The life of the Prophet is real solution to human crises: سیرتِ نبوی ﷺ میں انسانی بحرانوں کا حقیقی حل موجود ہے: مولانا محمود اسعد مدنی

نئی دہلی: جمعیۃ علماء ہند کے صدر مولانا محمود اسعد مدنی نے کہا ہے کہ آج کی دنیا جس تباہی کے دہانے پر کھڑی ہے، اس سے بچنے کا واحد راستہ سیرت نبوی ﷺ کی پیروی ہے۔ انسانیت کے لیے نجات کا پیغام سیرت طیبہ میں پوشیدہ ہے اور یہی پیغام صرف مسلمانوں ہی نہیں بلکہ پوری انسانیت تک پہنچانا وقت کا اہم تقاضا ہے۔ وہ بہار کے ضلع کشن گنج کے قطب گنج میں جمعیۃ علماء کشن گنج کے زیر اہتمام حیاتِ رسول ﷺ کوئز کمپٹیشن کی شاندار انعامی تقریب سے خطاب کر رہے تھے۔

سیرت کا شعور اور نوجوان نسل کی ذمہ داریاں

مولانا مدنی نے کہا کہ ہمارے بچوں کو یہ سیکھنا ضروری ہے کہ ان کی زندگی صرف ذاتی نہیں بلکہ ایک اجتماعی ذمہ داری ہے۔ جو شخص صرف اپنی ذات کے لیے جیتا ہے، وہ قوم پر بوجھ ہے۔ حقیقی زندگی وہی ہے جو دوسروں کے لیے جی جائے، اور یہ شعور سیرت رسول ﷺ کے مطالعے سے ہی حاصل ہو سکتا ہے۔ انہوں نے اس بات پر زور دیا کہ نبی کریم ﷺ کی محبت ایمان کا حصہ ہے، اور یہی محبت ہمارے لیے سب سے قیمتی سرمایہ ہے۔ نوجوان نسل کو سیرتِ نبوی سے جوڑنا ہماری اولین ذمہ داری ہے تاکہ وہ ایک باکردار، بااخلاق اور خدا شناس انسان بن سکیں۔

انسان کا مقام اور سیرت کی رہنمائی

مولانا مدنی نے کہا کہ انسان ہونا بذات خود ایک شرف ہے، لیکن اگر وہ اپنے خالق کو نہ پہچانے تو اس کی تمام شرافت بےمعنی ہو جاتی ہے۔ اللہ تعالیٰ کو پہچاننے اور اس سے تعلق قائم کرنے کا واحد ذریعہ نبی کریم ﷺ کی سیرت ہے۔ ان کے اسوۂ حسنہ پر عمل ہی زندگی کی اصل کامیابی ہے۔

کوئز کمپٹیشن: علم، تربیت اور حوصلہ افزائی کا امتزاج

حیاتِ رسول ﷺ کوئز کمپٹیشن کی تقریب محض ایک انعامی اجلاس نہیں تھی، بلکہ یہ تربیت، شعور، اور سیرت سے وابستگی پیدا کرنے کی ایک تحریک ہے۔ اس بابرکت پروگرام کے ذریعے 100 سے زائد اسکولوں کے تقریباً 3000 طلبہ و طالبات نے شرکت کی۔ ان میں دو گروپ بنائے گئے: گروپ A اور گروپ B۔ دونوں گروپوں میں اول، دوم اور سوم پوزیشن حاصل کرنے والے طلبہ و طالبات کو بالترتیب 10 ہزار، 5 ہزار، اور 3 ہزار روپے نقد انعامات دیے گئے۔ علاوہ ازیں نمایاں کارکردگی کا مظاہرہ کرنے والے اسکولز، مدارس، اور دیگر شرکاء کو بھی اعزازات، شیلڈز، سرٹیفکیٹس، اور تحفے کے طور پر قلم دی گئی۔

کامیاب طلبہ و طالبات

گروپ A میں:

اول: نایاب کوکب

دوم: توفیہ ناز

سوم: منیرہ کشف

گروپ B میں:

اول: نورانی بیگم

دوم: رضیہ گلنار خانم

سوم: شاہ جمال

علما، دانشوران اور عوام کی بھرپور شرکت

تقریب کی صدارت مولانا مفتی محمد عیسی جامی قاسمی (نائب صدر جمعیۃ علماء کشن گنج) نے کی جبکہ سرپرستی مولانا مفتی محمد جاوید اقبال قاسمی (صدر جمعیۃ علماء بہار) نے کی۔ نظامت کے فرائض مفتی محمد مناظر نعمانی قاسمی نے انجام دیے۔ اس موقع پر مولانا خالد انور قاسمی، مولانا ابو سالک شہید ندوی، ایم ایل اے اختر الایمان، ایم ایل اے سعود اسرار، ایم ایل اے اظہار آصفی، سابق ایم ایل اے قمر الہدی، قاری نوشاد عادل، ماسٹر سفیر الدین راہی اور دیگر معززین نے شرکت کی۔

اختتامیہ کلمات اور مستقبل کی کوششیں

مولانا محمد خالد انور نے اس موقع پر کہا کہ جمعیۃ علماء ہند کی ہدایت کے مطابق ہم اس پروگرام کو تسلسل کے ساتھ جاری رکھیں گے اور مستقبل میں مزید بہتری کے ساتھ اس کا انعقاد ہوگا۔ مولانا ابو سالک ندوی نے رزلٹ کا اعلان کیا اور مولانا مدنی کے ہاتھوں انعامات تقسیم کیے گئے۔ پروگرام کو کامیاب بنانے میں جمعیۃ علماء کشن گنج کے تمام ارکان اور خدام نے مکمل جوش و جذبے کے ساتھ شرکت کی اور قائدانہ کردار ادا کیا۔ یہ تقریب نہ صرف سیرت سے جڑنے کی دعوت تھی بلکہ ایک زندہ امت کی تشکیل کی طرف قدم بھی۔

بھارت ایکسپریس اردو۔