Startup India: ’اسٹارٹ اپ انڈیا‘ کے 10 سال مکمل، ملک کے وائبرنٹ اسٹارٹ اپ ایکو سسٹم سے بات چیت کریں گے وزیراعظم مودی

نئی دہلی: ’اسٹارٹ اپ انڈیا‘ پہل کے 10 سال مکمل ہونے کے موقع پر وزیراعظم نریندر مودی جمعہ 16 جنوری کو قومی دارالحکومت دہلی میں منعقد ہونے والے ایک خصوصی پروگرام میں شرکت کریں گے۔ وزیراعظم کے دفتر (پی ایم او) نے جمعرات کو اس کی باضابطہ جانکاری دیتے ہوئے بتایا کہ اس تقریب میں وزیراعظم ملک کے تیزی سے ترقی کرتے اور وائبرنٹ اسٹارٹ اپ ایکو سسٹم سے وابستہ افراد سے براہِ راست بات چیت کریں گے اور ان کے تجربات سنیں گے۔

واضح رہے کہ ’اسٹارٹ اپ انڈیا‘ پہل کا آغاز 16 جنوری 2016 کو وزیراعظم مودی نے کیا تھا۔ اس کا بنیادی مقصد ملک میں نئے اور اختراعی خیالات کو فروغ دینا، نوجوانوں کو کاروبار کے لیے حوصلہ دینا اور سرمایہ کاری کے ذریعے معاشی ترقی کو رفتار دینا تھا، تاکہ بھارت نوکری تلاش کرنے والا نہیں بلکہ نوکری فراہم کرنے والا ملک بن سکے۔ پی ایم او کے بیان کے مطابق دس سال مکمل ہونے کے اس موقع پر وزیراعظم مودی اسٹارٹ اپ دنیا سے جڑے افراد کے ساتھ مکالمہ کریں گے اور ان کی کامیابیوں کو سراہیں گے۔ اس پروگرام میں منتخب اسٹارٹ اپ نمائندے اپنے کاروباری سفر، درپیش چیلنجز اور کامیابیوں کے تجربات بھی وزیراعظم کے ساتھ شیئر کریں گے۔ اس کے علاوہ وزیراعظم اس موقع پر ملک کے نوجوان کاروباریوں اور سرمایہ کاروں سے خطاب بھی کریں گے۔ گزشتہ ایک دہائی میں بھارتی اسٹارٹ اپ سیکٹر نے غیر معمولی ترقی کی ہے اور آج یہ دنیا کے تیزی سے ابھرتے ہوئے ایکو سسٹمز میں شمار ہوتا ہے۔

حکومتی اعداد و شمار کے مطابق گزشتہ دس برسوں میں ملک بھر میں دو لاکھ سے زائد اسٹارٹ اپس کو سرکاری طور پر منظوری دی جا چکی ہے۔ یہ اسٹارٹ اپس نہ صرف نئی ٹیکنالوجی اور اختراعات کے ذریعے معیشت کو مضبوط کر رہے ہیں بلکہ مختلف شعبوں میں ملک کی اندرونی سپلائی چین کو مستحکم کرنے میں بھی اہم کردار ادا کر رہے ہیں۔ ’اسٹارٹ اپ انڈیا‘ پہل اب بھارتی معیشت اور اختراعی نظام کی ایک مضبوط بنیاد بن چکی ہے۔ پی ایم او کے مطابق اس اسکیم نے ایک ایسا ادارہ جاتی ڈھانچہ تیار کیا ہے جس کے ذریعے اسٹارٹ اپس کو مالی وسائل، رہنمائی اور عالمی منڈیوں تک رسائی حاصل ہوئی ہے۔ اس سے نوجوان کاروباریوں کو نہ صرف ملک میں بلکہ بیرونِ ملک بھی آگے بڑھنے کے مواقع ملے ہیں۔

گزشتہ ہفتے وزیراعظم نریندر مودی نے اسٹارٹ اپس سے اپیل کی تھی کہ وہ مصنوعی ذہانت یعنی آرٹیفیشل انٹیلیجنس (اے آئی) کا استعمال سماج کی بھلائی کے لیے کریں۔ انہوں نے زور دیا تھا کہ اے آئی کو سستا، شفاف اور سب کے لیے قابلِ رسائی بنایا جانا چاہیے۔ حکومت کے مطابق صنعت و داخلی تجارت کے فروغ کے محکمے (ڈی پی آئی آئی ٹی) نے ’اسٹارٹ اپ انڈیا‘ کے تحت اب تک 2,01,335 اسٹارٹ اپس کو تسلیم کیا ہے، جن کے ذریعے ملک بھر میں 21 لاکھ سے زیادہ روزگار کے مواقع پیدا ہوئے ہیں۔ اس کے ساتھ ہی 2014 سے 2024 کے درمیان بھارتی اختراع کاروں کی جانب سے دائر پیٹنٹ درخواستوں میں 425 فیصد اضافہ ہوا ہے، جبکہ عالمی اختراعی اشاریہ 2025 میں بھارت کی درجہ بندی بہتر ہو کر 38ویں مقام تک پہنچ گئی ہے، جو اس پہل کی کامیابی کو واضح کرتی ہے۔

بھارت ایکسپریس اردو۔