India Green Hydrogen Mission: گرین ہائیڈروجن میں بھارتی اور جرمن کمپنیوں کا نیا میگا پروجیکٹ، گیم-چینجر ثابت ہوگا: وزیر اعظم مودی

گاندھی نگر: وزیر اعظم نریندر مودی نے جرمن چانسلر فریڈرک مرز کی موجودگی میں بھارت اور جرمنی کے درمیان طے پانے والے ایک نئے میگا پروجیکٹ کو مستقبل کی توانائی کے لیے گیم چینجر قرار دیا ہے۔ پیر کے روز گاندھی نگر کے مہاتما مندر کنونشن اینڈ ایگزیبیشن سینٹر میں دو طرفہ مذاکرات کے بعد منعقد مشترکہ پریس کانفرنس سے خطاب کرتے ہوئے وزیر اعظم نے دونوں ممالک کے درمیان ہوئے متعدد اہم معاہدوں اور شراکت داریوں کی تفصیل بیان کی۔ وزیر اعظم مودی نے سوامی وویکانند کی یومِ پیدائش کا حوالہ دیتے ہوئے کہا کہ اسی مقدس دن جرمن چانسلر کا بھارت آنا ان کے لیے خاص مسرت کا باعث ہے۔ انہوں نے کہا کہ یہ ایک خوشگوار اتفاق ہے کہ سوامی وویکانند نے ہی بھارت اور جرمنی کے درمیان فلسفے، علم اور روحانیت کا پل قائم کیا تھا۔ آج چانسلر مرز کا دورہ اسی پل کو نئی توانائی، نیا اعتماد اور نیا وسعت دے رہا ہے۔ انہوں نے بتایا کہ چانسلر مرز کی حیثیت سے یہ ان کا نہ صرف بھارت بلکہ پورے ایشیا کا پہلا دورہ ہے، جو اس بات کا ثبوت ہے کہ وہ بھارت کے ساتھ تعلقات کو کتنی اہمیت دیتے ہیں۔

وزیر اعظم نے اس دورے کو ایک تاریخی سنگِ میل قرار دیتے ہوئے کہا کہ بھارت اور جرمنی جیسی معیشتوں کے درمیان قریبی تعاون پوری انسانیت کے لیے نہایت اہم ہے۔ بڑھتے ہوئے تجارتی اور سرمایہ کاری تعلقات نے اسٹریٹجک شراکت داری کو نئی طاقت دی ہے۔ انہوں نے بتایا کہ دونوں ممالک کے درمیان دو طرفہ تجارت اب اپنی بلند ترین سطح پر پہنچ چکی ہے اور 50 بلین ڈالر سے تجاوز کر گئی ہے۔ دو ہزار سے زائد جرمن کمپنیاں طویل عرصے سے بھارت میں کام کر رہی ہیں، جو بھارت پر ان کے غیر متزلزل اعتماد اور یہاں موجود وسیع امکانات کی عکاسی کرتا ہے۔ اسی اعتماد کی جھلک بھارت۔جرمنی سی ای او فورم میں بھی دیکھی گئی۔

وزیر اعظم مودی نے کہا کہ بھارت اور جرمنی کے درمیان ٹیکنالوجی کے شعبے میں تعاون ہر سال مضبوط ہوتا جا رہا ہے اور اس کے اثرات اب زمینی سطح پر واضح نظر آتے ہیں۔ انہوں نے کہا کہ قابلِ تجدید توانائی کے میدان میں دونوں ممالک کی ترجیحات یکساں ہیں۔ اسی تعاون کو مزید وسعت دینے کے لیے بھارت۔جرمنی سینٹر آف ایکسیلنس قائم کرنے کا فیصلہ کیا گیا ہے، جو علم، ٹیکنالوجی اور اختراع کا مشترکہ پلیٹ فارم ہوگا۔ انہوں نے بتایا کہ موسمیاتی تبدیلی، توانائی، شہری ترقی اور شہری نقل و حمل جیسے شعبوں میں بھی دونوں ممالک مل کر نئی منصوبہ بندی کر رہے ہیں۔

اسی تناظر میں وزیر اعظم نے گرین ہائیڈروجن کے شعبے میں شروع ہونے والے نئے میگا پروجیکٹ کا خاص طور پر ذکر کیا۔ انہوں نے کہا کہ گرین ہائیڈروجن میں بھارتی اور جرمن کمپنیوں کا یہ نیا منصوبہ مستقبل کی صاف اور پائیدار توانائی کے لیے ایک گیم چینجر ثابت ہوگا۔ انہوں نے مزید کہا کہ بھارت اور جرمنی محفوظ، قابلِ اعتماد اور مضبوط سپلائی چینز کی تعمیر کے لیے مل کر کام کر رہے ہیں اور آج طے پانے والے مفاہمتی یادداشتوں سے اس تعاون کو نئی رفتار ملے گی۔ وزیر اعظم نے دفاعی شعبے پر بات کرتے ہوئے کہا کہ دفاع اور سلامتی کے میدان میں بڑھتا ہوا تعاون دونوں ممالک کے درمیان گہرے اعتماد اور مشترکہ سوچ کی علامت ہے۔ انہوں نے دفاعی تجارت سے متعلق طریقۂ کار کو آسان بنانے پر جرمن چانسلر کا شکریہ ادا کیا اور کہا کہ دفاعی صنعتوں کے درمیان تعاون بڑھانے کے لیے ایک مشترکہ روڈ میپ تیار کیا جائے گا، جس سے کو-ڈیولپمنٹ اور کو-پروڈکشن کے نئے مواقع پیدا ہوں گے۔

وزیر اعظم مودی نے بھارت اور جرمنی کے درمیان عوامی سطح پر قائم تاریخی تعلقات کا ذکر کرتے ہوئے رابندر ناتھ ٹیگور، سوامی وویکانند اور میڈم کاما کی خدمات کو یاد کیا۔ انہوں نے کہا کہ ٹیگور کی تخلیقات نے جرمنی کے فکری حلقوں کو نئی سوچ دی، جبکہ سوامی وویکانند کے افکار نے یورپ کو متاثر کیا۔ میڈم کاما نے جرمنی میں پہلی بار بھارتی آزادی کا پرچم لہرا کر بھارت کی آزادی کی خواہش کو عالمی شناخت دی۔ وزیر اعظم نے ہنرمندی، نقل مکانی اور تعلیم کے شعبوں پر زور دیتے ہوئے کہا کہ بھارت کی باصلاحیت نوجوان افرادی قوت جرمنی کی معیشت میں اہم کردار ادا کر رہی ہے۔ گلوبل اسکلز پارٹنرشپ پر جاری مشترکہ اعلامیہ اسی اعتماد کی علامت ہے، جس سے خاص طور پر ہیلتھ کیئر پروفیشنلز کی آمد و رفت آسان ہوگی۔ انہوں نے اعلیٰ تعلیم کے لیے تیار جامع روڈ میپ، جرمن جامعات کو بھارت میں کیمپس کھولنے کی دعوت، بھارتی شہریوں کے لیے ویزا فری ٹرانزٹ، میری ٹائم ورثے اور آیوروید سمیت روایتی ادویات کے شعبے میں تعاون کو مستقبل کی مضبوط شراکت داری کی بنیاد قرار دیا۔

بھارت ایکسپریس اردو