All Party Meeting on Economic: معاشی بحران، بے روزگاری اور مہنگائی پر آل پارٹی میٹنگ بلانے کا مطالبہ، انڈیا اتحاد کا انتخابی شفافیت اور تعلیمی مسائل پر حکومت کو گھیرنے کا فیصلہ

نئی دہلی: دہلی کے کانسٹی ٹیوشن کلب میں پیر کے روز انڈیا بلاک اتحاد کی اہم میٹنگ منعقد ہوئی، جس میں ملکارجن کھڑگے، راہل گاندھی، سونیا گاندھی، ممتا بنرجی، اکھلیش یادو اور تیجسوی یادو سمیت مختلف اپوزیشن جماعتوں کے سینئر رہنماؤں نے شرکت کی۔ اجلاس کے بعد کانگریس صدر ملکارجن کھڑگے نے کہا کہ میٹنگ انتہائی مثبت رہی اور پانچ اہم نکات پر اتفاق رائے قائم ہوا ہے، جن پر اتحاد کی تمام جماعتیں مل کر کام کریں گی۔ میڈیا سے گفتگو کرتے ہوئے کھڑگے نے بتایا کہ انڈیا اتحاد کی اس میٹنگ میں 25 سیاسی جماعتوں نے شرکت کی۔ تمام جماعتوں نے فیصلہ کیا ہے کہ اتحاد کی میٹنگ ہر دو ماہ بعد منعقد ہوگی، جبکہ اگلا اجلاس اگست میں حیدرآباد میں ہوگا۔ انہوں نے کہا کہ ادھو ٹھاکرے اور ہیمنت سورین بھی آن لائن اجلاس میں شریک ہوئے اور تمام اہم نکات سے اتفاق کیا۔

اقتصادی مسائل پر فوری آل پارٹی میٹنگ کا مطالبہ

کھڑگے نے کہا کہ مرکز کو موجودہ معاشی صورتحال، بڑھتی ہوئی بے روزگاری، مہنگائی، کسانوں کے مسائل اور عوامی مفاد سے جڑے دیگر معاملات پر فوری طور پر آل پارٹی میٹنگ بلانی چاہیے۔ انہوں نے مزید کہا کہ پارلیمنٹ کے آئندہ مانسون اجلاس کے دوران ایوان کے اندر اپوزیشن کی حکمت عملی کو مربوط بنانے کے لیے قائد حزب اختلاف کے دفتر میں ہر صبح رابطہ اجلاس منعقد کیا جائے گا۔

انتخابی شفافیت، نیٹ امتحان اور وزیر تعلیم کے استعفے کا مطالبہ

کھڑگے نے بتایا کہ اجلاس میں اس بات پر اتفاق ہوا ہے کہ خصوصی نظرثانی (SIR)، ووٹر فہرستوں میں مبینہ گڑبڑی اور انتخابات کی شفافیت کے معاملے پر چیف جسٹس آف انڈیا کو ایک خط لکھا جائے گا، جو جلد ان کے حوالے کیا جائے گا۔ انہوں نے الزام لگایا کہ نیٹ اور سی بی ایس ای امتحانات سے متعلق سنگین بے ضابطگیوں کی وجہ سے لاکھوں طلبہ متاثر ہوئے ہیں، اس لیے مرکزی وزیر تعلیم کو فوری استعفیٰ دینا چاہیے۔ ان کے مطابق موجودہ دور میں نوجوانوں کے ساتھ اعتماد شکنی ہوئی ہے اور اسی وجہ سے بڑی تعداد میں نوجوان سڑکوں پر احتجاج کرنے پر مجبور ہیں۔ کھڑگے نے کہا کہ انڈیا اتحاد بڑھتی ہوئی معاشی مشکلات، بے روزگاری، مہنگائی، کسانوں کے مسائل اور مبینہ مظالم کے معاملات مسلسل اٹھاتا رہے گا اور ان موضوعات پر حکومت کو جوابدہ بنائے گا۔ اجلاس کے بعد آر جے ڈی رہنما تیجسوی یادو نے کہا کہ پانچ اہم امور پر ایک کمیٹی تشکیل دی گئی ہے اور اتحاد کی تمام جماعتیں ان مسائل پر متحد ہیں۔

بھارت ایکسپریس اردو۔