Primary School Merger: یوپی حکومت کوہائی کورٹ سے بڑی راحت، 5000 اسکولوں کے انضمام کے خلاف عرضی خارج

الہ آباد ہائی کورٹ نے یوپی میں 5000 اسکولوں کے انضمام کے خلاف داخل عرضی خارج کردی۔

اترپردیش حکومت کو ہائی کورٹ سے بڑی راحت ملی ہے۔ ہائی کورٹ کی سنگل بینچ نے ریاستی حکومت کے 5000 پرائمری اسکولوں کے انضمام کے فیصلے کے خلاف داخل عرضیوں کوخارج کردیا ہے۔ جسٹس پنکج بھاٹیا کی صدارت والی سنگل بینچ نے 4 جولائی کواس معاملے میں اپنا فیصلہ محفوظ رکھا تھا اورآج اسے سناتے ہوئے حکومت کے فیصلے کوجائزٹھہرایا۔

ہائی کورٹ نے اپنے فیصلے میں کہا کہ یہ پالیسی فیصلہ طلباء کے مفاد میں ہے۔ اسے چیلنج نہیں کیا جا سکتا جب تک کہ یہ غیرآئینی یا بدنیتی پرمبنی نہ ہو۔ عدالت نے واضح کیا کہ حکومت کا یہ قدم تعلیمی معیارکوبہتربنانے اوروسائل کے بہتراستعمال کے لئے اٹھایا گیا ہے۔ درحقیقت، یوپی کے بیسک ایجوکیشن ڈپارٹمنٹ نے 16 جون 2025 کوایک حکم نامہ جاری کیا تھا، جس میں طلباء کی تعداد کی بنیاد پرہزاروں پرائمری اسکولوں کونزدیکی اپرپرائمری یا کمپوزٹ اسکولوں کے ساتھ ضم کرنے کی ہدایت کی گئی تھی۔

طلباء کی کم تعداد والے اسکولوں میں وسائل کی بربادی

حکومت نے دلیل دی کہ کم طلبا کی تعداد والے اسکولوں میں وسائل ضائع کئے جا رہے ہیں۔ انضمام سے اساتذہ اورانفراسٹرکچرکا بہتر استعمال ہوگا، جس سے بچے معیاری تعلیم حاصل کرسکیں گے۔ اس حکم کے خلاف اساتذہ کی تنظیموں اورکچھ والدین نے ہائی کورٹ میں عرضی داخل کی تھی۔ درخواست گزاروں نے دلیل دی تھی کہ اسکولوں کے انضمام سے دیہی علاقوں کے بچوں کی تعلیم متاثرہوگی، کیونکہ انہیں اسکول پہنچنے میں دشواری کا سامنا کرنا پڑے گا۔

انضمام سے متاثرہوسکتی ہیں اساتذہ کی ملازمتیں

عرضی گزاروں نے بھی ترک دیا تھا کہ انضمام سے اساتذہ کی نوکریاں بھی متاثرہوسکتی ہیں۔ ہائی کورٹ نے ان دلیلوں کوخارج کرتے ہوئے کہا کہ حکومت کا یہ پالیسی سے متعلق فیصلہ بچوں کے وسیع تر مفادات کو دھیان میں رکھ کرلیا گیا ہے۔ عدالت ایسے معاملوں میں مداخلت نہیں کرسکتی، جب تک کہ فیصلہ واضح طور پر غیرآئینی یا بدنیتی پر مبنی نہ ہو۔