Supreme Court On Fire Crackers Ban: سپریم کورٹ نے منوج تیواری سے کہا: جہاں پٹاخے پر پابندی نہیں ہے وہاں جا کر پٹاخے پھوڑیئے

دہلی میں پٹاخوں پر پابندی کے معاملے پر منگل (13 ستمبر) کو سپریم کورٹ میں سماعت ہوئی، اس دوران مرکزی حکومت نے دلیل دی کہ گرین  پٹاخوں کی تیاری اور فروخت کو لے کر رہنما خطوط تیار کر لیے گئے ہیں۔اسی دوران ایک وکیل نے دہلی سمیت کچھ ریاستوں میں پٹاخوں پر مکمل پابندی کا معاملہ اٹھایا۔ عدالت نے جواب میں کہا کہ جہاں حکومت نے پابندی لگائی ہے ہم اس میں مداخلت نہیں کریں گے۔ آپ تہوار منانے کے دوسرے طریقے اپنائیں۔درحقیقت، دہلی کی کجریوال حکومت نے موسم سرما میں آلودگی کو روکنے کے لیے اپنے ایکشن پلان کے تحت پٹاخوں کی تیاری، فروخت، ذخیرہ کرنے اور استعمال کرنے پر پابندی لگا دی ہے۔

رکن پارلیمنٹ اور بی جے پی لیڈر منوج تیواری نے دہلی میں پٹاخوں پر مکمل پابندی  پر تنقید کرتے ہوئے جسٹس اے۔ ایس۔ بوپنا اور جسٹس ایم ایم سندریش  کے بنچ کو بتایا کہ گرین پٹاخوں کے لیے عدالت کی منظوری کے باوجود ایسا کیا گیا ہے۔منوج تیواری کی درخواست پر عدالت نے ان کے وکیل سے کہا کہ لوگوں کی صحت اہم ہے، جہاں حکومت نے پٹاخوں پر پابندی لگائی ہے، اس کا مطلب مکمل پابندی ہے۔ پٹاخے پھوڑنا چاہتے ہیں تو وہاں جائیں جہاں پابندی نہ ہو۔

عدالت نے منوج تیواری سے کیا کہا؟

بنچ نے شمال مشرقی دہلی لوک سبھا حلقہ کے رکن پارلیمنٹ منوج تیواری سے کہا، ”آپ لوگوں کو سمجھائیں کہ وہ پٹاخے نہ پھوڑیں۔ انتخابات کے بعد جیت کے جلوس کے دوران بھی پٹاخے نہ پھوڑیں۔ جیت کا جشن منانے کے اور بھی بہت سے طریقے ہیں۔ یاد رہے کہ دہلی کے وزیر ماحولیات گوپال رائے نے پیر (11 ستمبر) کو کہا کہ موسم سرما میں آلودگی کی سطح کو کم کرنے کے ایکشن پلان کے حصے کے طور پر، تمام قسم کے پٹاخوں کی تیاری، فروخت، ذخیرہ کرنے اور استعمال پر دوبارہ پابندی لگانے کا فیصلہ کیا گیا ہے۔رائے نے کہا کہ دہلی پولیس کو شہر میں اس پابندی کو نافذ کرنے کے لئے سخت ہدایات جاری کی جائیں گی۔ دہلی حکومت پچھلے دو سالوں سے ہر قسم کے پٹاخوں پر پابندی لگا رہی ہے۔ یہ مسلسل تیسرا سال ہے۔

بھارت ایکسپریس۔