UAE President wishes Diwali: متحدہ عرب امارات کے صدر محمد بن زاید النہیان نے دی دیوالی کی مبارکباد، لوگوں کے لیے صحت، خوشی اور خوش حالی کی دعا

ابوظہبی: متحدہ عرب امارات کے صدر محمد بن زاید النہیان نے اتوار کو دیوالی کے تہوار پر متحدہ عرب امارات سمیت دنیا بھر میں جشن منانے والے لوگوں کو مبارک باد پیش کی۔ انہوں نے آنے والے سال میں سب کے لیے اچھی صحت، خوشی اور خوش حالی کی دعا کی۔ متحدہ عرب امارات کے صدر نے سوشل میڈیا پلیٹ فارم ایکس پر جاری اپنے پیغام میں دیوالی منانے والوں کے لیے نیک خواہشات کا اظہار کیا۔ انہوں نے کہا، ’’متحدہ عرب امارات اور دنیا بھر میں دیوالی منانے والے تمام لوگوں کو میری جانب سے نیک تمنائیں۔ دعا ہے کہ یہ تہوار اور آنے والا سال آپ اور آپ کے اہل خانہ کے لیے اچھی صحت اور خوش حالی لے کر آئے۔‘‘

اقوام متحدہ نے دیوالی کو امید اور علم کی علامت قرار دیا

دریں اثنا، اقوام متحدہ نے بھی دیوالی کے موقع پر مبارک باد پیش کرتے ہوئے اس تہوار کے پیغام کو امید، علم اور خوش حالی سے جوڑا۔ اقوام متحدہ نے ایکس پر اپنے پیغام میں کہا کہ دیوالی ہندوستان سمیت دنیا بھر میں مختلف مذاہب کے ماننے والوں کے ذریعے منایا جانے والا روشنیوں کا تہوار ہے۔ اس موقع پر مٹی کے دیے امید، علم کے حصول اور خوش حالی کی علامت کے طور پر روشن کیے جاتے ہیں۔ ادارے نے تمام جشن منانے والوں کے لیے خوش گوار اور محفوظ دیوالی کی خواہش ظاہر کی۔

دنیا بھر میں سفارتی مشنوں اور رہنماؤں نے منایا تہوار

دیوالی کے موقع پر مختلف ملکوں میں تقریبات منعقد کی گئیں، جن میں عالمی رہنماؤں، سفارتی مشنوں اور مختلف برادریوں نے شرکت کی۔ اس سے قبل چین کے شہر شنگھائی میں ہندوستانی قونصل جنرل نے تمل برادری کے افراد کے ساتھ دیوالی منائی۔ یہ تقریب چین کی قدیم ترین تمل تنظیم ’تمل سنگم‘ کے زیر اہتمام منعقد ہوئی، جس میں قونصل جنرل پرتیک ماتھر مہمان خصوصی کے طور پر شریک ہوئے۔ انہوں نے ہندوستان کے تہذیبی فلسفے ’وسودھیو کٹمبکم‘ یعنی پوری دنیا ایک خاندان ہے، کو اجاگر کیا۔ وینزویلا میں قائم مقام صدر ڈیلسی روڈریگز نے وینزویلا کی حکومت اور ہندوستانی سفارت خانے کے مشترکہ اہتمام سے منعقدہ دیوالی تقریب میں شرکت کی اور وزیر اعظم نریندر مودی سمیت ہندوستان کے عوام کو مبارک باد دی۔

آسٹریلیا اور جنوبی کوریا کے سفارتی مشنوں کی تقریبات

ہندوستان میں آسٹریلیا کے ہائی کمشنر فلپ گرین نے بھی ملک میں اپنی آخری دیوالی آسٹریلوی ہائی کمیشن کے ارکان کے ساتھ منائی۔ انہوں نے اس تقریب کو گرم جوشی، تہوار کی خوشیوں اور رقص سے بھرپور ایک یادگار اجتماع قرار دیا۔ آسٹریلیا کے محکمہ خارجہ و تجارت نے بھی دیوالی کو ملک کی کثیر الثقافتی شناخت کا اہم حصہ تسلیم کیا۔ اسی طرح ہندوستان میں جمہوریہ کوریا کے سفارت خانے نے دیے سجانے کی خصوصی ورکشاپ منعقد کی، جبکہ جنوب مشرقی ایشیائی ممالک کی تنظیم (آسیان) نے بھی خطے میں دیپاولی منانے والی برادریوں کو مبارک باد پیش کی۔ واضح رہے کہ دیوالی کو روشنیوں کا تہوار کہا جاتا ہے اور یہ برائی پر اچھائی اور اندھیرے پر روشنی کی فتح کی علامت سمجھی جاتی ہے۔ اس موقع پر روایتی دیے روشن کیے جاتے ہیں، عبادت کی جاتی ہے، اہل خانہ کے ساتھ وقت گزارا جاتا ہے اور مٹھائیوں و مبارک باد کا تبادلہ ہوتا ہے۔

بھارت ایکسپریس اردو۔