح 16 جولائی کو مہاپربھو جگن ناتھ کی مقدس رتھ یاترا کے موقع پر بھی وزیر اعظم نے ایک روحانی شلوک شیئر کرتے ہوئے ملک کے عوام کی خوشحالی اور فلاح و بہبود کی کامنا کی تھی۔وزیر اعظم مودی کا تازہ پیغام ایسے وقت سامنے آیا ہے، جب ملک کے نوجوان تعلیم، سائنس، کھیل، صنعت اور دیگر شعبوں میں نمایاں کامیابیاں حاصل کر رہے ہیں۔ اس شلوک کے ذریعے انہوں نے نوجوانوں کو یہ پیغام دیا کہ صبر، ثابت قدمی اور مسلسل محنت ہی ہر مشکل پر قابو پانے اور کامیابی حاصل کرنے کا سب سے مؤثر راستہ ہے۔ وزیر اعظم کی اس پوسٹ کو سوشل میڈیا پر بڑی تعداد میں شیئر کیا جا رہا ہے اور نوجوان اسے اپنی زندگی کے لیے ایک اہم رہنما اصول قرار دے رہے ہیں۔

بھارت یکسپریس اردو