Amit Shah attack against the Congress: امت شاہ کا سیتامڑھی میں انتخابی ریلی سے خطاب، کہا-کانگریس کے دور میں دہشت گردوں کے خلاف کبھی سخت کارروائی نہیں ہوئی

مرکزی وزیر داخلہ امت شاہ نے پیر کے روز کانگریس پارٹی پر سخت حملہ کرتے ہوئے کہا کہ اس کے دور حکومت میں دہشت گردوں کے خلاف کبھی کوئی سخت کارروائی نہیں کی گئی۔ انہوں نے کہا کہ وزیر اعظم نریندر مودی نے گزشتہ 11 برسوں میں دہشت گردی کو ختم کرنے کے لیے متعدد ٹھوس اقدامات کیے، جبکہ کانگریس کے زمانے میں تقریباً ہر دوسرے دن دہشت گرد حملے ہوتے تھے، مگر حکومت خاموش رہتی تھی۔ امت شاہ نے طنز کرتے ہوئے کہا کہ ’’کانگریس کے دور میں دہشت گردوں کو بریانی کھلائی جاتی تھی، مگر کارروائی نہیں کی جاتی تھی۔‘‘

مودی حکومت نے ملک کو بنایا محفوظ اور خوشحال

انہوں نے کہا کہ ’’جب وزیراعظم مودی اقتدار میں آئے، تو چاہے وہ اُری حملہ ہو، پلوامہ یا پہلگام  ہو، بھارت نے سرجیکل اسٹرائک، ایئر اسٹرائک اور آپریشن سندور کے ذریعے پاکستان کے اندر گھس کر دہشت گردوں کا صفایا کیا۔ مودی جی نے اس ملک کو محفوظ بنایا اور اسے خوشحالی کی راہ پر گامزن کیا۔‘‘

آپریشن سندور: دہشت گردوں کے خلاف سخت کارروائی

’’آپریشن سندور‘‘ بھارتی مسلح افواج کی وہ کارروائی تھی جو پہلگام دہشت گرد حملے کے جواب میں انجام دی گئی، جس میں 26 افراد مارے گئے تھے۔ یہ کارروائی 7 مئی کو شروع ہوئی، جس کے بعد پاکستان کی جانب سے جوابی حملہ کیا گیا، تاہم بھارتی افواج نے پاکستان اور پاکستان کے زیرِ قبضہ جموں و کشمیر میں دہشت گردی کے ڈھانچوں کو نشانہ بنایا۔ یہ تصادم 10 مئی کو جنگ بندی معاہدے کے ساتھ ختم ہوا۔

راہل گاندھی نے چھٹھ پوجا کی توہین کی

وزیر داخلہ نے مزید کہا کہ راہل گاندھی نے چھٹھی میّا کی توہین کی ہے، جو بہار کے عوام کبھی نہیں بھولیں گے۔ انہوں نے کہا ’’راہل گاندھی، تم وزیراعظم مودی کی جتنی مرضی تنقید کرو، ہمیں کوئی اعتراض نہیں، مگر چھٹھی میّا کی توہین ناقابل برداشت ہے۔‘‘ یہ بیان اس وقت سامنے آیا جب راہل گاندھی نے دربھنگہ میں کہا تھا کہ بی جے پی نے چھٹھ پوجا کے دوران وزیراعظم مودی کے لیے الگ تالاب بنا کر’’ڈراما‘‘ رچایا۔

نکسل ازم کے خاتمے پر مودی حکومت کی تعریف

امت شاہ نے نکسل ازم کے خلاف حکومت کے اقدامات کا ذکر کرتے ہوئے کہا، ’’جب کانگریس اقتدار میں تھی، تب بہار کے کئی اضلاع نکسل متاثر تھے اور ووٹنگ سہ پہر تین بجے تک ختم کر دی جاتی تھی۔ اب پورے بہار میں شام پانچ بجے تک ووٹنگ ہو رہی ہے کیونکہ بہار اب نکسل ازم سے ازاد ہو چکا ہے۔‘‘

دو مرحلے میں ہوں گے بہار اسمبلی انتخابات

ستامڑھی اسمبلی نشست پر این ڈی اے کی جانب سے جنتا دل (یونائیٹڈ) کے سنیل کمار پنٹو امیدوار ہیں، جبکہ ان کے مقابل آر جے ڈی کے سنیل کمار ہیں۔ بہار اسمبلی کی 243 نشستوں کے لیے ووٹنگ دو مرحلوں میں 6 نومبر اور 11 نومبر کو ہوگی، جب کہ ووٹوں کی گنتی 14 نومبر کو کی جائے گی۔

بھارت ایکسپریس اردو۔