Parliament Attack 2001: پارلیمنٹ حملے کی ان سنی داستان: وہ خوفناک 45 منٹ، جب اے کے 47 کی گولیوں سے ایوان پارلیمنٹ لرز اٹھا

تاریخ 13 دسمبر 2001 تھی۔ دہلی میں شدید سردی پڑ رہی تھی، مگر پارلیمنٹ ہاؤس کے اندر سیاسی گہما گہمی اپنے عروج پر تھی۔ سرمائی اجلاس جاری تھا اور خواتین ریزرویشن بل پر زبردست بحث اور ہنگامہ ہو رہا تھا۔ اسی دوران کسی کو اندازہ نہیں تھا کہ چند ہی لمحوں میں بھارتی جمہوریت کے سب سے مقدس ایوان پر تاریخ کا سب سے بڑا دہشت گرد حملہ ہونے والا ہے۔صبح تقریباً 11:30 بجے گیٹ نمبر 12 سے ایک سفید ایمبیسڈر کار تیزی سے اندر داخل ہوئی، جس پر وزارتِ داخلہ اور پارلیمنٹ کےفرضی اسٹیکر لگے تھے۔ کار کی مشکوک حرکتوں پر سکیورٹی اہلکاروں کو شبہ ہوا اور وہ اس کے پیچھے دوڑ پڑے۔ ہڑبڑاہٹ میں دہشت گردوں کی گاڑی وہاں کھڑی نائب صدر کی گاڑی سے ٹکرا گئی۔ اسی ٹکر کے ساتھ ہی سازش بے نقاب ہو گئی۔ گاڑی سے اترتے ہی پانچوں دہشت گردوں نے اے کے 47 رائفلوں سے اندھا دھند فائرنگ شروع کر دی اور پورا پارلیمنٹ احاطہ گولیوں کی آواز سے دہل اٹھا۔

سکیورٹی فورسز کی بہادری

حملے کے فوراً بعد پارلیمنٹ کے تمام داخلی راستے بند کر دیے گئے۔ اندر موجود اراکین پارلیمنٹ اور وزراء کو محفوظ مقامات پر پہنچایا گیا، جب کہ باہر سکیورٹی فورسز نے مورچہ سنبھال لیا۔ ایک دہشت گرد گیٹ نمبر 1 سے ایوان میں گھسنے کی کوشش کر رہا تھا، مگر مستعد جوانوں نے اسے وہیں مار گرایا۔چار دیگر دہشت گرد گیٹ نمبر 4 کی طرف بڑھے، جہاں سکیورٹی فورسز کے ساتھ شدید مقابلہ ہوا اور تین دہشت گرد ہلاک کر دیے گئے۔ آخری دہشت گرد گیٹ نمبر 5 کی طرف بھاگا، مگر وہ بھی گولیوں سے بچ نہ سکا۔ یہ مڈبھیڑ صبح 11:30 بجے سے لے کر شام تقریباً 4 بجے تک جاری رہی۔اس حملے میں ملک نے اپنے 9 بہادر سپوت کھو دیے۔ دہلی پولیس کے 5 جوان، سی آر پی ایف کی خاتون کانسٹیبل کملیش کماری، راجیہ سبھا سیکریٹریٹ کے 2 ملازمین اور ایک مالی شہید ہوئے۔ انہی کی بہادری کے باعث دہشت گرد پارلیمنٹ کے مرکزی ہال تک نہیں پہنچ سکے اور ایک بڑا سانحہ ٹل گیا۔

دو دن بعد اس سازش کا پردہ فاش ہوا اور افضل گرو سمیت کئی افراد کو گرفتار کیا گیا۔ طویل عدالتی کارروائی کے بعد سپریم کورٹ نے افضل گرو کو مجرم قرار دیا اور 9 فروری 2013 کو تہاڑ جیل میں اسے پھانسی دے دی گئی۔ہر سال 13 دسمبر ان شہداء کی قربانی کی یاد دلاتا ہے جنہوں نے اپنی جانیں قربان کر کے بھارتی جمہوریت کا تحفظ کیا۔ ان کا یہ عظیم کارنامہ ہمیشہ یاد رکھا جائے گا۔

بھارت ایکسپریس اردو