Chitrakoot Jail Case: مرحوم مختار انصاری کے بیٹے عباس انصاری کی طرف سے دائر ضمانت عرضی پر سپریم کورٹ میں 9 ستمبر کو ہوسکتی ہے سماعت

Chitrakoot Jail Case: چترکوٹ جیل سانحہ معاملے میں مبینہ ملزم عباس انصاری کی طرف سے داخل ضمانت عرضی پر سپریم کورٹ 9 ستمبرکوسماعت کرسکتا ہے۔ معاملے کی سماعت کے دوران حکومت کی طرف سے پیش وکیل نے کہا کہ کہ اے ایس جی کے ایم نٹراجن موجود نہیں ہیں، لہٰذا معاملے کی سماعت کو آئندہ پیر تک کے لئے ملتوی کردیا ہے۔

عباس انصاری کی طرف سے پیش ہوئے سینئر وکیل کپل سبل نے مخالفت کرتےہوئے کہا کہ دومعاملوں کو چھوڑ کر سبھی معاملوں میں عباس انصاری کو ضمانت مل چکی ہے۔ انہیں امید ہے کہ اگر ان دو معاملوں میں بھی آنے والے وقت میں ضمانت مل جاتی ہے تو عباس انصاری کو گینگسٹر معاملے میں گرفتارکیا جاسکتا ہے۔ لہٰذا عباس انصاری کوگرفتاری سے چھوٹ دی جائے۔ ہائی کورٹ کی لکھنؤ بینچ نے عباس انصاری کی طرف سے دائر ضمانت عرضی کو خارج کردیا تھا۔

 واضح رہے کہ منی لانڈرنگ معاملے میں عباس انصاری کو 18 ستمبر 2022 کو نینی جیل سے چترکوٹ جیل بھیج دیا گیا تھا۔ عباس انصاری پرالزام ہے کہ وہ چترکوٹ جیل میں اپنی اہلیہ سے غیرقانونی طریقے سے ملاقات کر رہے تھے۔ اس معاملے میں عباس انصاری سمیت پانچ لوگوں کے خلاف  گینگسٹر کی کارروائی کی گئی، جس میں جیل کینٹین ٹھیکیدار، نکہت انصاری سمیت دیگر کے خلاف پولیس نے جانچ شروع کردی تھی۔

چترکوٹ جیل معاملے میں جیل سپرنٹنڈنٹ، ڈپٹی جیلر، وارڈن کے علاوہ دیگرکوبھی گرفتارکیا گیا تھا، جن میں سے کچھ ضمانت پرباہرہیں۔ پولیس نے اس معاملے میں عباس انصاری، کینٹین ٹھیکیدارنونیت سچنا، نکہت انصاری کے ڈرائیورنیازانصاری، سماج وادی پارٹی کے رہنما فرازخان اور وارانسی کے شہبازعالم خان کے خلاف گینگسٹر ایکٹ کے تحت مقدمہ درج کیا تھا۔ قابل ذکرہے کہ 10 فروری 2023 کو چترکوٹ کے ڈی ایم ابھیشیک آنند، ایس پی ورندا شکلا نے جیل پرچھاپہ ماری کی تھی، اس دوران رکن اسمبلی عباس انصاری کی اہلیہ نکہت انصاری کو حراست میں لے لیا تھا۔