GI Airport: آئی جی آئی ایئرپورٹ کے کارگو ایریا سے موبائل چوری کرنے والے گروہ کا پردہ فاش، 3 ملزمین گرفتار، 12 موبائل فون برآمد

IGI Airport: دہلی کے اندرا گاندھی انٹرنیشنل ایئر پورٹ کے کارگو ایریا میں ایکٹیو موبائل چوری کرنے والے گروہ کا ایئرپورٹ پولیس نے پردہ فاش کیا ہے۔ پولیس نے تین ملزمین کو گرفتار کیا ہے اور ان کے پاس سے 12 فون برآمد کئے ہیں۔ اس معاملے میں ایئرپورٹ پولیس نے تین معاملے درج کئے تھے اوراس کے بعد چوری کو انجام دینے والے گروہ کو پکڑنے کی کوششیں جاری تھیں۔

جسونت سنگھ نے پولیس میں شکایت درج کرائی تھی کہ ان کے کنسائنمنٹ سے 17 موبائل فون (سیمسنگ گلیکسی ایم-32 اور سیمسنگ گلیکسی ایم 33-) چوری ہوگئے ہیں، جنہیں دبئی ایکسپورٹ کیا جانا تھا۔ گودام سے کارگو ایریا جانے کے راستے میں کنسائنمنٹ سے فون چوری کے بعد شکایت کنندہ نے پولیس اسٹیشن میں معاملہ درج کرایا تھا، اس کے بعد سے پولیس جانچ میں مصروف ہوگئی تھی۔

ایس ایچ او یشپال سنگھ کی قیادت میں ٹیم کی تشکیل کی گئی اورکئی ٹھکانوں پرچھاپہ ماری کی گئی۔ چوری ہوئے موبائل کو سرویلانس پررکھا گیا تھا اوران کی مسلسل مانیٹرنگ کی جا رہی تھی۔ کچھ دنوں بعد بریلی اور آس پاس کے علاقے میں ان میں سے کچھ موبائل فون ایکٹیو ہوگئے۔ اس کے بعد پولیس کی ٹیم نے جانچ تیزکی تو پتہ چلا کہ بریلی کے ہی شیرسنگھ نے الگ الگ لوگوں کو موبائل فون بیچ دیئے تھے۔

شیر سنگھ کے قبضے سے 5 موبائل فون برآمد

مذکورہ جانکاری کے سامنے آنے کے بعد پولیس کی ٹیم نے چھاپہ ماری کی اورشیر سنگھ کو گرفتار کرلیا گیا۔ اس معاملے میں پوچھ گچھ کے دوران شیرسنگھ نے انکشاف کیا کہ اس نے ارون کمار اورپون کمارسے کم قیمت پر 17 سیمسنگ گلیکسی موبائل فون خریدے تھے۔ اس نے یہ بھی انکشاف کیا کہ پون کماراورارون کمار چوری کے موبائل فون آنند کارگو کمپنی میں کام کرنے والے دو ڈرائیوروں سے خریدتے تھے۔ تلاشی کے دوران شیر سنگھ کے قبضے سے 05 ہائی اینڈ سیمسنگ موبائل فون برآمد کئے گئے۔

یہ بھی پڑھیں:  MCD Mayor Election: ایم سی ڈی میئر الیکشن سے متعلق عام آدمی پارٹی نے سپریم کورٹ سے واپس لی عرضی، 6 فروری کا ہوگا الیکشن

شیرسنگھ سے پوچھ گچھ کی بنیاد پر پون کمار، ارون کمار، منیش کمار اورستیندریادو کے ٹھکانوں پر چھاپہ ماری کی گئی۔ دونوں ڈرائیوروں منیش کمار اورستیندریادو کو ان کے ٹھکانے سے گرفتارکرلیا گیا۔ پوچھ گچھ کے دوران انہوں نے بتایا کہ وہ جلدی پیسہ کمانا چاہتے تھے۔ اس درمیان وہ ارون اور پون نام کے دو لوگوں کے رابطے میں آیا، جو ان کی کمپنی کے پاس ہی رہتے تھے۔ اس کے بعد انہوں نے مل کر ایک گروہ بنالیا اور ایک ساتھ چوری کو انجام دینا شروع کردیا۔ منیش اور ستیندر کنسائنمنٹ سے موبائل چراتے تھے اورآگے ارون اور پون انہیں بازار میں بیچتے تھے۔