PM Modi in New Zealand: نیوزی لینڈ میں وزیراعظم نریندر مودی کا پرتپاک استقبال، قومی پرچم کے رنگوں سے جگمگا اٹھا آکلینڈ کا اسکائی ٹاور

آکلینڈ: وزیراعظم نریندر مودی اپنے تین ملکی دورے کے آخری مرحلے میں جمعہ کو نیوزی لینڈ پہنچ گئے، جہاں آکلینڈ میں ان کا منفرد اور پرتپاک استقبال کیا گیا۔ اس موقع پر شہر کی معروف عمارت اسکائی ٹاور کو خصوصی روشنیوں سے آراستہ کیا گیا، جو بھارت اور نیوزی لینڈ کے درمیان مضبوط دوستی اور خوشگوار تعلقات کی علامت قرار دی گئی۔ بھارتی وزارتِ خارجہ کے ترجمان رندھیر جیسوال نے سوشل میڈیا پلیٹ فارم ایکس پر بتایا کہ آکلینڈ میں وزیراعظم نریندر مودی کے استقبال کے لیے مشہور اسکائی ٹاور کو خصوصی روشنیوں سے سجایا گیا، جو دونوں ممالک کے درمیان گہری دوستی اور باہمی تعاون کی عکاسی کرتا ہے۔

وزیراعظم کرسٹوفر لکسن نے ہوائی اڈے پر استقبال کیا

نیوزی لینڈ کے وزیراعظم کرسٹوفر لکسن نے آکلینڈ ہوائی اڈے پر وزیراعظم نریندر مودی کا گلے لگا کر خیرمقدم کیا۔ اس موقع پر نیوزی لینڈ میں بھارت کی ہائی کمشنر موانپوئی سیاوی سمیت دونوں ممالک کے اعلیٰ حکام بھی موجود تھے۔ بعد ازاں وزیراعظم لکسن نے سوشل میڈیا پلیٹ فارم ایکس پر استقبال کی ویڈیو شیئر کرتے ہوئے لکھا: ’’وزیراعظم نریندر مودی، نیوزی لینڈ میں آپ کا خیرمقدم ہے۔‘‘  وزیراعظم نریندر مودی نے بھی وزیراعظم کرسٹوفر لکسن کی میزبانی پر شکریہ ادا کرتے ہوئے ایکس پر لکھا: ’’کچھ دیر قبل آکلینڈ پہنچا ہوں۔ ہوائی اڈے پر پرتپاک استقبال کے لیے وزیراعظم لکسن کا شکریہ۔ یہ دورہ تاریخی اہمیت کا حامل ہے، کیونکہ تقریباً چار دہائیوں بعد کسی بھارتی وزیراعظم کا نیوزی لینڈ کا یہ پہلا دورہ ہے۔ میں وزیراعظم لکسن کے ساتھ ملاقات اور بھارت۔نیوزی لینڈ دوستی کے مختلف پہلوؤں پر جامع گفتگو کا منتظر ہوں۔ ہفتے کے روز آکلینڈ میں بھارتی برادری کے ایک بڑے پروگرام سے بھی خطاب کروں گا۔‘‘

بھارتی برادری کا ثقافتی خیرمقدم

نیوزی لینڈ میں مقیم بھارتی برادری نے روایتی ثقافتی رقص اور موسیقی کے ذریعے وزیراعظم مودی کا استقبال کیا۔ ان کی آمد سے قبل بھارتی نژاد افراد نے اپنی خوشی کا اظہار کرتے ہوئے کہا کہ وہ طویل عرصے سے اس تاریخی دورے کے منتظر تھے۔ استقبالیہ پروگرام میں شریک ایک فنکار نے کہا: ’’وزیراعظم مودی کے سامنے پرفارم کرنا ہمارے لیے اعزاز کی بات ہے۔ وہ تقریباً چالیس برس بعد نیوزی لینڈ آ رہے ہیں، جبکہ اس سال ’وندے ماترم‘ کی 150 ویں سالگرہ بھی منائی جا رہی ہے، اس لیے ہم اس تاریخی موقع کو یادگار بنانے کے لیے بے حد پرجوش ہیں۔‘‘

بھارت ایکسپریس اردو۔