Bangladesh Infiltration: آسام میں وزیرداخلہ امت شاہ کا ریلی سے خطاب، یوسی سی کے نفاذ اور دراندازی کے خلاف سخت رخ اپنانے کی یقین دہانی

مرکزی وزیرداخلہ امت شاہ نے آسام اسمبلی انتخابات سے قبل ریاست کا دورہ کیا اور ضلع گوالپارا کے علاقے دودھنوئی میں ایک بڑے عوامی جلسے سے خطاب کیا۔ یہ پہلا موقع تھا جب کسی مرکزی وزیرداخلہ نے اس علاقے کا دورہ کیا، جسے مقامی سطح پر ایک اہم سیاسی پیش رفت قرار دیا جا رہا ہے۔ بی جے پی کے انتخابی مہم کے تحت منعقدہ اس جلسے میں بڑی تعداد میں کارکنان اور مقامی افراد شریک ہوئے۔ اس موقع پر پارٹی کے امیدوار ٹنکیشور رابھا نے امت شاہ کی آمد کو اپنے لیے اعزاز قرار دیتے ہوئے کہا کہ اس سے کارکنوں کو نئی توانائی ملی ہے۔

دراندازی کا مسئلہ انتخابی مرکز بن گیا

جلسے کے دوران بی جے پی امیدوار ٹنکیشور رابھا نے بنگلہ دیش سے ہونے والی مبینہ دراندازی کو ضلع کا سب سے بڑا مسئلہ قرار دیا۔ ان کا کہنا تھا کہ گوالپارا میں بڑی تعداد میں غیر قانونی درانداز موجود ہیں، جس کی وجہ سے مقامی آبادی، خصوصاً قبائلی طبقہ، خود کو غیر محفوظ محسوس کر رہا ہے۔ انہوں نے دعویٰ کیا کہ دراندازوں کی وجہ سے مقامی لوگوں کی زمین، ثقافت اور شناخت متاثر ہو رہی ہے۔ ان کے مطابق قبائلی آبادی کی شرح کم ہو رہی ہے، جبکہ غیر قانونی آبادکاری میں اضافہ ہو رہا ہے، جو ایک سنگین مسئلہ بنتا جا رہا ہے۔

یکساں سول کوڈ (یو سی سی) پر زور

ٹنکیشور رابھا نے یکساں سول کوڈ (یو سی سی) کے نفاذ کا مطالبہ کرتے ہوئے کہا کہ اس سے ریاست میں نظم و ضبط قائم ہوگا اور غیر قانونی سرگرمیوں پر قابو پانے میں مدد ملے گی۔ انہوں نے کہا کہ مرکزی وزیرِ داخلہ امت شاہ پہلے ہی واضح کر چکے ہیں کہ یو سی سی قبائلی برادریوں پر لاگو نہیں ہوگا، اس لیے ان کے حقوق محفوظ رہیں گے۔

کانگریس پر تنقید اور کارکردگی پر سوالات

بی جے پی امیدوار نے کانگریس کے رکن پارلیمنٹ عبدالرشید منڈل کو تنقید کا نشانہ بناتے ہوئے کہا کہ انہوں نے گزشتہ پانچ برسوں میں علاقے کی ترقی کے لیے کوئی نمایاں کام نہیں کیا۔ انہوں نے الزام لگایا کہ علاقے میں بنیادی سہولیات جیسے سڑکوں کی تعمیر بھی نہیں ہوئی، جبکہ جنگلات پر غیر قانونی قبضے بڑھتے جارہے ہیں۔ ان کے مطابق کانگریس مقامی قبائلی برادری کے مسائل کو نظر انداز کر رہی ہے۔

امت شاہ کا سخت موقف اور انتخابی پیغام

اپنی تقریر میں امت شاہ نے بھی غیر قانونی دراندازی کے مسئلے پر سخت مؤقف اختیار کیا۔ انہوں نے کانگریس پر الزام لگایا کہ اس کی پالیسیوں کی وجہ سے آسام دراندازوں کا مرکز بن گیا ہے۔ انہوں نے کہا کہ بی جے پی کی حکومت دراندازی کے خلاف سخت کارروائی کرے گی اور ریاست کی ثقافت، زمین اور عوام کے حقوق کا تحفظ یقینی بنائے گی۔ واضح رہے کہ آسام کی 126 رکنی اسمبلی کے لیے ووٹنگ 9 اپریل کو ہوگی، جبکہ نتائج 4 مئی کو سامنے آئیں گے۔ ایسے میں دراندازی، ترقی اور شناخت جیسے مسائل انتخابی مہم کے مرکزی موضوعات بن چکے ہیں۔

بھارت ایکسپریس اردو۔