SP MLA Pallavi Patel detained in Lucknow: سماجوادی پارٹی کی ایم ایل اے پلوی پٹیل حراست میں، لکھنؤ میں کررہی تھیں احتجاج، سامنے آیا یہ ویڈیو

اترپردیش واقع سراتھو سے سماجوادی پارٹی کی رکن اسمبلی اوراپنا دل کمیرا وادی کی لیڈر پلوی پٹیل کو دارالحکومت لکھنومیں حراست میں لے لیا گیا ہے۔ یہ جانکاری پلوی پٹیل نے خود سوشل میڈیا سائٹ پر دی۔ ایک ویڈیو شیئرکرکے پلوی پٹیل نے لکھا- دلت رکن پارلیمنٹ کے گھر پر حملہ اورتشدد کے خلاف دارالحکومت لکھنؤ کی سڑکوں پراحتجاج۔ سینکڑوں ساتھیوں کے ساتھ حراست میں لیا گیا۔ جدوجہد جاری رہے گا۔

 واضح رہے کہ پلوی پٹیل نے سماجوادی پارٹی کے رکن پارلیمنٹ رام جی لال سمن کی رہائش گاہ پرکرنی سینا کے ذریعہ کئے گئے توڑ پھوڑ سے متعلق احتجاجی مظاہرہ کیا۔ آپ کو بتادیں کہ رکن پارلیمنٹ رام جی لال سمن کی رہائش گاہ پرتوڑ پھوڑکرنے اور جان لیوا حملہ کرنے تک کا دعویٰ کیا گیا ہے۔ رام جی لال سمن اور ان کے بیٹے نے ایف آئی آر درج کرائی ہے۔

پلوی پٹیل اور ان کے حامیوں کو ایکوگارڈن بھیجا گیا

سماجوادی پارٹی کی رکن اسمبلی پلوی پٹیل اور اپنا دل کمیرا وادی کے کارکنان نے پریورتن چوک سے حضرت گنج چوراہے تک احتجاج کرنے کی کوشش کی۔ پریورتن چوک پر پولیس کے ذریعہ بیریکیٹنگ لگاکر سبھی مظاہرین کو بسوں میں بھرکر ایکوگارڈن بھیجا گیا۔ رکن اسمبلی پلوی پٹیل نے بتایا کہ رام جی سمن ایک دلت فیملی سے آتے ہیں، جس کی وجہ سے اس طرح کا ظلم کیا گیا اور یہ ایک سازش کے تحت کیا گیا ہے۔ یہ ایک دن کا عمل نہیں ہے۔ اس کے لئے کافی عرصے سے سازش کی جا رہی تھی۔

 کیا ہے پورا معاملہ؟

واضح رہے کہ منگل 26 مارچ، 2025 کورام جی لال سمن کے آگرہ واقع رہائش گاہ پرکرنی سینا کے لوگوں نے حملہ بولا اورتوڑپھوڑکی۔ لال سمن کی مخالفت اس بیان کی وجہ سے ہورہی ہے، جو انہوں نے رانا سانگا کے ضمن میں دیا تھا۔ حملے کے ضمن میں پولیس اور رام جی لال سمن کے بیٹے دونوں کی طرف سے الگ الگ ایف آئی آر درج کرائی گئی ہیں۔