Amit Shah slams RJD: وزیرداخلہ امت شاہ کا آر جے ڈی پر سخت حملہ، کہا- ’’جیوکا دیدیوں سے یہ 10 ہزار روپے کوئی نہیں چھین سکتا‘‘

مرکزی وزیرِ داخلہ امت شاہ نے منگل کو بہار کے دربھنگہ میں ایک بڑے عوامی جلسے سے خطاب کرتے ہوئے راشٹریہ جنتا دل پر جیوکا دیدیوں کے لیے مختص فنڈ پر اعتراض کرنے کے لیے الیکشن کمیشن سے شکایت کرنے پر سخت تنقید کی۔ امت شاہ نے کہا: ’’حال ہی میں مودی جی اور نتیش کمار جی نے ایک کروڑ سے زیادہ جیوکا دیدیوں کے بینک کھاتوں میں 10,000 روپے فی کس منتقل کیے ہیں۔ لیکن حیرت کی بات ہے کہ آر جے ڈی نے الیکشن کمیشن کو لکھا ہے کہ یہ رقم واپس لی جائے!‘‘ انہوں نے مزید کہا: ’’میں جیوکا دیدیوں سے کہنا چاہتا ہوں کہ لالو، تیجسوی یا ان کی تین نسلیں بھی آ جائیں، تب بھی وہ آپ سے یہ 10 ہزار روپے نہیں چھین سکیں گے۔‘‘

وزیر داخلہ کا بہار کے لیے ترقیاتی وژن

امت شاہ نے کہا کہ این ڈی اے حکومت بہار کی ترقی کے لیے پرعزم ہے۔ انہوں نے اعلان کیا: ’’ریاست کے ہر ضلع میں کوشل وکاس کیندر (اسکل ڈیولپمنٹ سینٹر) بنائے جائیں گے، ہر ضلع میں ایک نیا کارخانہ کھولا جائے گا اور 10 نئے صنعتی پارک قائم ہوں گے۔‘‘ انہوں نے مزید کہا کہ اتر پردیش اور تمل ناڈو کی طرح بہار میں بھی ڈیفنس کاریڈور قائم کیا جائے گا۔ امت شاہ نے کہا کہ پونورا دھام میں 850 کروڑ روپے کی لاگت سے ایک عظیم سیتا ماتا مندر تعمیر کیا جا رہا ہے۔ انہوں نے بتایا: ’’جیسے ہی یہ مندر تیار ہو جائے گا، ہم ایودھیا اور سیتامڑھی کو وندے بھارت ٹرینوں سے جوڑ دیں گے۔‘‘

لالو، رابڑی اور سونیا گاندھی پر طنز

امت شاہ نے اپوزیشن لیڈروں کو ہدف تنقید بناتے ہوئے کہا: ’’لالو اور رابڑی اپنے بیٹے کو وزیراعلیٰ بنانا چاہتے ہیں اور سونیا گاندھی اپنے بیٹے کو وزیراعظم۔ میں صاف کہہ دینا چاہتا ہوں نہ لالو جی کا بیٹا وزیراعلیٰ بنے گا، نہ سونیا جی کا بیٹا وزیراعظم۔ ان کے لیے کوئی جگہ خالی نہیں ہے۔‘‘

’جنگل راج‘ سے خبردار رہنے کی اپیل

انہوں نے عوام سے اپیل کی: ’’جب آپ کمل کے نشان پر بٹن دبائیں، تو یہ صرف ایم ایل اے کے انتخاب کے لیے نہیں بلکہ ’جنگل راج‘ کو روکنے کے لیے ہونا چاہیے۔ کیا آپ لالو اور رابڑی کے زمانے کے وہ 15 سال واپس لانا چاہتے ہیں؟‘‘ امت شاہ نے کہا: ’’لالو جی نے بہت کچھ کیا چارہ گھوٹالہ، نوکری کے بدلے زمین گھوٹالہ، ہوٹل فروخت گھوٹالہ، فلڈ ریلیف گھوٹالہ، بھرتی گھوٹالہ، اے بی ایکسپورٹس گھوٹالہ… اتنے گھوٹالے کیے کہ گنتی مشکل ہے اور کانگریس نے 12 لاکھ کروڑ کے گھوٹالے کیے۔ کیا ایسے لوگ بہار کی بھلائی کر سکتے ہیں؟‘‘ انہوں نے مزید کہا کہ وزیراعظم نریندر مودی اور وزیراعلیٰ نتیش کمار کے خلاف آج تک بدعنوانی کا ایک پیسے کا بھی الزام نہیں لگا۔

راہل گاندھی کی یاترا پر پھر سادھا نشانہ

راہل گاندھی کی ’ووٹر ادھیکار یاترا‘ پر طنز کرتے ہوئے امت شاہ نے کہا: ’’یہ دراصل ’گھسپیٹھیا بچاؤ یاترا‘ تھی۔ لالو اور راہل دراندازوں کو بچانا چاہتے ہیں۔ چاہے جتنی یاترائیں نکالیں، ہم ملک سے دراندازوں کو چن چن کر نکالیں گے۔‘‘ بہار میں انتخابی مہم اپنے عروج پر ہے۔ پہلے مرحلے کی پولنگ 6 نومبر اور دوسرے مرحلے کی 11 نومبر کو ہوگی، جبکہ نتائج 14 نومبر کو اعلان کیے جائیں گے۔

بھارت ایکسپریس اردو۔