West Bengal Election Dates Announced: مغربی بنگال انتخابات کی تاریخوں کا اعلان، 23 اور 29 اپریل کو ہوگی ووٹنگ، 4 مئی کو آئیں گے نتائج

نئی دہلی: مغربی بنگال میں اسمبلی انتخابات کا اعلان کر دیا گیا ہے۔ چیف الیکشن کمشنر گیانیش کمار نے اتوار کے روز پریس کانفرنس میں اسمبلی انتخابات کی تاریخوں کا اعلان کیا۔ گیانیش کمار کے مطابق، مغربی بنگال میں انتخابات دو مرحلوں میں ہوں گے۔ 23 اپریل اور 29 اپریل کو پولنگ ہوگی، جبکہ ووٹوں کی گنتی 4 مئی کو کی جائے گی۔ پولنگ بوتھ پر مناسب انتظامات کیے جائیں گے اور سکیورٹی کے سخت انتظامات کیے جائیں گے۔

انتخابی اعداد و شمار

الیکشن کمیشن کے مطابق، مغربی بنگال میں کل 6.44 کروڑ ووٹرز ہیں، جن میں مرد ووٹرز 3.28 کروڑ، خواتین ووٹرز 3.16 کروڑ اور تھرڈ جینڈر 1152 ووٹرز شامل ہیں۔ پہلے بار ووٹ ڈالنے والے 18-19 سال کی عمر کے ووٹرز کی تعداد 5.23 لاکھ ہے۔ 20 سے 29 سال کے عمر کے ووٹرز کی تعداد 1.31 کروڑ ہے، جبکہ 85 سال سے زائد عمر والے ووٹرز 3.79 لاکھ ہیں۔ معذور ووٹرز کی تعداد 4.16 لاکھ ہے۔ ای وی ایم (الیکٹرانک ووٹنگ مشین) کے حوالے سے بیداری مہم بھی چلائی جا رہی ہے۔

پچھلے انتخابات کا جائزہ

یاد رہے کہ 2021 میں مغربی بنگال اسمبلی انتخابات آٹھ مراحل میں ہوئے تھے۔ یہ انتخابات اس لیے طویل تھے کیونکہ ریاست میں 294 نشستیں ہیں اور سکیورٹی، قانون و نظم، اور بڑے ووٹر بیس کو مدنظر رکھتے ہوئے انتخابی کمیشن نے انہیں آٹھ مراحل میں کرایا تھا۔

پچھلے انتخابات میں، ممتا بنرجی کی قیادت والی ترنمول کانگریس (ٹی ایم سی) نے مغربی بنگال اسمبلی انتخابات میں بھاری اکثریت سے کامیابی حاصل کی تھی۔ بنگال کی کل 294 میں سے 215 سیٹیں ٹی ایم سی کے پاس ہیں۔ پارٹی کو تقریباً 48 فیصد ووٹ ملے تھے۔

دوسری جانب، بھارتیہ جنتا پارٹی (BJP) اہم اپوزیشن پارٹی کے طور پر ابھری اور اسے 77 نشستیں ملیں۔ دہائیوں سے بنگال کی سیاست پر حاوی رہنے والے کمیونسٹ فرنٹ اور کانگریس کو تاریخی دھچکا لگا اور وہ ایک بھی نشست جیتنے میں ناکام رہے۔ انڈین سیکولر فرنٹ (آئی ایس ایف) نے اتحاد کے ایک حصے کے طور پر الیکشن لڑا، ایک سیٹ ملی۔

مسلم ووٹرز کا اثر

مغربی بنگال کی کل آبادی میں مسلمانوں کی تعداد تقریباً 30 فیصد ہے۔ ریاست کی اسمبلی میں 294 نشستیں ہیں اور تقریباً 40 سے 50 حلقوں میں مسلم ووٹرز فیصلہ کن کردار ادا کرتے ہیں۔ مرشد آباد، مالدا، شمالی دناج پور، جنوبی 24 پرگنہ اور بیر بھوم جیسے اضلاع میں مسلم آبادی سب سے زیادہ ہے۔ ان میں سے کئی حلقوں میں ووٹروں میں سے 50 فیصد سے زیادہ مسلمان ہیں، جو انتخابات کے نتائج میں اہم کردار ادا کرتے ہیں۔

بھارت ایکسپریس۔