نئی دہلی: وزیر اعظم نریندر مودی نے ہفتہ کے روز اسکائی روٹ ایرو اسپیس کی ٹیم کو وکرم-1 کی کامیاب لانچنگ پر مبارکباد دیتے ہوئے کہا کہ یہ کامیابی بھارت کے نجی خلائی شعبے کی بڑھتی ہوئی صلاحیت کا مظہر ہے اور ملک بھر کے نوجوانوں کو اعتماد کے ساتھ اختراع اور نئی سوچ کے ساتھ آگے بڑھنے کی ترغیب دے گی۔
وزیر اعظم نریندر مودی نے سوشل میڈیا پلیٹ فارم ’ایکس‘ پر لکھا، ’’میں نے اسکائی روٹ ایرو اسپیس کی ٹیم سے بات کی اور وکرم-1 کی کامیاب لانچنگ پر انہیں مبارکباد دی۔ یہ بھارت کے خلائی سفر کا ایک اہم سنگ میل ہے۔ ہمارے نجی شعبے کی بڑھتی ہوئی شراکت داری نئے امکانات پیدا کر رہی ہے اور اختراع کو فروغ دے رہی ہے۔ یہ کامیابی بے شمار نوجوانوں کو بڑے خواب دیکھنے اور بے خوف ہو کر نئی اختراعات کرنے کی ترغیب دے گی۔‘‘
مرکزی وزیر داخلہ امت شاہ نے ’ایکس‘ پر لکھا، ’’بھارت کی خلائی امنگیں نئی بلندیوں کو چھو رہی ہیں۔ بھارت کے پہلے نجی طور پر تیار کردہ لانچ وہیکل وکرم-1 کی کامیاب لانچنگ پر اسکائی روٹ ایرو اسپیس کو دل کی گہرائیوں سے مبارکباد۔ خلاء تک رسائی کو آسان بنانے کے وزیر اعظم مودی کے وژن کو حقیقت میں بدلنے کی سمت یہ ایک مضبوط قدم ہے، جو بھارت کے خلائی شعبے کو مزید مضبوط کرے گا اور عالمی سطح پر ملک کی حیثیت کو مزید مستحکم بنائے گا۔‘‘
بھارت کے خلائی پروگرام کے بانی ڈاکٹر وکرم ساربھائی کے نام پر تیار کیا گیا چار مرحلوں پر مشتمل وکرم-1 لانچ وہیکل خاص طور پر چھوٹے سیٹلائٹس کو کم وقت میں اور ضرورت کے مطابق خلا میں بھیجنے کے لیے ڈیزائن کیا گیا ہے۔ ماہرین کے مطابق یہ مشن عالمی کمرشل لانچ مارکیٹ میں بھارت کی پوزیشن مزید مضبوط کرنے کی سمت ایک اہم پیش رفت ہے۔تقریباً سات منزلہ عمارت کے برابر بلند یہ راکٹ زمین کے نچلے مدار (لو ارتھ آربٹ) میں تقریباً 450 کلومیٹر کی بلندی تک پہنچنے کے لیے بھیجا گیا۔ اس کامیاب لانچ کے ساتھ بھارت ان منتخب ممالک کی صف میں شامل ہو گیا ہے جہاں نجی خلائی کمپنیاں بھی آربیٹل لانچ کی کامیاب صلاحیت رکھتی ہیں، جو ملک کے خلائی شعبے اور ٹیکنالوجی کی ترقی کے لیے ایک تاریخی کامیابی تصور کی جا رہی ہے۔
بھارت ایکسپریس۔
ممبئی: معروف بھارتی اداکار نانا پاٹیکر کے انتقال پر صدرِ جمہوریہ دروپدی مرمو اور نائب…
نانا پاٹیکر نے اپنے تقریباً پانچ دہائیوں پر محیط کریئر میں کئی دمدار اور یادگار…
وزیر اعظم مودی نے کہا کہ 2022 میں 5جی کے آغاز سے لے کر 2024…
نانا پاٹیکر نے 1978 میں ڈرامہ فلم ’گمن‘ سے ہندی سنیما میں قدم رکھا تھا۔…
نانا پاٹیکر مراٹھی فلموں میں بھی سرگرم رہے۔ ’نٹ سمراٹ‘ ان کی انتہائی مقبول اور…
پی ایم مودی نے کہا کہ نانا پاٹیکر کو ان کے بے باک اور واضح…